Акашка ― удмуртъёслэн ӟуч вӧсе пыремзылэсь азьло кылдэм вашкала вӧсьсы но юмшанзы

Сое туж вите пичиез но, бадӟымез но. Дасяськыны кутско та Бадӟым праздниклы азьвыл ик. Мисько корка, Пучыарняе — ваё пучы, Кулэмпотон уе (ведин уе) сусыпу вайъёсты ваё, ӧсъёсы-укноосы бурен суредало киросъёс. Собере ни курегпуз буяса дасяло, кулич пыжо, пасха лэсьто, оброс азе одно ик поно сяськаосын чебермам лыс вайёс, озьы ик соосты поно ӧс выжые но. Субботае ӝытаз мыно черке.

Тани вуэ Акашка нунал. Ӵукна ик нылпиос ветло гурт кузя, курегпуз люкаса. Котькуд корка йыгаськыса, «Христос Воскресе!» шуо, нош соосыз кузёос «Воистину Воскрес!» шуыса пумитало. Туж шумпотымон, али дыре, гурт нылпиос гинэ ӧвӧл, бускель бигер гуртъёсысь но нылпиос шумпотыса вуыло дорамы курегпуз люканы. Ваньзы та нуналэ шумпото, угось шудо нунал.

Анайёс ӝытлы куноосты кунояны дасясько, пыжисько. Собере ӝыт выжыоссыя ветло, жаляса верано, та йылол вань семьяосын ӧвӧл ни. Нырысетӥ корка васькиськом уллапала, ву васькемъя, пе, ветлоно. Озьы коркасен-корка тубиськом выллапала.

Нылпиос курезпуз люкаса бертэмзы бере, азьло аръёсы сямен ик, туэ но Ярак-Чурма гуртын нылпиослы шудонъёс ортчытэмын вал. Куазь кезьыт луиз ке но, шудонъёс ортчизы шуныт атмосфераын. 

Нырысь ик нылпиос тодматскизы Акашка праздниклэн кылдэменыз. Ӵектэмын вал викторина, нылпиос вань юанъёслы ӝог но шонер ответ сётъязы. Берло тодамы вайимы, кызьы вазиськоно Акашка нуналэ пумиськыку, кыче нуналэ Иисус Христос улӟем. Та но мукет юанъёслы нылпиос, шумпотымон, шонер ответъёс сётъязы. 

Кутским собере шудыны. Одӥгаз шудонын («Бой крашенками») курегпузъёсын «жугиськыса» эскеримы кинлэн курегпузэс юнгес, мукетаз эскеримы, кинлэн кыдёкегес питыраса васькоз пичи гурезьтӥ, кинлэн кыдёкегес. 2 командалы люкиськыса, пуньыен курегпузэн бызьылонъя эстафета но ортчытӥмы но мукет. Оскисько, нылпиослы шудонъёс кельшизы, дыр, шуыса. Нош ӝыт со ик шудонъёс ортчытэмын вал 8-11-тӥ классъёсын дышетскисьёс но студент егитъёс понна но.

Мария Матвеева
Ярак-Чурма гурт библиотекалэн кивалтӥсез