Мөдәрисовлар өчен 45 катнашучы да көндәш булмады (фото)

25-26 октябрь көннәрендә Байлар Сабасында "Хезмәт кешесен данлыйбыз" дигән зур чара булды. Анда Балтач районы данын яклап, "Яңа тормыш" җәмгыятеннән абыйлы-энеле Булат һәм Фәдил Мөдәрисовлар катнашты. Мондый ярышларда алар инде беренче тапкыр гына көч сынамый, тәҗрибәле комбайнчылар бу юлы да җиңүчеләр рәтендә булып, өченче урынга лаек булдылар. 

Булатның хезмәт юлы унбиш ел элек башланып китә, башта әтисе Мансур абыйда комбайнчы ярдәмчесе булып өч ел эшли ул, аннан 2014 елдан бирле үзе комбайн иярли. Энесе Фәдил башта абыйсы белән эшләсә, аннан әтисенең ярдәмчесе була. Быел алар экипажы алдынгы булып, вымпелга да ия булды. Киләчәктә Фәдил үзе дә комбайнчы булып, Мөдәрисовлар нәселенең лаеклы дәвамчысы булыр.

Егетләрне җиңүләре белән РТ Авыл хуҗалыгы һәм азык-төлек министры Марат Җәббаров үзе котлады һәм акчалата бүләк тапшырды. Шулай ук Булат республика профсоюзының Мактау таныклыгына да лаек була.