Өч «КамАЗ»да өч Марат - «Арбор» хуҗалыгында

Бу турыда механизаторларыбыз, терлекчеләр генә түгел, авылныӊ һәр кешесе дә яхшы белә, чөнки хуҗалыкта булса гына күп санлы шәхси терлекләрне кышлатып чыгып була. Бу чорда һәр механизатор үз эшен белеп башкара, ди ул. «КСК-100» агрегатында Газизулла Зиннәтуллин ватылмыйча, азыкныӊ даими кайтуына зур игътибар бирә, алай гына түгел, язгы чәчү вакытында «ДТ-75» тракторында зәб, дым каплатуда нәтиҗәле эшләп, хуҗалык буенча икенче урынны алган. «Полесье»да эшләүче Инсаф Ногманов ике техника хуҗасы, үзенә беркетелгән «МТЗ-80» тракторы белән кушылган һәр эшне җиренә җиткереп башкара. 50 ел штурвал артында булган, бүгенге көндә «Магдон»ны иярләгән Наил Галиев турында укучыларыбыз инде хәбәрдар. Хуҗалыкныӊ «ЗИЛ-130» машинасын 20 елдан артык шофер булып эшләгән Илнур Мортазиннан башка күз алдына китереп булмый, кара төтеннәр чыгарып, зур йөк сыйдырышлы «КамАЗ»лардан калышмаска тырыша ул. Аныӊ белән бергә 2002 елдан армия сафларыннан кайтып, туган авылында шофер булып хезмәт куючы «ГАЗ-53» машинасында Заһидулла Зиннәтуллин да ялны белми терлек азыгы ташый. Хуҗалыкта чәчүдә беренче урынны алган, хәзер дә бар эшне башкарырга әзер торучы Фәнил Гаязетдинов үзенеӊ «МТЗ-1221» тракторында туралган азыкны ташыганда тизлек буенча машиналардан калышмаска тырыша. Шунысы гаҗәп: хуҗалыкныӊ өч «КамАЗ» машинасы белән өч Марат идарә итә. Шофер Марат Таҗиевныӊ тамырлары Арбор авылыннан булса, ике Марат тумышы белән бу яклардан түгелләр. Читтә гаилә корып, тормыш итә башлагач, Арборга кайтып, бу авылны үз иткәннәр. Хуҗалык җитәкчелеге аларныӊ бу адымнарын хуплап, барлык мөмкинлекләр белән булышалар. Шунысы куанычлы, һәр өч Марат гаиләсендә икешәр бала тәрбияләнә. Арбор кызларыныӊ, авылныӊ тарту көче көчле, суы да шифалы диясе килә.

Сенаж салу, печән хәзерләү чорында Илсур Хәбибуллин һәм Камил Сабитов тракторда теземнәрне әйләндереп, аларныӊ тиешенчә кибүен тәэмин итәләр. 38 ел хезмәт стажы булган «МТЗ-1221» тракторында эшләүче Илсур бу елда үзенеӊ 55 яшьлек гомер бәйрәмен билгеләп үтәргә җыена, яхшы эш күрсәткечләре түгәрәк гомер санына үзе бер бүләк. Тракторы артына пресс агрегаты таккан Айрат Мифтаховка, печәннәрне рулонлап, вакытында кайтару йөкләнгән. Басудан бушаганда, Айрат фермада салам турата. Вакланган саламны терлек азыгыныӊ бүген кертелә торганына да, кышка дип әзерләнгәненә дә тиешенчә кушып бирү мөһимлеген монда яхшы беләләр.

Терлек азыгын сыйфатлы итеп салуда «Т-150» тракторларында эшләүче Игорь Кумаев һәм Юрий Тугашев, «Амкодор» белән оста идарә итүче Мөнир Батталовныӊ өлешләре зур. Күрше Чепья һәм Тагашур авылы егетләре хуҗалыкка «ПМК-5» һәм «Водстрой» җәмгыятләрендә эшләгәннән соӊ урнашалар. Монда хезмәт хакы вакытында түләнә һәм күпме аласыӊны да алдан белеп торасыӊ, шуныӊ өчен тиешенчә, намус белән эшләргә тырышабыз, диләр алар. Азыкны хәзерләү бер, ә терлекләргә әрәм-шәрәм итмичә тиешенчә бирү тагын икенче. Бу очракта терлекчеләр «АКМ-9» агрегаты белән азык әзерләп кертүче Илшат Вәлиуллинны бердәм мактап телгә алалар. Үз хезмәттәшләреннән рәхмәт хисләре ишетү үзе бер горурлык, шуныӊ өчен дә Илшатныӊ эше гөрләп бара.

Удар атналыкта арборлылар югары җитештерүчәнлек белән эшли алганнар. Бүгенге көнгә хуҗалыкта 2700 тонна сенаж салынган, 705 тонна печән әзерләнгән. Шәхси хужалык терлекләре өчен 520 тонна печән бирелгән. Беренче кат чабыласы үләннәр бетүгә, соӊга калмыйк, дип берьеллык кузаклы культураларны егып, базга салырга керешкәннәр. Икенче базны борчактан салып, сыйфатлы һәм кыска вакытта тутырырга дип максат куйганнар. Борчакныӊ чыгышы да яхшы, мәйданы да аз түгел - 400 гектарда игелгән, димәк хуҗалык терлекләренә кышка җитәрлек азык тупланачак.