Бик күпләргә үрнәк гаиләсе белән дә бәхетле иде Рәшит Шәрипович (фото)

Хатыны Хәмисә ханым гомер буе янәшәсендә булды. Баштарак, балалар үстергәндә, алар бакчага йөргәндә шул бакчада шәфкать туташы-тәрбияче булып эшләсә, соңарак, ире янәшәсендә шәфкать туташы булып эшли. Ул да тырышлыгы, авыруларга игътибарлы булуы өстенә хезмәттәшләренә ярдәмчел һәм ихтирамлы булуы белән коллективта хөрмәт казана. Балалары да үзләре кебек итагатьле, тәртипле, акыллы булып үскәннәр. Өчесе дә югары белемле, һәрберсенең үз гаиләсе бар. «Оясында ни күрсә, очканында шул булыр» дигәндәй, тәртипле гаиләнең балалары да әти-әниләре кебек матур тормыш итәләр икән. Кызлары Ләйсән - Мәскәүдә педагог-психолог, уллары Илһам - завод директоры, спорт остасы, көрәшче, Рәгъде табиб һөнәрен үзләштерде. Мин егетләрне беренче тапкыр әтиләрен соңгы юлга озатканда күрдем. Әтиләренең юбилеена язма әзерләп йөрүемне, инде офтануымны да әйттем. "Без үзебез дә савыгуына зур өметләр баглаган идек, нурланыш-радиацияләр үлемен тизләтте генә бугай",- ди олы уллары, Ютазыда завод директоры булып эшләүче, район Советы депутаты Илһам Сафин да. Рәшит абый соңгы өч елда хатыны белән даими рәвештә дип әйтерлек Балтачта, инде күп еллар элек үзләре торгызган йортларында яшәделәр.

…Балалар, оныклар, киленнәр өйдә жидесенә әзерләнәләр. - Мин Хәмисә ханымның моңсу хәтирәләрен тыңлыйм. Яраткан хатыны Хәмисә ханым соңгы сулышын алганчы үзенә, хезмәтенә, халкына тугры асыл ире янында була. "Сигез ел элек мин бик нык авырдым, катлаулы операция кичердем. Бик кайгырды Рашит, күз яшьләре белән Ходайдан мине үзеннән аермавын сорады. Көн-төн янымда булып, аякка бастырды… менә үзе генә…" - ди Хәмисә ханым. Ә син, яшә әле, балаларның, оныкларның игелек-шатлыкларын күр. Бик зур рәхмәт Сиңа, балаларыма, хезмәттәшләремә. Оныкларга бабагыз шундый кеше иде, дип, минем хакта сөйлә. Минем җырларымны тыңлат"…