Карадуганга килсәң, музейга керми китмә

Фирая ханым әлеге вазыйфада 2011 елдан бирле эшли. Күпсанлы конкурсларда катнашып алган җиңүләре хакында газетабыз битләренә гел язып торабыз.

Себер тракты тарихы музеена 1995 елның 12 октябрендә Бакый Зыятдинов тарафыннан нигез салына. Музейда 4000гә якын экспонат тупланган. Материаллар Карадуган авылы уртасыннан узучы Себер тракты дип аталган юлга да бәйле булганга, экспозицияләрдә туган як һәм авыл тарихы гына түгел, Себер юлы тарихы да яктыртыла. Карадуганда зур почта станциясе, "Себер киткән" каторжаннарны йоклатып чыгаручы төрмә, казематлар булган. Экспозицияләрдә шул чор, аңа кагылышлы эш кораллары урнаштырылган.

Музейда татар байларына, сәүдәгәрләренә багышланган бүлек бар. Карадуган музей бинасын 1911 елда Мортаза Мөлеков салыра. Аскы катында кибет булса, икенче катта юлчылар өчен мосафирханә була. Биредә шулай ук үзенең атлары белән Г.Тукай шигырендә искә алынган икенче бай - эшмәкәр Габдрахман Ишморатов биографиясе белән дә танышып була.

Муса Җәлил музеена аеруча зур кызыксыну белән кердем. "Муса Җәлил белән берни бәйләми, ник монда аның музее бар икән?" дигән сорау миңа тынгы бирмәде. Ә музей оештыру пионер дружинасы белән бәйле икән. Карадуган мәктәбенең пионер дружинасы Җәлилнең исемен йөртә. Алар әдипнең тормыш юлын,иҗатын өйрәнә, аның эзләре буйлап эзләнүләр алып бара. Материаллар шактый туплангач, музей оештыру идеясе барлыкка килә. Эзтабарлар озак еллар Җәлилнең сеңлесе - Хәдичә Җәлилова белән хат алыша. Музейның матур бер традициясе булдырылган - ел саен Муса Җәлил премиясе лауреатлары белән очрашулар уздырыла. Музей турында озак язарга мөмкин. Әмма язганны укыганчы, барып күреп кайтсагыз, һичшиксез, үкенмәссез!

Ландыш Гарифуллина,
КФУ студенты.