Сөт чишмәсе кышын саекмасын

Сөт җитештерү районның, хуҗалыкларның икътисадын тотрыклы итүдә иң мөһим тармак, шунлыктан бу мәсьәлә көн үзәгендә тора. Елның унбер аенда район күмәк хуҗалыкларында (шәхси хуҗалыклардан тыш) барлыгы 104445 тонна сөт җитештерелгән. Узган елның шул чоры белән чагыштырганда бу 9810 тоннага артык. Иң күп сөт «Кызыл юл» һәм «Татарстан»да – 10691-10023 тонна савылган. «Дуслык», Тимирязев исемендәге һәм «Игенче»  хуҗалыкларында   бу юнәлештә нәтиҗәле эшлиләр, аларда бу чорда 7108-6660- тонна сөт җитештерелгән. Алдагы ел белән чагыштырганда иң зур үсеш «Игенче», «Кама» һәм «Сосна» хуҗалыкларында – ул 33-19  процент тәшкил итә. Районның  бары бер хуҗалыгы – Тукай исемендәге хуҗалык кына алдагы елның шушы чоры белән чагыштырганда начар эшләде, бары 2358 тонна сөт җитештерелде. Болай да булмаган сөтнең күләме 165 тоннага кимегән. Бу аяныч хәлнең сәбәпләрен кабат-кабат язудан хәзер берни дә үзгәрмәгәне көн кебек ачык.