Алексей Васильев: «Нылъёсы улыны кужым сёто»

Туэ Россиын 17-тӥ коньывуонэ нырысетӥзэ Атайлэсь нуналзэ пусъёзы. Та праздникез ми палэнтӥ ортчыны ӧм быгатэ. Ёросамы адӟем карымон атайёс ӧжыт ӧвӧл ке но, Карек-Серма гуртысь Алексей Васильевез быръёно каримы. Алексей Михайлович — кужмо но чидась воргорон, нылпиосыз понна зэмос атай луэмзэ со трос пол юнматӥз ини. Соин лыдӟисьёсты та воргоронэн матысенгес тодматэммы потӥз.

Алексей Михайлович Васильев 1968-тӥ арын Карек-Серма гуртын вордскемын. Пичи дырыз но, егит дырыз но тросэзлэн огъёзоосызлэн выллем ортче — школа, армия, дышетсконзэ азьланьтон, яратоно нылыныз семья кылдытон…

— Городэ кошкыны малпанъёсы ӧз луэ ноку но. Савалиын дышетскыса агрономлэсь ӧнерзэ басьтӥ но, армиын служить карыса, вордскем палъёсам бертӥ.  Бабае верам вал мыным, та юртэ тон кузё кылёд шуыса. Соин татчы кыли, — шуэ Алексей Михайлович. — Ужан сюресме 1988-тӥ арысен колхозысен кутски, кӧня ке дыр ӵоже отын пӧртэм арбериосты, товаръёсты нуллыса ужай. Собере Карек-Серма гуртысь ош фермаын заведующий луыса тырши. Ӵапак со дыре ик кузпалъяськи но.

Алексей агай семья вазь кылдытэ, колхозын ужан аръёсаз. Соку солы 20 арес луэ. Кузпалэз Сизнер гуртысь Байманова Наталья нимо егит ныл луэ. Со дыре Ижкарын ужась нылмурт, Алексей сое лушкаса ваем бере, вордскем палъёсаз бертыса, Карек-Сермаысь медпунктэ санитарка луыса ужаны интыяське. Берлогес, сокращение улсэ шедем бере, фермае кунянъёсты сюдыны ужаны интыяське.

Ог-огзэсты гажаса, яратыса улӥсь Васильевъёслэн семьяязы куинь нылъёссы вордско — Людмила, Мария но Диана. Егит семья нылъёссылы шумпотыса, трос нылпиё анай но атай луэмзылы пальпотыса улон вакытэ семьялы туж секыт адӟон пыр  потоно луэ — Наталья Васильевалэн улонэз шӧдтэк шорысь куспетӥ луэ. 

— Трос аръёс ортчизы ке но, та сярысь вераськыны мыным секыт. Но озьы гожтэм, дыр, Наташа та улонысь вазь кошкиз. Куинь нылъёсмы анайтэк кылизы. Самой покчиезлы, Дианалы, соку одӥг арес но ньыль толэзь гинэ вал, — тодаз вае Алексей агай секыт 2003-тӥ арез. 

Наталья Васильева котьку пӧртэм концертъёсын гуртысьтыз коллективен выступать карыса ветлыны яратэм. Кыӵе гинэ фестивальёс, конкурсъёс, смотръёс ӧз ортчылэ — со котьку отчы мыло-кыдо пыриськем. Одӥгаз сыӵе Балтасьын ортчись лулчеберето ужрадын Наталья апайлэн улонэз куспетӥ луэ.

Со нуналысен Алексей Михайловичлэн улонэз чылкак воштӥське — табере солэн вӧзаз ӧвӧл ни яратоно кузпалэз, оскымон эшез, нылпиосызлэн анайзы… Выль улонлы Алексей агайлы дышыны туж секыт луэ. Но, куинь нылъёсыз азьын бадӟым кылкутонзэ шӧдыса, воргорон ассэ кияз кутэ но нылъёсыз понна улонзэ азинтэ. 

— Нырысь туж секыт вал. Балтасе лыктэмлы быдэ, сюлмы вӧсь луиз. Зэм ик-а мон огнам нылъёсыным кыли шуыса малпасько вал лыктэмелы быдэ, оскытэк, — мылкыдъёссэ ватытэк маде Алексей Михайлович. 

Секыт дыръёсазы Васильевъёслы ӵыжы-выжыосыз но, гуртоосыз но, матысьёсыз но юрттыны тыршо. Ёросысь кивалтэт но нылпиоссэ оген будэтӥсь атайлы юрттэм.

— Секыт дыръёсы юрттӥсьёсы трос луизы, соиз шумпотымон. Трос адями кылын но, ужын но юрттӥз. Диана пичи вал бере, тросэз пичи нылпиос кадь, висьылӥз. Бускельын улӥсь Дуня апай туж юрттӥз со дыре. Мынам ведь больницаын кыллеме ӧз луы — пудоосы вань вал, хозяйствое. Варманае но ӵем лыктылӥз, мукет ӵыжы-выжыосы но. Ваньзылы юрттэм адямиослы шуныт таукаронъёсме вуттэме потэ, — шуэ воргорон.

Алексей Михайловичлы нылъёсызлы атайзэс но, анайзэс но, песяйзэс но, бабайзэс но воштыны тупа. Ӝожтӥськытэк, шуг-секытъёслы сётскытэк, со улонзэ каллен азьланьтэ, нылъёсызлэн ваньмыз мед луоз шуыса тырше, трос ужа, пудо вордэ. Зэмзэ вераны кулэ, нылъёсыз но атайзэс туж гажаса, яратыса будӥзы, куиньназы но адӟем карымон нылъёс луизы, атайзэс возьытэ ӧз уськытэ. Алексей Михайлович куинь нылъёсыныз ик туж данъяське. 

— Людалы но Машалы вазь бадӟым будыны тупаз. Дианаез соос будэтӥзы шуыны луэ. Бен, мон котьку вӧзазы вал. Шуом, магазинысь дӥськут басьтоно ке, мон соосты машинаен нуисько но соос асьсэос кулэ луись арбериоссэ бырйыло вал. Али но озьы ик. Мон пиосмурт бере, сыӵе нылкышно ужъёс ласянь юрттыны ӧй быгаты ни нылъёсылы. Но соос котьку куспазы эшлыко, тупаса улӥзы, соин сыӵе ужъёсты монтэк но туж умой быдэсъяллязы. Солы туж шумпотӥсько. Люда самой бадӟымез бере, кык сузэръёсыз понна но кылкутонзэ шӧдылӥз. Со сузэръёсызлы анайзэ воштӥз шуыны луэ. Маша тросгес Дианаен вал, сузэрзэ но садике со нуллӥз. Аслаз дышетсконэз сярысь но ӧз вунэты. Урокъёсты но валче ужазы, быгатэмея мон но юрттӥ. Шумпотыса вераны быгатӥсько, нылъёсы тодон-валан басьтӥзы шуыса (Люда но Маша Арчаысь педагогикая колледжез йылпумъязы, вылӥ тодон-валанзы но вань ини, туннэ нуналлы кыкназы но ас семьяоссэс кылдытӥзы; Диана нылы Казаньысь медициная кун университетысь студент, врачебно-сестринской отделениын дышетске) — нылъёсыныз данъяськыса вера атайзы. — Алигес Люда нылы Казаньын удмурт визьнодасьёслэн конкурсазы 1-тӥ инты басьтӥз.

Трос нылпиё атай туж шумпотэ, нылъёсыз, асьсэ улонэнызы уло ке но, ӵемысь куное бертыло, визь-кенеш курыса вазисько шуыса. Алёша агай кык бадӟым нылъёсызлы юрт лэсьтыны но юрттӥз.  Огъя вераса, Алёша агай нылъёсыз понна ваньзэ, мае быгатэ, лэсьтыны тырше.

— Нылъёсы мыным улыны кужым сёто, — шуэ пальпотыса воргорон. — Соос понна тыршыса улӥсько, нылъёсы — улонысь самой бадӟым шудэ.

Алексей Михайлович кема аръёс ӵоже ини котельнойын оператор луыса ужа. Кибашлы но ужась воргорон та ужъёсты Вуж Турья, Карек-Серма, Шор Кушкет гуртъёсысь клубъёсын быдэстэ. Ужлэсь кышкасьтэм, шуг-секытъёслэсь пегӟисьтэм, верам кылыз вылын сылӥсь воргоронэз кадь тодо сое гуртоосыз. Нош нылъёсыз понна со самой йӧно атай.