Авыл көннәре бердәмлеккә илтә

Көн дә бәйрәм, көн дә туй. Бүген Көектә, Чапшарда, Нөнәгәрдә Авыл көне дип яздылар, иртәгә Биктәш авылында Питрау бәйрәме. 25 июль көнне Салавыч Сәрдегәне белән Кили авылында да Авыл көне билгеләнгән. Тагын кайларда Авыл көннәре гөрләячәк, анысын комментарийга язарсыз.
Авыл көне, иң беренче чиратта, авылдашларны бер мәйданга туплый, ераклардан якташлар кайта, туган-тумача, кода-кодагый бергә җыелыша. Бердәмлек, татулык өчен мондый бәйрәмнәр кирәк, әлбәттә, арада фронтка булышучы авыллар өчен бер ял итеп, күңел ачып алу чарасы булып та тора ул. Әмма шул ук вакытта туплар шартлавын да онытмыйк, безгә бәйрәмнәр бүләк иткән махсус хәрби операциядәге егетләребезне хәер-догадан, ярдәмнән ташламыйк, акчалата да, болай да аларга өлеш чыгарыйк.