Озак та үтмәс, «Якты юл»да савым залы булачак!» (фото)

Быел 200 баш терлек өчен бинаны әзерлибез, икенче елга тагы шундый ук күләмдә эш башкарылачак. Уртада урнашкан азык цехын савым залы итәргә планлаштырабыз. Бу эшләрне ничек булса да икенче елга төгәлләргә кирәк. Бу зур чыгымнар сораган эшкә тотынуныӊ берничә сәбәбе бар: беренчедән, яӊа технологияләр буенча савым сыерларын бәйдә тоту каралмый, димәк, савымны яӊача оештыру сорала. Икенчедән, терлекчеләрнеӊ эш шартларын яхшырту мәсьәләсе көн үзәгендә. Өченчедән, алдагы берничә елда терлекчелек өлкәсендә 60 тан артык эшчебез лаеклы ялга чыгу яшенә җитә. Димәк, эш урыннарында хезмәтне оештыруны яӊача тәэмин итәргә тиешбез. Башка эшләребез дә күп һәм аларныӊ һәркайсы күләмле акча сорый.

Күӊелле булмаса да, Пенсия фондына әҗәтлеләр исемлегенә кердек. Шушы бер, бер ай ярымда бу авырлык артта калыр, дип уйлыйм. Киткән чыгымнар да шактый булды, сатып ала торган тимер эшләнмәләр, торбаларга, түбә калайларына бер-бер алганда да 1әр миллион сум акча күчерергә туры килде. Техника паркын яӊарту максатыннан барлык җайланмалары белән 1 миллион 300 меӊ сумга КУН тракторы, 1 миллион 400 меӊ сумга дизель двигателе белән «Газ-53» машинасы, 600 меӊ сумнан артык амбар хуҗалыгы өчен орлык чистарту һәм калибрлау техникасы алынды һәм башка кирәк-яракларга да күп тотылды. Хуҗалык итү елында бернинди дә кредит алмаска, дип килешкән идек, бу үтәлә һәм, әйткәнемчә, Пенсия фондына түләп бетерсәк, бар да җайланыр, дип уйлыйм».