Балтач укытучылары үрнәк күрсәтте

Әгәр вакыт телләрен өч ел элек булган көннәргә кире кайтарсак, тәннәр чымырдап куя. Әтиләрне, улларны, абыйларны, энеләрне ил сагына алдылар. Кешелек бер мәлгә билгесезлек эчендә калды, ни булды бу, иртәгә нәрсә булачак, хәзер нишләргә кирәк...

Әнә шул чакта волонтерлар дигән төшенчә алгы сызыкка басып, күңел иткәннәрне, ярдәм итәргә теләге булганнарны үз төркемнәренә дәшә, өнди башлады. Әлбәттә, нинди адым ясасак дөрес булыр микән дип ярдәмгә атлыгып торган мөгаллим һәм мөгаллимәләребез читтә калмады.

— Безнең Балтач урта мәктәбендә ярдәм итәргә иң әүвәл укытучылар тотынды, — ди мәктәпнең директор урынбасары Руфия Закирова. — Волонтер Гөлнараның гимнастеркалар, йокы капчыклары, яралыларны ташу өчен носилкалар тегәргә чакыруы булды, без шунда агылдык. Үзебезнең мәктәптә тегү машиналарыбыз да булгач (21 тегү машинасы бар мәктәпнең З. Ш.), укытучыларыбызның күбесе тегү сәләтенә дә ия, махсус хәрби операциягә, егетләребезгә кирәкле әйберләрне үзебез үк тә тегә башладык, килә алган әниләр дә килде. Машиналар ватылмыйча тормый, сүз тыңлаучан әтиләребез ремонтлап бирә, бигрәк тә Рамил Бикбаев ул яктан зур ярдәм итте, детальләренә кадәр үзе алды. Шулай итеп, мәктәп фронтка ярдәм итү нияте белән кайный башлады. Шул көннәрдән бирле без һаман да волонтерлар сафында, курку белмәс батыр йөрәкле волонтерларыбыз егетләребезгә ярдәм итәргә барганда беркайчан да читтә калмыйбыз, тәм-томын да җибәрәбез, медицина-кирәк яраклары да туплыйбыз, хатлар да язабыз. Без чын күңелдән булышабыз, һичнинди зарлану юк, табутта кайткан егетләрне күреп йөрәкләр әрни, мин аеруча авыр күтәрәм ул кайгыларны, күршемә кадәр һәлак булды бит инде минем. Шуңа күрә, безнең ил өстенә кагылган бу вәзгыятькә беркем дә битараф калырга, кылган изге гамәлләрне гаепләргә тиеш түгел дип саныйм. Без җиңәргә, җиңүгә омтылырга тиеш, дигән максаттан булышуыбызны дәвам итәчәкбез. «Тату сыйныф» дигән рес-публика бәйгесендә Ватанга ярдәм итүне зурлап күрсәтә алдык, шуңа җиңдек тә, балаларыбызны Кырымга юллама белән бүләкләделәр.

Директор урынбасары Руфия ханым кебекләр булганда, Зур ватанның кече патриотлары һәрчак алгы сызыкта торыр, алар җиңүне якынайтучы патриотлар булырлар.

Яңа уку елы башлану алдыннан уздырылучы август киңәшмәсендә дә Балтач урта мәктәбенә махсус хәрби операциягә ярдәм итү турында чыгыш әзерләргә йөкләнгән. Аларның бу ярдәмнәре үзе бер эшчәнлеккә әверелде инде хәзер, киңкырлы эшчәнлек дисәң дә ялгыш булмас.

Балтач урта мәктәбе язган солдат хатлары үзенчәлекле булуы, эчтәлегенең рухландыргыч дәрәҗәдә язылуы белән аерылып тора. Чираттагы ялга кайткан солдатларыбыз нәни хат авторлары янына килми булдыра алмады, ихлас, җылы хат авторларына ноутбук кебек зур бүләкләр биргән солдатлар, я аларның әниләре-әтиләре дә булды. Аннан окоп, блиндаж шәмнәре ясый башладылар. Моңа аларны волонтер әтиләр өйрәтте, үзләренең гуманитар ярдәм җыю пунктларына да чакырып очрашулар, мастер-класслар күрсәтүләр файдага гына булды: җиң сызганып шәмнәр ясадылар, солдатларны куандырдылар. Квартал саен гуманитар ярдәм җыюлар гадәткә керде, һәр бала, укытучы, әти-әни җиңүгә ничек тә өлеш кертергә тырыша. Концерт куеп та, шуннан кергән акчаны алар солдатларга ярдәм итәр өчен 3 генератор сатып алуга тоттылар.
Балтач урта мәктәбе үзенең җиде карлыгачын вакытсыз җир куенына салды — Эдуард Петров, Раил Галимҗанов, Руслан Иванов, Ленар Әсхәдуллин, Фәнис Шәмсетдинов, Ранил Галимов, Рашат Гыйбадуллин — махсус хәрби операция зонасында нацистларга каршы көрәштә мәңгелеккә башларын салдылар. Болай да тарихи каһарманнары белән данлыклы мәктәп батырларын йөрәк түреннән төшерми — әлеге егетләр истәлегенә мемориаль такта ачылышы, ел да чаңгы ярышлары уздырылуы шуның ачык мисалы. Быел да узды чаңгы ярышы, «Елмай» сөт-май комбинаты тармаклары җитәкчеләреннән берсе Айрат Гыйләҗев әлеге ярышка тулысынча иганәчелек ярдәме күрсәтте. Бу кыйммәтчелек заманында ярышлар уздыру гаять тә зур суммалар сорый. Иганәченең Ватан хакына багышланган әлеге игелекле хезмәте мактауга һәм олы рәхмәт хисләренә лаек.

"Без чын патриотлар тәрбияләгәнбез икән, — ди Руфия Закирова курку белмәс батыр укучылары турында. Мәктәптә гаять тә бай музей эшли, аның бер почмагын махсус хәрби операциягә багышлаганнар, грант ота калсалар, шуңа мобиль музей эшлиселәре килә. Укучы балалар дәресләрдән соң укытучылары янәшәсенә маскет челтәрләр үрергә килә. Махсус хәрби операциядән кайткан егетләр белән даими очрашулар уздырылып торыла. Үз укучыларының махсус хәрби операциядәге әтиләренә, туганнарына хөрмәт аеруча да зур. Гомумән, Балтач мәктәбендә әтиләре хәрби операциядә булган болай да яралы бала күңеленә каты бәрелмиләр, аларны рәнҗетмәскә, үпкәләтмәскә тырышучы укытучыларның күп булуы бу тормышта кешелеклелек-мәрхәмәтлелек төшенчәсенең әле барлыгына ишарә. Болардан тыш, мәктәпнең яшь тимурчылары уллары махсус хәрби операциядә булган өлкәннәргә дә барып булыша, узган ел кыш кар күп булды, булышырга да еш бардылар балалар.

— Безнең 40 балабызның әтисе бүгенге көндә Ватан алдындагы бурычларын намус белән үти, — ди Руфия Әдһәм кызы. — Аларга без мөмкин булган кадәр ярдәм итәргә тырышабыз, түләүле түгәрәкләребез алар өчен бушка эшли, ашауларыбыз да бушка бирелә. Дөньялар гына тынычлансын да, балаларыбыз күзендә сагыну чаткылары, йөзләрендә кайгы-сагышлары калмасын иде.

Балтач урта мәктәбе райондагы Ватан сакчылары бүлеге координаторы Дилүс Гатиятуллин белән дә тыгыз элемтәдә тора. Форпост, яшь армиячеләр, волонтерлар, Алдынгылар хәрәкәте җитәкчеләре дә мәктәптә еш кунак.

— Башкарган эшләребезне газета битенә генә төшереп бетереп булмый, томлап китап язарлык була бара, — дип дәвам итә Руфия Әдһәмовна. — Һәр кылган гамәлебез өчен шөкер итәбез, һәр кылган гамәлебезгә горурланабаз, куанабыз. Менә ике көрәшче егетебез Хәйретдиновлар көрәштә нинди зур урыннарга ия булсалар, нинди зур бүләк отсалар, шуны егетләребезгә хәрби зонага озаталар, соңгыларында пычкы бүләк иттеләр.
Узган ялларның берсендә мәктәпнең югары сыйныф укучылары әти-әниләре мәктәп бакчасына җыелды, биредә алар агачлыкны чистарттылар, агачларны егып, кисеп, турап, ярып, игелекле эш башкардылар. Әлеге утыннар якыннары махсус хәрби операциядә булган гаиләләргә бирелә.

Яхшылыкны эшләп карасаң, аның тәмен тоясың, күбрәк эшләсәң, синнән дә бәхетле кеше юк. Балтач мәктәбе укучылары да моның шулай икәнлеген тоя башлаган хәзер, һәр көнне игелек кылу өчен нәни патриотлар нинди дә булса изге эшкә рухланып яши, белем ала. Рәхмәт сезгә, Балтач урта мәктәбе, укытучылары, укучылары, әти-әниләре! Тылда мондый күмәк һәм бердәм көч булганда без Җиңүгә таба барырбыз.

Фотолар: мәктәп архивыннан