Татарстан авыл хуҗалыгы һәм азык-төлек министрлыгы быелгы язгы кыр эшләренә багышлап Чепья авылында зона семинары үткәрде

Татарстан авыл хуҗалыгы һәм азык-төлек министрлыгы быелгы язгы кыр эшләренә багышлап безнең район базасында зона семинары үткәрде. Районга 8 районнан хуҗалык җитәкчеләре, игенчелек белгечләре килгән иде. Чепьядагы мәдәният йорты фойесында район кулланучылар җәмгыяте пешекчеләре әзерләгән сыйлы табында чәй эчеп алганнан соң залда семинар-киңәшмәнең теоретик өлеше башланды. Министрлыктан, «Россельхозцентр», «Россельхознадзор», Татарстан авыл хуҗалыгы фәнни тикшеренү институтыннан, «АК Барс» холдинг кампаниясе җәмгыятеннән килгән белгечләр чыгыш ясап сорауларга җаваплар бирделәр. Семинарның практик өлеше «Кама» хуҗалыгы базасында узды. Чәчүгә орлык әзерләү, ашламалар куллану һәм язгы кырда кулланылачак башка мөһим чаралар күрсәтелде.