Анайёсты вошто нылъёс

«Чеберина» вожвылъяськон — Татарстанысь удмуртъёслэн «Гырон быдтон» праздниксылэн одӥгез аспӧртэмлыкез. Та конкурстэк Элькун «Гырон быдтонэз» син азе пуктыны но уг луы. Выжыосыз но вожвылъяськонлэн мур: 2000-тӥ аръёслэн кутсконаз вутто. 

Аръёс ортчо, Чеберинаос вошъясько. Куке но та вожвылъяськонэ пыриськем нылмуртъёс туннэ нуналэ семья кылдытыса нылпиосты вордо ини. Кылсярысь, одӥгез сыӵе Чеберина — асьме ёросысь Татьяна Ишмурзина (Кунаева). Сое ёросамы тодӥсьтэмез ӧвӧл, дыр. Туннэ со трос нылпиё анай, кузпалэныз Владимир Ишмурзинэн соос куинь нылпиосты утё-вордо. Кыкназы но калыклы ӟеч уж лэсьто: Владимир 20 ар полициын тыршиз, та арлэн куартолэзьысеныз дано шутэтсконын, нош Татьяна лулчеберет удысын ужа. Уло Ишмурзинъёс Балтась каргуртын.

Татьяналэн улонэз но, ужез но удмурт калык лулчеберетэн, сям-йылолъёсын туж юн герӟаськемын. Егит дырысен ини со сцена вылын. Нош кӧня пол Татьяна Балтась ёрослэсь данзэ «Чеберина» вожвылъяськонын утиз!

— Мон ачим но пырак вераны уг тодӥськы ини, кӧня пол «Чеберинае» пыриськи. Кӧня ке ар радысь пыриськи шуыса вераны быгатӥсько. Кукморын, собере Менделеевскын Монашево гуртын ортчем «Чеберинаын» нырысетӥ инты басьтӥ вал, бератаз асьме ёросын Ципьяын ортчем элькун праздникын вормисе потӥ. Огъя вераса, ньыль-вить пол пыриськи, дыр. Берлозэ 2010-тӥ арын пыриськи, соку мынам Настие вал ини. Собере ини арлыд ласянь сюбегатон пуктӥзы но конкурсэ бызьымтэ нылмуртъёслы гинэ пыриськыны луэ шуыса ялӥзы. Тӥни со дырысен мон ӧй ни пыриськы, — шуэ кӧня ке пол Чебериналэсь нимзэ басьтэм кышномурт.

Со дырысен но дасо аръёс ортчизы ини. Табере Татьяналэсь сюрессэ Настя нылыз азинтэ. Туэ со, «Чеберина» элькун вожвылъяськонэ пыриськыса, вормисе потӥз. Таин валче асэрказ малпан кылдэ: анаезлэн дано азьланьтӥсез. Озьы-а со, ӧвӧл-а, тодомы асэныз Анастасияен вераськыса.

— Та выллем конкурсэ нырысьсэ пыриськи. Ваньмыз малпамтэ шорысь луиз. Одӥг нуналэ анае ужысьтыз бертӥз но шуэ: «Нылы, „Гырон быдтон“ праздникын ёросмылэсь данзэ утён понна кулэ Чеберина!». Мон шуисько: «Бен, кызьы мон отчы дасяськытэк пыриськом?» (Праздникозь куинь нунал гинэ дыр кылем вал ини). «Мар карыны быгатӥськод, сое ик возьматод!» — вакчияк шуиз мыным анай. Ма, мон мар, пумит ӧй луы анаелы. Со сямен ик вуи «Чеберина» конкурсэ. Вормо шуыса чик ӧй малпа, но туж шумпотӥ. Ачим понна но, оло, сокем ӧй, дыр, тужгес анае понна, солэсь осконъёссэ зэматыны быгатӥ шуыса, — вера «Чеберина» конкурсэ пыриськемез сярысь Настя.

Анастасиялы 17 арес (ӵапак толон, 26-тӥ пӧсьтолэзе, вал солэн Вордскем нуналэз. Сюлмысь ӟечкыласьком но ваньзэ умойзэ сӥзиськом!). Вордӥськемын со Вылын Ушма гуртын, но 4 аресысен семьяеныз Балтась каргуртын улэ. 

— Бигер калык пӧлын улыса, мынам луонлыке вань та калыклэн узыр лулчеберетэныз, сям-йылолъёсыныз матысен тодматскыны. Бигер кылэз но мон умой тодӥсько. Озьы ке но, уг вунэтӥськы вордскем удмурт кылы сярысь но. Данъяськыса вераны быгатӥсько, анай кылын мон шара вераськисько но сюлмысь сое яратӥсько, — азинтэ веранзэ удмурт нылаш.

Настя Зеленодольскысь медициная колледжлэн студенткаез, нырысетӥ курссэ умой гинэ йылпумъяса, кыкетӥ курсэ выжиз. 

— Медсестралы дышетскисько, калыкез эмъян, мон малпасько, туж кулэ, умой профессия. Озьы ке но мынам сюлмам улэ удмурт фольклор. Пичи дырысеным ик со монэ бордаз кыскылӥз — кырӟан-эктонъёсыз котьку синмаськытылӥзы тунсыко но чебер луэменызы.

Калык лулчеберетэз, сценаез яратон мылкыд пыӵатӥзы анае но ӵужанае. Нырысьсэ мон сцена вылэ потӥ 4 аресэн, ӵужанае «Арлэн нылкышноез» элькун вожвылъяськонлэн «Культура но духовность» номинацияз аслэсьтыз быгатонлыкъёссэ возьматыкуз. Соку мон апай эктонэз эктӥ. Со дырысен сценаен люкиськонтэм луи. Милям семьямы ик туж творческой, кырӟась-эктӥсь. Мон но яратӥсько кырӟаны, тужгес но эктыны. Ӵужатаймы туж усто мызганэн шудэ вал, мон солэн шудэмуз улсын эктӥсько вал. Сыӵе дыръёс но вал... Туж мӧзмисько со дыръёслэсь, ӵужатаелэсь... 

Анае но ӵужанае туж бадӟым саклык висъяло анай кылмес, лулчеберетмес утёнлы, сям-йылолъёссэ тодонлы. Соослэн примерзылы луыса мон валасько, асьме калыклэсьлулчеберетсэ, валасько со туж бадӟым узырлык шуыса, кудзэ утёно но вуоно поколениослы сётоно. Тау карисько анаелы но ӵужанаелы та чебер дуннеез мыным усьтэмзы понна, азьланяз калыкелэсь со узырлыксэ одно утьыны, азинтыны тыршо. Мон данъяськисько аслам выжыосыным но дунъясько калыкелэсь чеберлыксэ, — йылпумъяз веранзэ Чеберина.

Тӥни озьы, Чеберинаосты вошто мукет Чеберинаос, анайёсты вошто нылъёс. Одӥгез гинэ медаз воштӥськы вал аръёс ортчемъя — ас калыктэ но выжыостэ, анай кылдэ но лулчебереттэ гажан мылкыд.

Пӧртэм аръёсы Чеберина нимез басьтэм Балтась нылъёс:

Татьяна Кунаева (2000-2010-тӥ аръёс);
Алина Калинина (2021 ар);
Дина Михайлова (2023 ар);
Анастасия Ишмурзина (2025).

Туспуктэмъёс Ишмурзинъёслэн семья архивысьтызы.