21-тӥ тулыспалэ быдэс дуннеын Анай кыллэсь нуналзэ пусъё

Кыл — вераськон, ог-огеныд кусып возён амал гинэ ӧвӧл, солэн кулэлыкез трослы паськытгес. Кыл асьмелэсь дунневаланмес, улон шоры учконмес шарая, ортчемзэ туалаеныз, вуоноеныз юн нюжаосын герӟаса возьматэ. Анай кыл сярысь ке верано, со котькуд адямилэн улоназ вордскемез дырысен нимысьтыз пытьы кельтэ. Озьы бере, улон шоры учкон но аспӧртэмлыко луэ.

Аспалъёсмылэн анай кыл сярысь гожтэм но берыктэм кылбуръёссы:

Николай Никифоров

 «Тон куинь кылэз шат тодӥськод?

Кыӵе умой! Вожъяськисько!

Секыт-а вал дышетскыны?

Кудзэ тужгес но гажаськод?»

«Эше, малы бен юаськод,

Куиньзэ но сюлмысь гажасько!»

«Анай!» — вази мон удмурт кылын,

Бигер гуртын вордӥськемын,

Ӟуч калыкен ӵош будэмын.

Василий Никитинлэн берыктэм кылбуръёсыз

Вордӥськем кылыным кырӟало ошмесъёс,
Вордӥськем кылыным шаугето нюлэсъёс.
Вордӥськем кылыным ке гинэ вазисько,
Вордӥськем музъеме но монэ ӟеч вала. (Разиль Валиев)

Анай кылын кырӟанмы ( На родном языке наши песни)
Одӥг вордскем музъеммы,
Шунды кадь ик кадырлы.
Вордскем палан кырӟанъёсмы
Кылдылэмын даурлы.
Анай кылын кырӟанмы
Кыӵе шулдыр крезьгуро!
Кырӟаломы, эктом ваньмы,
Улон медло шудбуро!
Дунне пачыл тылсиен,
Бурдо кырӟа вылӥын.
Вордскем музъем, вордскем кылмы
Матын, мусо сюлмамы.
Сайкыт медло инбаммы –
Яркыт пиштоз шундымы.
Дуно вордскем шаерамы
Каньыл медло улонмы!

ВОРДСКЕМ КЫЛ (Габдулла Тукай)

О, вордскем кыл, о чебер кыл — анай-атайлэн кылыз!
Дуннеысь трос мар ке тодӥ, тон, вордскем кыл, вань вылысь.

Та кылын шып кырӟаса ук кӧкыын анай веттам,
Песяйлэсь выжыкылзэ нош кылзылӥ котькуд ӝытэ.

О, вордскем кыл! Шӧдӥсько мон улонын ӟеч юрттэттэ,
Туж матын но валамон тон — шумпотон, йырвисетэ.

О вордскем кыл! Тон сямен мон нырысьсэ лыдӟи вӧсьме:
«Огнаме монэ эн кельты, уть анайме-атайме!»

Татьяна Анисимова

Кырӟасько ас кылыным

Дуннеын трос пӧртэм калыкъёс,

Ваньмызлэн ик аслаз вань кылыз.

Выжызэс гажало туж соос.

Мона чим нош — удмурт выжыысь.

Нёжъясько-а кырӟан каньылля —

Чузъяське со анай кылыным,

Я кылбур малпасько куддыръя —

Вордӥське со удмурт чуръёсын.

Ӵем дыръя кылӥсько верамез:

Туж ӧжыт валасез удмуртэз,

Кытчы ке шат вуод со кылын?

Вераськод но соин бен кинэн?»

Паймемлэсь но золгес паймисько,

Соин ик ваньмызлы верасько:

Калыктэ но кылдэ ке гажад,

Эшъёсыд луозы трос тынад.