Язгы кыр эшләре (фото)

Бүгенге көндә безнең хуҗалыкта тырышып хезмәт куючы һәркемгә рәхмәт сүзләре ирештерәсе килә. Алар һәркайсы үз эшләренең чын осталары. «Т-150» тракторлары белән Илдар Зиатдинов белән Фәрхәт Шиһабетдинов һәм «К-742» тракторы белән Рүзәл Әсхадуллин культиваторлар белән эшлиләр. Чәчүлекләрне тыгызлау эшләрен «МТЗ-82» тракторлары белән 6 һәм 9 метрлы катоклар белән Илдар Галәлетдинов белән Илшат Сәмигуллин башкаралар. Тырмада кечкенә басуларда "МТЗ-82«ләр белән Фәнил Гарифҗанов белән Рафил Әсхәтов эшли. Чәчү комплексы белән «Класс» тракторында Әмир Гарифуллин, «К-744» тракторында Валентин Зыкин хезмәт куялар. Шулай ук «Т-150» тракторында «СЗ 3.6» чәчкече белән Нияз Сәгыйтов һәм «МТЗ-82» тракторы «СЗ 3.6» чәчкече белән Фаяз Нәкыйпов та чәчү эшләрен башкаралар. Тукландыруда икенче елын инде «Туман» агрегаты белән Андрей Кунгурцев эшләде. "КамАЗ"ларда һәм "ГАЗ-53"ләрдә эшләүче шоферлар шулай ук үз вакытында ашламасын да, симәнә-орлыкларны да алып чыгып торалар. "КамАЗ«да — Ришат Гарипов, Ранил Рамазанов, Илфат Нургалиев, «ГАЗ-53» — Рәис Нәҗипов, Дамир Йосыпов, Габдрәфыйк Салихҗанов хезмәт куялар. Шул ук вакытта кадрлар белән проблемалар да бар, бүгенге көндә «К-744», «МТЗ-1221», «МТЗ-84» тракторлары механизаторсыз тора һәм бер «КамАЗ» машинасының шоферы юк.

Хуҗалыгыбызның машина-трактор паркы нык. Яңа агрегатлар алмасак та, узган елгы яңартылган агрегатлар быел басу-кырларга чыгып үзләрен эштә күрсәттеләр. Мәсәлән, культиватор «КС 12» һәм 9 метрлы каток быелгы язгы кыр эшләре вакытында бик әйбәт эшләделәр. Агымдагы елда тырмаларны да яңарттык, хәзер Совет вакытындагы кебек итеп һәрбер тырманы басуга алып чыгып, аерым-аерым җыярга кирәкми, тракторга тагып йөртә торганы белән генә эшлибез. Бүгенге көнгә үзебез эшләгән 9 тырма бар, — дип, хуҗалыктагы эшләр белән таныштырып узды Максим Максимов.

Язгы кыр эшләре вакытында һәрбер шофер-механизатор үзенә йөкләнгән эшне җиренә җиткереп башкарырга тырыша. Чөнки авыл кешесе өчен иң җаваплы чор — елны туйдырырлык көннәр башлана. Җирдә эшләүдән тәм тапкан чын игенче-механизаторлар бу сәгатьләр җитүне алдан ук көтеп ала. Авыр, мәшәкатьле, тузанлы эш булса да, икмәк игүдән, азык-төлек муллыгы булдырудан да игелеклерәк, саваплырак хезмәт табылырмы? Башкарган эшләре уң булсын, һава шартлары уңай килеп, басулардан мул уңыш җыеп алырга язсын.