Яңа ел барыбызга да китерсен бәхет, шатлык!

Бәйрәм «Җиз кыңгырау» парады белән башланып китте. Бу бәйрәмнең күрке булып берничә ел инде җигүле атлар тора. Районыбызның һәрбер хуҗалыгыннан атларны җигеп, бизәп, бистә урамыннан гармун моңнары белән үтү инде матур традициягә әверелде. 

Арада өчәр ат җигүчеләр дә бар. Алардан соң парадны бизәлгән автомашиналар һәм оешма-предприятие, учреждение коллективлары колоннасы дәвам итте. Чиратта «Балтач» үзәк ял паркындагы районыбызның төп чыршысының утларын кабызу иде. Шул көннән алып биредә көн дә төрле-төрле уеннар, җыр-биюләр тынмый. Кыш бабай белән Кар кызы, әкияти персонажлар балалар өчен Яңа ел каникулларын күңелле итеп үткәрү өчен төрле чаралар үткәрәләр. 

Ачылыш вакытында бистә урамыннан кәс-кәс атлап барган атлар арасыннан җиңүче хуҗалыклар да билгеләнде. Беренче урынны — «Якты юл», икенче урынны — Тимирязев исемендәге, өченче урынны «Татарстан» җәмгыяте атлары алды. Җиңүчеләрне ихластан котлыйбыз. Җигүле атларның татар халкының бер бизәге булуын онытмый, гореф-гадәтләрне саклап яшәсәк иде.