Анай кылын диктант гожтӥзы

8, 9 шуркынмонэ Татарстан Элькунын сяме пырем ужрад ортчиз — Поволжьеын улӥсь выжы калыкъёс асьсэ анай кылынызы (чуваш, пор, удмурт, мокша но эрзя но мукет) диктант гожтӥзы.

— Балтасьёс но та ужрадлэсь палэнэ ӧз кыле. Покчи Лӧзя, Шор Кушкет, Ципья шоръёзо школаосысь дышетӥсьёс но дышетскисьёс удмурт кылын диктант гожтӥзы, нош Улисьял покчиёзо школа-нылпи садын — пор кылын, — ивортӥз ёросысь йӧскалык дышетонъя методист Фидания Сабирова. 

Диктантлэн ужпумез — элькунамы улӥсь калыкъёслэсь анай кылъёссэс вӧлмытон, вордскем кылын лыдӟиськон-гожъяськон быгатонлыкез будэтон, анай кылъя дышетӥсьёсты но кылосбурчиосты (филологъёсты) йылэтон.

— Диктантэз ми 9-тӥ шуркынмонэ гожтӥмы. Милям школаямы сое 15 нылпи гожтӥз (Ципья но Шор Кушкет школаосын но сыӵегес лыдпус шуыса тодӥсько). Шумпотымон, кык басьтӥсьёс ӧз луэ. 15 мурт пӧлысь витез «5»-лы гожтӥз, сизьымез — «4»-лы, куинез — «3»-лы, — вераз Покчи Лӧзя шоръёзо школаысь удмурт кылъя но литературая дышетӥсь Наталия Антонова. 

— Диктантлы текст С. В. Соколовлэн «Уй тылобурдоос» шуыса нимаськем ыгы но уйсы сярысь веросэз быръемын вал. Текст секыт ӧй вал, капчиен гожтӥськиз, одӥг урок куспын гожтыны вуимы, — пусйиз Наталия Львовна.