Борнаклылар хезмәте мактауга лаек (+фоторепортаж)

Район авыл хужалыгы һәм азык-төлек идарәсе башлыгы Фирдәвес Нәбиуллин хуҗалык җитәкчеләре һәм баш агрономнар катнашында уздырыла торган көзге чәчүгә багышланган җыелышны шушындый сүзләр белән башлады. «Борнак» хуҗалыгыныӊ ашлык саклау бинасында аягурә барган бу киӊәшмә белгәннәрне тагын бер кабатлау, алдагы елларда җибәрелгән ялгышларны булдырмау юнәлешендә отышлы чара булгандыр. Авыл хуҗалыгы идарәсе белгечләре тәҗрибә аша күрсәткәнчә, бу елда гына орлыкка алынган һәм җир куенына салынган бөртек алдагы елныкына караганда күпкә чигенке күрсәткечләр бирә икән. Яӊа уӊышны чәчү орлыгы итеп чәчкәндә өстәмә чаралар күрергә кирәк, химик һәм биологик эшкәртмәләр кулланмыйча булмый. Хәер, бүгенге көндә аларына кытлык юк, акчаӊ гына булсын. Ә шулай да аларны нәтиҗәле файдалану урындагы белгечләрнеӊ тәҗрибәсеннән тора. 2018 ел уӊышы өчен районда көзге чәчү чорында 8314 гектарда арыш һәм 3737 гектар мәйданда көзге бодай чәчү планлаштырыла. «Сорнай» хуҗалыгы 1335 гектар , «Сосна» хужалыгы 1320 гектар арыш чәчүне кулай, дип тапканнар, «Арбор» һәм «Уӊыш»та арышныӊ мәйданы алдагы хуҗалыкларга караганда ике тапкыр кимрәк булачак. Хуҗалыкларныӊ күбесе «Память Кунакбаева» сортына өстенлек биргәннәр, әмма бары «Татарстан», Тимирязев исемендәге һәм «Маяк», «Смәел», «Дуслык», «Игенче» хуҗалыкларында гына аныӊ элита һәм суперэлита орлыклары тупланган.

Соӊгы елларда көзге бодайга игътибар артты дисәк тә, аныӊ мәйданы җитәрлек дип әйтеп булмый. Тимирязев исемендәге, «Татарстан», «Дуслык», «Игенче» хуҗалыклары 283-250 гектар мәйданны көзге бодай чәчәр өчен әзерлиләр. Хуҗалыкларда соӊгы елларда үзен яхшы аклаган «Льговская-4», «Казанская-560» игелә, әмма аныӊ суперэлита һәм элита орлыкларын һәм күчеш фондын булдыру буенча кимчелекләр елныӊ-елында кабатлана. Әнә бит, «симәнә» белән юнәлешле эшләп, бу елда «Татарстан» хуҗалыгы көзге бодайдан уртача һәр гектардан 68,2 центнер уӊыш алган, «Дуслык» хуҗалыгыныӊ уӊышы да яхшы, һәр гектардан 51 центнер көзге бодай кайтарганнар.

- Бу киӊәшмә көне - районда көзге чәчүне башлау өчен тулы старт бирелгән көн, дип атарга була, аны кыска срокларда һәм нәтиҗәле башкарып чыгу өчен барлык мөмкинлекләр бар, диде җыелышны алып барган район башлыгы Рамил Нотфуллин.

Ахырдан хуҗалык җитәкчеләре һәм белгечләр «Борнак» хуҗалыгы кырларында булып, көзге чәчүнеӊ барышы белән кызыксындылар, Казаннан килгән фәнни-тикшерү үзәге белгечләренә үзләренеӊ сорауларын бирделәр.