Анай кылзэс умой тодо

Чуваш, удмурт, пор, мордва анай кылъёсъя но литературая элькун олимпиадаослэн йылпумъян люкетэз, кылем арын сямен ик, радъямын вал Казаньысь «Дуслык» комплексын — Татарстанысь Дышетонъя но тодосъя министерствоысь элькун олимпиадаосты ортчытъян центрын. Олимпиадаос ортчизы 15-17 толсуре. 

Ужрадэ Татарстан Элькунысь 19 муниципал кылдытэтъёсысь — Агрыз, Аксубай, Актаныш, Алексеевск, Алькеевск, Апас, Балтась, Бугульма, Буинск, Дрожжаной, Кукмор, Мамадыш, Менделеевск, Мензелинск, Муслюм, Нижнекамск, Тетюш, Черемшан но Чистополь ёросъёсысь — 9-11 классъёсын дышетскись 108 пиналъёс пыриськизы. Та сярысь Татарстанысь Дышетонъя но тодосъя министерстволэн пресс-службаез ивортэ. 

Балтась ёросысь дышетон огазеяськонъёсысь огъя 15 нылпи пыриськиз та олимпиадаосы: 11-ез удмурт кылъя но литературая тодон-валанъёссэс возьматӥзы, 4-ез — пор кылъя но литературая. Бератаз 13 дышетскисьёс элькун олимпиадалэн вормисьёсыз но призёръёсыз луизы. 

Котькуд аре сямен, туэ но шумпотыны быгатӥськом: удмурт кылъя но литературая элькун олимпиадаын вормисьёс но призёръёсмы вань. Туэ вормисе потӥзы Покчи Лӧзя шоръёзо школаысь 10-тӥ классын дышетскись Антонова Елена но Ӟаны шоръёзо школаысь 9-тӥ классын дышетскись Апакова Лиана. 

11-тӥ классын дышетскисьёс пӧлын призёр луизы Ципья шоръёзо школаысь Тургенева Мария, Ӟаны шоръёзо школаысь Кешишева Ангелина, Покчи Лӧзя шоръёзо школаысь Петрова Виктория. Покчи Лӧзя шоръёзо школаысь Гаврилова Елизавета 10-тӥ классын дышетскисьёс пӧлын призёре потӥз. Нош 9-тӥ классын дышетскисьёс пӧлын призо интыосты басьтӥзы Покчи Лӧзя шоръёзо школаысь Ишмурзина Аделина, Никифорова Арина но Емельянова Елизавета. Удмурт кылъя элькун олимпиадалы дасян понна вань тодэмзэс но быгатэмзэс уже кутэм дышетӥсьёс: Антонова Наталия Львовна, Пчельникова Ольга Мироновна, Петрова Римма Николаевна но Чернова Ираида Анатольевна.

Пор кылъя но литературая вормисе потӥз Ципья шоръёзо школаысь 11-тӥ классын дышетскись Васильев Станислав, призёръёс луизы со ик школаысь 9-тӥ классын дышетскись Кугергин Тимур но Иванова Элина, 11-тӥ классын дышетскись Михайлов Юлиан. Пиналъёсты олимпиадалы дасяз Ципья шоръёзо школаысь пор кылъя но литературая дышетӥсь Иванова Алина Александровна.

19 толсуре радъяськиз вормисьёсты данъян ужрад. Сюлмысь ӟечкыласьком анай кылзэс умой тодӥсь дышетскисьёсты но ӟеч тодон-валан сётӥсь дышетӥсьёсты! Вуонояз но азинсконъёс но вормонъёс соослы!

Туспуктэм: Управление образования Балтасинского РИК РТ