Сыер сөте белән, кеше эше белән...

2025 елны әле генә башлаган идек, шул арада аның бишенче ае узып та бара. Районда терлекчелек өлкәсендә елның беренче дүрт аендагы уңай үзгәрешләр, шул ук вакытта терлекчелек тармагындагы эшләр торышы турында район утырышлар залында хуҗалык җитәкчеләре, җаваплы белгечләр катнашында киңәшмәдә зур сөйләшү булды.

Сөт җитештерү районның, хуҗалыкларның икътисадын тотрыклы итүдә иң мөһим тармак икәнен даими рәвештә искә алабыз. Бу шулай булырга тиешлеген һәркем белә: сөт — көндәлек акча кереме, ә акчасыз хуҗалыкны алга алып барып булмый.

Агымдагы елның дүрт аенда күмәк хуҗалыкларда (шәхси хуҗалыклардан тыш) барлыгы 47 684 тонна сөт җитештерелде. Узган елның шул чоры белән чагыштырганда бу 1825 тоннага артык. Үсеш — 4 процент. Иң күп сөт «Татарстан» һәм «Кызыл юл» хуҗалыкларында, аларда — 6125-4336 тонна сөт савылган. «Сосна», «Кама», Тимирязев исемендәге һәм «Дуслык» хуҗалыклары бу юнәлештә нәтиҗәле эшлиләр. Шул ук вакытта районның 5 хуҗалыгы алдагы елның шушы чоры белән чагыштырганда сөтне кимрәк җитештерәләр.

Киңәшмәне алып барган район башлыгы Рамил Нотфуллин җитәкчеләрнең игътибарын савым сыерларга мул продукция бирер өчен шартлар булдыру белән бергә, бозау алу мәсьәләсенә игьтибар бирүләренә басым ясап әйтте. Ә моңа җирлек бар: агымдагы елның дүрт аенда бозау алу буенча 19 хуҗалыкның 11е алдагы елга караганда начар эшләде. "Яңа тормыш"та — 101, "Сорнай"да — 99, "Маяк«та 93 баш бозау ким алынды. Район башлыгы әйткәнчә, сыер бит сөтне бозавы өчен бирә, кысыр калган сыердан мул сөт булмаячак. Ә бу үз чиратында казнага кермәгән акча, дигән сүз.

Акча дигәннән, терлек-челектә аны да алып бетермибез икән әле. 2025 елның дүрт аенда алдагы елның шушы чоры белән чагыштырганда азрак сөт һәм ит җитештергәннән хуҗалыкларга 29 миллион 131 мең сум акча ким кергән.

«Алга» — 11 миллион 486 мең сум, «Маяк» — 7 миллион 912 мең, «Игенче» — 3 миллион 789 мең, Тимирязев исемендәге хуҗалык — 1 миллион 623 мең, «Кызыл юл» — 1 миллион 603 мең сум, «Сорнай» — 1 миллион 179 мең, «Борнак» — 788 мең, «Бөрбаш» — 751 мең сум керемне алып бетермәгәннәр. Димәк, һәр өлкәдә эшебезне җиренә җиткереп эшләү сорала.

1 майга күмәк хуҗалыкларда җитештерелгән сөт күләме

Мәгълүмат район авыл хуҗалыгы һәм азык-төлек идарәсеннән алынды.