Энҗе бөртегенә охшатам

Балалар бакчасында ук бөтен чараларда башлап йөргән Зилә, һәрвакыт актив һәм тыйнак булып калды. Эшли башлавына унике ел вакыт үтсә дә, ул әле дә бөтерчек кебек бөтерелә. Аның яныннан укучылары да, укытучылар да, ярдәм сорап килүче таныш түгел кешеләр дә өзелми. Беркемгә дә "юк" дип әйтә белмәве үзенә зур кыенлыклар тудырса да, ул һәркемгә чын күңелдән, теләп булыша. Аларның уңышларына ихластан сөенә. Шакирова Зилә Фәргатовнага карыйм да, шушындый болганчык, күпләр үзе турында гына уйлый торган заманда да башкалар өчен тырыша, алар ирешкәннәргә бөтен йөрәге белән куана алучылар һаман бар икән әле дип шатланып куям.

Инглиз телен камил белүе һәм актив эшчәнлеге өчен грант отып Америкада белем күтәреп кайтуы да аңа эшендә ярдәм итә. Ул җитәкләгән унынчы сыйныф укучылары һәм әти-әниләре дә Зилә Фәргатовна хезмәтеннән бик канәгать. Участок сайлау комиссиясе секретаре булып эшлиме, конццерт-спектакльләрдә катнашамы, мәктәпнең методик берләшмәсен җитәклиме, төрле ярыш-КВНнарда чыгыш ясыймы - һәрвакыт зур җаваплылык тоя. Өлкән буын укытучылары компьютерга өйрәнгәндә дә аңа мөрәҗәгать итмәүчеләр сирәк калгандыр.

Мин Зиләне бик кыйммәтле энҗе бөртегенә охшатам. Үзенең тырышлыгы, тыйнаклыгы, мөлаемлеге, кешеләргә хөрмәте, активлыгы, күңеленең чисталыгы белән бик лаек ул моңа. Беренче укытучысы буларак, аның өчен сөенәм һәм тагын да зуррак уңышлар телим.

Миләүшә Гарифуллина
Балтач авылы.