14 толшоре Россиысь Геройлы Олег Исаевлы 56 арес тырмысал

Олег Исаев сярысь та школаысь котькуд дышетскись тодэ, тодэ солэн батырлыкез но ӟеч ужез сярысь. Героез ярато, сое тодазы возё но соин данъясько. Туэ но, Олег Николаевичлы сӥзьыса, 14 толшоре школаын сиё-дано митинг ортчытӥзы, мемориальной пул доры сяська понӥзы.

Озьы ик лётчик-истребителез, майор Исаевез буре ваёнлы спорт ужрадъёс но сӥземын вал (волейбол но куасэн бызьылон). Котьку кадь ик туэ но куспазы ӵошатскизы Шор Кушкет, Ципья, Тюнтер но Покчи Лӧзя школаосысь дышетскисьёс. Нош валтӥсь куноос Олег Исаевлэн анай-атаез луизы — Николай Степанович но Вера Петровна.

— Гажано нылпиос, сӥзисько тӥледлы ӟеч дышетскыны. Сӥзисько азьпалан гажамон адями, шаермылэн геройёсыз луыны. Нош валтӥсез — со вадьсамы чылкыт но каньыл инбам, — ас мылкыд каронъёссэ вераз Николай Степанович.

Туэ ужрадын луизы: А.Ю. Шагаева, районысь исполнительной комитетлэн дышетонъя управлениезлэн кивалтӥсез; В.Н. Валиев, Балтась районысь военной комиссар; Шор Кушкет гурт поселенилэн главаез Ю.М. Перфилов; Арча педагогической колледжысь куноос, Олег Исаевен ӵош дышетскем муртъёс но мукет куноос. Уно шуныт кылъёс верамын Николай Степановичлы но Вера Петровналы, сыӵе героез будэтэмзы но визьнодамзы понна, озьы ик школалы но, сокем кулэ луись ужрадэз арлы быдэ ортчытэмзы понна.

— Туннэ, 14 толшоре асьмеос Героймес буре вайиськомы но со азьын йыбырттӥськомы. Ялан кыдёкегес но кыдёкегес кылё ортчем аръёсы луэм событиос, но Геройлэн ужез улыны кулэ асьмелэн сюлэмъёсамы, утиськыны будӥсь поколенилэн мылкыдъёсазы. Дано улыны быгатон понна асьмеос тодыны кулэ историез. Гажаны кулэ со муртъёсты, кудъёссэ дано карыса Герой шуыны луэ. Со тодэ ваёнъёс тужгес кулэ луисесь но дуноесь. Чебер веранлы пӧрмизы таӵе кылъёс: герой луыса уг вордӥсько, герой улыса луо. Геройлэн улонэз пумтэм. Асьме пӧлын со ялан улэп луэ... Сӥзисько тӥледлы, Николай Степанович но Вера Петровна, шудбур, тазалык но кема аръёс улыны, — таӵе кылъёсты вераз школалэн директорез Константин Грахов. Олег Николаевич туж егитэн улонысь кошкиз. Но балтась калык сое ялан тодаз возе. Со аслэсьтыз кулонзэ кышкатэк, зэмос воргорон кадь пумитаз. Солэн ӟеч ужез будӥсь поколение понна пыраклы батырлыклэн адӟем карымон примерез луыса кылёз.

Наталья Жукова