Балтачагрорхимсервис оешмасында беренче яртыеллыкка нәтиҗә ясадылар (фото)

Балтачагрорхимсервис җәмгыяте базасында «Беренче яртыеллыкка нәтиҗә: агрохимик эшләрнең барышы. Икенче яртыеллыкка бурычлар» дип аталган семинар үтте.

Семинарның төп өлешеннән соң җитештерү зонасы, чәчүлек җирләр, юл төзелеше участогы, ике карьер эшчәнлеге белән таныштылар.

Кунаклар булган Арбаш карьерында ел тирәли кызу эш бара, чөнки алар эшләп чыгара торган вак таш бүгенге көндә иң кирәкле булган төзелеш материалларының берсе. Авылларыбызда төзелә торган юллар, шулай ук үзара салым буенча салына торган юлларга вак таш бик кирәк, биредә ташның сыйфатына да зур әһәмият бирелә.

Бүгенге көндә вак ташны Арча, Казан, Кукмара районнарына алалар, Кировлылар да вак ташны Арбаш карьерыннан алып китә. Карьерда эшләүчеләр үзләрен аямыйча матур күрсәткечләргә ирешеп хезмәт куялар.

Арбаш карьерында шулай ук кырларның уңдырышлылыгын күтәрү, туфракның ачылыгын киметү йөзеннән, известь җитештерелә һәм ул программа нигезендә хуҗалык басуларына кертелә.