Саламнан ашлама «ясаучы» Раил (+фоторепортаж)

Баксаӊ, «Полесье» маркалы терлек азыгы әзерләүче агрегат белән Раил Зиннәтуллин комбайннан чыккан борчак саламын ваклап, төрле якка сиптереп, җиргә ашлама итеп әзерләп кертә икән. Минераль ашламалар үтә кыйммәт чорда бу алым үз-үзен тулысынча аклый, көзге чәчүгә дә җирне вакытында әзерләргә мөмкинлек тудыра.

Бу урып-җыю чорында «Якты юл»лылыр бар эшне тигез алып барырга тырышалар. Игеннәр сугылган мәйдан 2-3 көн эчендә көзге чәчүгә әзерләнә. Бу эш быел киеренке булачак. Җирне ике кат эшкәртү таләп ителә. Көзге чәчүгә 500 гектар җир әзерләргә кирәк, ди хуҗалыкныӊ баш агрономы Зөлкәфир Нәҗипов. Заманында бригадир, орлыкчылык буенча белгеч, икътисадчы булып эшләве механизаторлар белән аралашканда нык сизелә.

Хәзерләнгән җирнеӊ яртысына арыш, яртысына көзге бодай чәчәргә уйлыйлар. Узган көздә күбрәк чәчмичә ялгышканнарын бик сиздерәселәре килмәсә дә, быел көзге культураларныӊ мул уӊыш бирүләрен күргәч, бераз үкенеч бар бугай. Күпьеллык үлән басуларын яӊарту тиешенчә бара, 5-6 ел буе файдаланган мондый мәйданнарны сукалап, «К-700» тракторында Нуретдин Гайсин, «Т-150» тракторында Илдар Вафин җирләрне яӊа чәчүгә әзерлиләр. Күмәк хуҗалыкта Рафыйк Гамбәров, Илдар Вафин, Илдар Һадиев, Илнур Мәгъсүмҗанов, Әлтәф Нәҗипов кебек дип булсынга эшләүче тракторичы-механизаторлар булганда, әлеге хуҗалыкта бу җаваплы чорныӊ бурычлары тиешенчә үтәлүенә ышаныч зур.