«Анайлык — со мон понна туж бадӟым шуд»

Балтась ёросысь исполнительной комитетлэн кичӧлтэмез улсын, Анайлэн нуналэзлы сӥзьыса, ёросысь анайёс понна «Искусство быть мамой» вожвылъяськон радъяськиз. Вожвылъяськонэ ваньзэ 24 анай пыриськиз, финалэ шедизы – 10-эз. Соос пӧлын вал Ципьяысь Филиппова Алиса Юрьевна но. Финалэ пыриськыса, со, ассэ котькуд ласянь умоен возьматыны быгатӥз но 2-тӥ интыен пусйиськиз.Сюлмысь ӟечкыласьком сое!

Ойдолэ тодматском та егит удмурт анаен. Тодомы солэн семьяез но ужез сярысь, маин со выре ваньмон дыръяз, вожвылъяськонэ пыриськемез но мукетыз сярысь.

Ачиз сярысь

– Мон вордӥськи но быдэ вуи Балтась ёросысь Починка (Карек-Серма) гуртын. 4-тӥ классозь дышетски гуртысьтымы покчиёзо школаын. 5-тӥ классэ мынӥ Ӟаны шоръёзо школае. 9-тӥ класс бере дышетскыны пыри Арчаысь Габдулла Тукай нимо педагогикая колледже. 2010-тӥ арын, покчи классъёслэн дышетӥсьсы луыса, сое горд дипломен йылпумъяй. Со арысен ик кутски Ӟаны школаын дышетыны покчи классысь нылпиосты. Со дыре ик КФУ-ысь филологияя факультетын ӟуч кылъя но литературая дышетӥсьлы заочно дышетски.

Ужан удыс

–Туннэ нуналэ Ципья шоръёзо школаын ужасько. Дышетӥсько 2-тӥ классэз, Дышетӥсь луыса ужан понна туж бадӟым сюлэм но нылпиосыз яратон кулэ. Мон аслэсьтым ужме туж яратӥсько но данъяськисько соин.
Дышетскись пиналъёсы гинэ ӧвӧл, ачим но пӧртэм вожвылъяськонъёсы пыриськисько. Одӥгез бадӟымез профессиональной конкурс — со «Учитель года». Туэ, отчы пыриськыса, ёросын 3-тӥ интые потӥ.

Семья

– Кузпалэ – Леонид. Огмес огмы яратыса но гажаса, тупаса 10 ар ӵоже улӥськом, кык нылпиосты будэтӥськом. Нырысетӥез Эльза. Солы 9 арес, 3-тӥ классын дышетске. Покчиез — Злата. Солы 4 арес, али нылпи садэ ветлэ. Нылпиосмес удмурт калыклэн йылолъёсыныз тодматыса, удмурт кылэз медаз вунэтэ шуыса будэтыны тыршиськом. Куспамы удмурт кылын вераськиськом.

Ваньмон дыр

– Анае, Никитина Надежда Васильевна, туж кибашлы нылкышно луэ, монэ но трос пӧртэм киужъёслы дышетыса будэтӥз. Ваньмон дыръям керттӥськисько чильпаськон но керттӥськон венен. Пыдвыл но мучоло керттӥсько. Джутлэсь корзинаос но вазаос, полимерной шортлэсь сумкаос тужгес но усто пӧрмо. Мулине шортлэсь картинаосы пӧртэм конкурсъёсын инты басьтылӥзы. Озьы ик яратӥсько бисерлэсь но пазлъёслэсь картинаос люканы. Нылъёсме но киужъёслы дышетӥсько. Ужтэк пукеме уг луы, киы весь мар ке ужаны куриське. Озьы мон шутэтскисько, сюлмы каньылгес кадь луэ.

«Искусство быть мамой» вожвылъяськон сярысь

– Конкурсэ пыриськыны ӧтьыса, Ципья лулчеберетъя юртлэн кивалтӥсез Елена Демеева но устолыкъя кивалтӥсь Евгения Михайлова ӵектӥзы. Нырысь «чик но дыры ӧвӧл» шуыса ответ сётӥськем вал. Соос шуизы: «Тонэ гинэ та конкурсын адӟиськом. Быгатод шуыса оскиськом. Творческой семьяын будэм адями, ачид но котьма быгатӥськод». Та кылъёссы бурдъязы кадь монэ. Озьы ик конкурсэ вуи. Финалэ потӥмы. Таин валче быдэс семьяелы, Ципья лулчеберетъя юртын ужасьёслы таукылме вераме потэ мыным оскемзы но юрттэмзы понна. Ваньмылэн ӵош тыршеменымы гинэ финалэ потӥмы.

Азьло дырысен милемыз ӝӧк сьӧры люка вал анаелэн зарни киосыныз гурын пыжем табанез но арган гурез. Соин ик пичи дырысен ми арган куара кылыса, кырӟаса но эктыса будӥмы. Оло аръёс ортчемъя, оло улон воштӥськемъя, берло дыре сыӵе люкаськонъёсмы шеромизы ни вал. Яке уж, яке дыр ӧвӧл... Вераме потэ, та конкурс милемыз нош ик азьло сямен ӵош люказ ӝӧк сьӧрамы но, сцена вылэ но. Ӝытъёсы ӵош люкаськыса удмурт кырӟанъёсты но, эктонъёсты но тодэ вайимы. Анае ваньзэ удмурт дӥськутъёсты ачиз вуриз. Камалилос но солэн киыныз лэсьтэмын. Туж яратӥсько но данъяськисько соин. Паймонэ уг тырмы солэн быгатэмезлы!

Анайлык но анай шуд

– Анайлык — со мон понна туж бадӟым шуд. Сое быгатыса утьыны кулэ. Нош анай яратон — вераса быдтонтэм, пумаз-йылаз потонтэм, ӟырдыт, лякыт, чидась но пыраклы яратон.

Мынам анае…

– Мынам анае паймымон усто нылкышно. Со мынам пыкетэ, осконэ, юрттӥсе но эше. Котькудласянь со мыным юрттыны дась улэ. Аслаз осконэныз мыным улыны кужым но мылкыд сётэ. Сюлэмызлэн ӟырдыт тылгизьыосыныз вань улосэз шунтэ но шулдыртэ. Небыт но каньыл кылъёсыз секыт дыръёсы котьку вылӥе ӝуто. Шунды кадь шуныт но яркыт пальпотонэз котьку но сюлэмме каньыл каре. Аслаз улэменыз дуннелэсь чеберлыксэ адӟыны дышетэ. «Дунне вылын ог-огмылы юрттыса улоно» шуыса дышетӥз, будэтӥз со милемыз. Ӵемысь вера али но: «Ляб муртъёсты эн исалэ. Соослы юрттэлэ». Улонлэсь вань чеберлыксэ адӟыны дышетыса будэтэмезлы сюлмысен тау кылме верасько солы.

Туала улонын анайлэн интыез

– Туала улонын но анай котькуд адямилэн сюлэмаз нырысетӥ интыын шуыса малпасько. Малы ке шуоно анай сяна асьмелы нокин улон сётыны уг быгаты. Котькӧня аръёс мед ортчозы, «анай» кыллэн пуштросэз уз воштӥськы шуыса оскыса кылисько.

Анайлэсь нуналзэ пусъён

– Анайлэсь нуналзэ семья куспын арлы быдэ пусйиськом. Ваньмы ӵош люкаськыса, шуныт малпанъёсмес тодэ вайыса, арганэн кырӟаса пукыны яратӥськом.

Анайёсты ӟечкыласа

– Вань анайёсты сюлмысен ӟечкыласько праздникен. Сӥзисько тӥледлы шуд, тазалык, кузь гумыр. Улон сюресты капчиен но шумпотонэн мед ортчоз. Йыр йылады котьку но мед пиштоз яркыт шунды, ымнырысьтыды ноку но медаз ышы лякыт пальпотонды. Семьяяды валан, гажан, яратон но жингрес нылпи куара мед улоз.