Терлекчелектәге эшләргә нәтиҗә ясау өчен «Маяк» җәмгыяте базасына җыелдылар

Узган дүрт айлык эш буенча сөйләшү өчен «Маяк» җәмгыяте базасына җыелдылар. Бозаулату бүлегендәге, яшь бозаулар, таналар, сыерлар асралган торакларда, кардаларда булып, маяклыларның эш тәҗрибәсе белән таныштылар, үзләренеке белән чагыштырдылар, өйрәнәсен өйрәнделәр, киңәшләр бирделәр. Бер уңайдан атлар абзарына да кереп чыктылар. Район башлыгы Рамил Нотфуллин барлык җитәкчеләрне дә атларга игътибарның җитәрлек булмавын искәртте. Монда да абзардагы урта юл җимерек, пычрак. Соңыннан авылдагы мәдәният йортында узган киңәшмәдә дә атлар мәсьәләсе аерым күтәрелде. Алда торган Сабантуйларга һәр хуҗалыктан чабышкылар әзерләү бурычы да куелды. Дүрт айда сөт җитештереп сатуда нәтиҗәләр начар түгел. Киңәшмәдә бу сводка белән экраннан күрсәтелде. Саннарда быел 1 майга ел башындагы бер мөгезле эре терлеккә савылган сөт (килограммнарда).

Калган хуҗалыкларда бу күрсәткеч уртача районныкыннан түбән. Иң артта - 402 килограмм белән «Борнак» хуҗалыгы.

Район башлыгы киңәшмәдә симертү терлекләреннән артымның ни өчен түбән булуын ачыкларга һәм бу өлкәдә эшне яхшырту өчен конкрет чаралар күрергә кушты. Симертүдәге үгездән тәүлек саен 800 граммнан да ким артым алынырга тиеш түгел. Ә узган дүрт айда ул район буенча уртача 656 грамм гына булган.

Саннарда - быел 1 майга һәр үгездән алынган тәүлеклек артым (граммнарда).

Калган хуҗалыкларга киңәшмәдә бурыч итеп куелган артымны алу өчен нык тырышырга кирәк әле. Иң түбән күрсәткеч «Труд», «Смәел», «Уңыш» җәмгыятьләрендә, нибары 513-545 грамм.

Киңәшмәдә мөгезле эре терлекләрнең баш санын арттыру да иң җитди бурычларның берсе дип күрсәтелде. Бүгенге исәпләүләр буенча быел сыерлардан планлаштырылган дәрәҗәдә бозау алынмаска мөмкин. Сыерларны, бигрәк тә таналарны вакытында каплатуны тәэмин итү, бозаулар үлемен киметү буенча көндәлек җитди эшләргә кирәк. Көтү яңартуга сыерларның үле бозау тудыру очраклары арту да зур зыян сала. Район башлыгы Рамил Нотфуллин авыл хуҗалыгы һәм азык-төлек идарәсе белгечләренә, хуҗалык җитәкчеләренә терлекчелек белән көндәлек шөгыльләнергә кушып конкрет күрсәтмәләр бирде. Һәм азактан кыр эшләре барышын анализлап, сабан культуралары чәчүне 20нче майдан да соңга калмый төгәлләүне максат итеп эш оештырырга кушылды.