Билгеле, республикада иң күп сөт җитештерүче районнарның берсе буларак, иң зур югалтулар да бездә булды. Шушы шартларда да район җитәкчелеге күмәк хуҗалыклар алдына терлекләрнең баш санын киметмичә, һич югы, сөтнең күләмен бүгенге күләмдә саклау бурычын куя.

Бүгенге көндә район буенча 209 тонна сөт җитештерелә, май аенда бераз чигенеш күзәтелсә дә (кызганычка, сыерларга бирелә торган өстәмәләрнең бәяләре артты, сөткә бәя кимегәч, хуҗалыклар да өстәмәләрнең күләмен киметергә мәҗбүр булды – ә бүген элекке кебек башак-печән ашатып кына мул сөт җитештереп булмый), әлегә хәл төзәтеп булмаслык түгел. Резервлар да бар: бердән, яшел масса ашата башлагач, сөт артыр дип көтелсә, икенчедән, әле хуҗалыклар арасында күрсәткечләр шактый чуар булып кала бирә. “Татарстан” хуҗалыгы бүгенге көндә 17-18,5 тонна көндәлек сөт сатканда, әле 7 тонна сөт белән дә канәгать булучылар бар.

– Бүген без сөткә бәя кимеде дип зарланышсак та, Татарстан хөкүмәте күмәк хуҗалыкларга әлеге аерманы кире кайтару ниятеннән быелның беренче яртыеллыгында сатылган сөтнең бер килограммы өчен өч сум исәбеннән субсидия бирү турында карар кабул итте. Исәпләп карасаң, әлеге бюджет ярдәмен кушкач, безнең югалтулар алдагы елның шул чоры белән чагыштырганда бер килограмм сөткә илле тиенләп кенә кала. Әйтик, үткән ел хуҗалыклар бу вакытта сөтне 20 сум 52 тиеннән сатса, быел ул 17 сум 20 тиен. Бу санга өч сум хөкүмәт ярдәмен кушсаң, 32 тиен минус күренә. Шуңа күрә барлык хуҗалыклар да бу мөмкинлектән файдаланып калырга тиеш. Сатылган сөте күп булмаган кеше күп акчага өметләнә дә алмый бит, – ди район башлыгы Рамил Нотфуллин.

Хуҗалык җитәкчеләре, белгечләре дә, үз күрсәткечләрен, мөмкинлекләрен анализлап, тиешле карар кабул итәргә бурычлы. “Җиләк вакыты бер генә” дигәндәй, сөт вакыты да бер генә. Һәм махсус дәүләт ярдәме дә конкрет бер чорны күздә тота.

Күрсәткечләр 25 майга.