Октябрь аенда Татарстанда кош гриппы очраклары теркәлде

Октябрь аенда Буа, Чүпрәле, Мөслим районнарында кош гриппы очраклары теркәлде.  

Әмма, 7 октябрьдә Буа районынын „Хәйруллин“ фермер хуҗалыгында кош гриппы теркәлде. Инфекция чыганагы булып Чувашия Республикасыннан ветеринария документларыннан башка кертелгән авыру үрдәкләр торуы ачыкланды. 1000 башка якын каз һәм  117 үрдәк юк ителде. Документларсыз, очсызгарак алынган кошлар аркасында хуҗалык керемен югалтты.

20 октябрьдә Мөслим һәм Чүпрәле районнарында да кош гриппы булуы билеге булды. Бу очракта кошларның табигый сулыкта инфекция йоктырулары  ачыкланды. Сулыкларда кыргый су кошлары да яшәгән булган. Кыргый кошлар үзләре сирәк авырый, әмма алар кош гриппын тарату чыганагы булып торалар.

Йорт кошларын грипптан саклау өчен авыл халкына берничә киңәш: беренчедән, кошларны урамга чыгармыйча торырга хэм башка кошлар белән кушылуларыннан сакларга кирәк; икенчедән, кошлар инде үсеп җитү сәбәпле, озакка сузмый каз өмәләре оештырылса бик яхшы булыр иде. Россия һәм Татарстан буйлап кош гриппы йөргәндә, аны ветеринария хезмәткәрләре генә туктатып кала алмый, чөнки чир кыргый кошлардан да иярергә мөмкин.  

Татарстанда кош-кортларны алып сату белән шөгыльләнүче эшмәкәрләр бик күп. Кубесе ветеринарлар белән тыгыз элемтәдә торсалар да, арада төрлесе була. Теләсә нинди терлек яки кош-корт сатып алганда, аларның каян булуын сорарга һәм тиешле документларын таләп итәргә кирәк. Алданмас өчен сатучының исем-фамилиясен, машина номерын һәм телефон номерын язып алсагызда зыян итмәс.

Латыпов И.И.

Саба территориаль бүлеге

баш даүләт ветеринар инспекторы.

Фото: buinsk-tat.ru