Хезмәттә кайнап үткән яшьлекләре хөрмәттә үтсен (+фоторепортаж)

Аларны өлкән булган өчен генә түгел, ә әти-әниләребез, әби-бабайларыбыз булган өчен дә хөрмәт итәргә тиешбез. Бу көннәрдә төрле җирләрдә өлкәннәрне котлаулар, бүләкләүләр, искә алулар бара. Кичә Чепья мәдәният йортында узган чарада да озак еллар авыр хезмәтләрдә эшләп, бүгенге көндә лаеклы ялда булучы өлкәннәр җыелган иде. Анда берничә авыл җирлеге өлкәннәре катнашты. Чарага килүчеләрне "Наз" бүлекчәсе кызлары тәмледән-тәмле ризыклы өстәлләр белән каршы алып сыйладылар. Бәйрәмнең икенче өлеше чыгышлар һәм концерт номерлары белән үрелеп барды.

Гомерләре буе хезмәттә кайнаган, сугыш һәм сугыштан соңгы авырлыкларны иңнәрендә күтәргән, колхоз нужасын беренче көннәреннән үк тәртәгә җигелеп тарткан әби-бабаларыбыз картлык көннәрендә зур игътибарга, хөрмәткә лаек. Район башкарма комитеты җитәкчесе Рамил Шакиров барлык өлкәннәрне район Советы һәм башкарма комитеты исеменнән ихластан котлап: "Рәхмәт сезгә, бу дөньяда куйган хезмәтләрегез, кылган изгелекләрегез өчен. Без, сезнең киңәшләрегездән тайпылмабыз, сезнең эшләрегезне үзебезгә үрнәк итеп яшәрбез", диде.