Сөт җитештерүдә чигенмәскә иде инде

Мәсәлән, 5 сентябрьдә алынган мәгълүматлар буенча, алдагы тәүлектә 191,1 тонна сөт савылган. Бу бер сыерга 18,3 килограмм туры килә дигән сүз. Әлбәттә, бу да начар күрсәткеч түгел, чөнки узган елның шушы көне белән чагыштырганда, савылган сөтнең күләме былтыргыдан 19 тоннага артык, ә бер сыер уртача 16, 7 килограмм сөт биргән. Тик шулай да мөмкинлекләр тиешенчә файдаланылмый дип нәтиҗә ясарга җирлек бар.

"Хуҗалыкларда сөт җитештерүдә саннар һәрдаим үзгәреп, уйнап тора. Бүгенге көндә сөтнең майлылыгы да 3, 52 %ны гына тәшкил итә. Тотрыклылыкка, сөтнең күләмен һәм сыйфатын арттыруга ирешү өчен беренче чиратта - терлек азыгының туклыклылыгына игътибар итәргә кирәк. Моның өчен яшел масса ашатудан кышкы рационга күчү сорала. Лабораторияләрдә сыйфаты һәм составы тикшерелгән, өстәмә кушылмалар белән балансланган азык, быел салынган сенаж, рапс культурасыннан әзерләнгән, мае сыгып чыгарганнан соң калган түп (икенче төрле аны терлекчелектә жмых диләр) бирә башлау - үз чиратында сөтнең күләмен һәм майлылылын һичшиксез арттыра.

Шул ук вакытта районда хуҗалыклар арасында сөт саву күләмен арттыруга ирешкәнәре дә бар. Менә алар - "Кызыл юл" узган елның шушы чоры белән чагыштырганда 1784 килограммга, "Труд" - 1845 кг.га, "Сосна" - 1856 кг.га, "Яңа тормыш" - 2318 кг.га, Тимирязев исемендәге хуҗалык - 2335 кг.ка, "Татарстан" 4040 кг.га артык сөт савып алган. Димәк, урыннарда барлык мөмкинлекләрне файдаланганда ирешелгән уӊышларны саклап калырга була. Алар үрнәгендә эшне оештыра белергә генә кирәк!", ди авыл хуҗалыгы идарәсенең терлекчелек бүлеге белгечләре.