Шәхси эшмәкәр Алмаз Гыйләҗев нинди планнар белән яши?

Куныр авылында шәхси эшмәкәр Алмаз Гыйләҗевның үз терлек сугым урыны бар. Шәхси һәм күмәк хуҗалыклардан килгән терлекне суеп эшкәртәләр.

Эшмәкәкәр белдерүенчә, көнгә 20шәр баш терлек суярга мөмкинлекләре бар. Күптән түгел Куныр авылы уртасында урнашкан бинаны арендага алып, үзләренең цехларын да ачып җибәргәннәр. Анда казылык, ике төрле колбаса, сосискалар, тутырмалар әзерлиләр.

Алай гына да түгел,  бүгенге көндә Биектауда кибет тә ачканнар.

Киләчәккә планнары зурдан Алмазның: «Иң элек сугым үзәге янында җитештерүнең барлык этапларын үз эченә алган производство бинасын төзүне күзаллыйбыз. Сугым үзәгенә газ кертелде. Утларны яңартырга мөмкинлек булды. Биредә рәсмиләштергән җиребез бар. Шунда ныклап урнашырга һәм дәүләттән ярдәм алып, эшебезне җәелдерергә уйлыйбыз».