«Анайлык – со огдыре ик сюлмаськон но, шумпотон но»

Анай луон – со улонлэн кузьымез гинэ ӧвӧл, со ялан дышетскон но астэ возьматон процесс. Котькуд анай та рольлэн аспӧртэмлыко интерпретациез луэ, коткудӥзлэн аслаз опытэз но вормонъёсыз. 

Тодматӥськом Балтась ёросысь исполнительной комитетлэн кичӧлтэмез улсын радъям «Искусство быть мамой» шуыса нимаськем вожвылъяськонэ пыриськем но финалэ шедем кыкетӥ удмурт анаен – Вукогуртысь Анна Григорьеваен. Со но, рос-прос вожвылъяськонлы дасяськыса, туж ушъямон выступить кариз но «Тужгес креативной анай» номинациын вормись луиз. 

Ачиз сярысь

— Мон Удмуртилэн Кизнер ёросысьтыз Вичурка гуртын вордски. Гуртамы школамы 9-тӥ классозь гинэ вал, соин 10-11 классъёсын мон дышетски Можга педколледжлэн лицей классаз. 2006-2011 аръёсы тодон-валан басьтӥ Удмурт кун университетлэн удмурт филологи факультетаз (удмурт но англи кылъёсъя ёзэтаз).

Семья

– Озьы кылдӥз, улонэ монэ вуттӥз Татарстанэ. Пинал дыръя, студент дыръя олокытчы но вуылӥськод, озьы улонэ герӟаськиз Балтась ёросэн. 2012 арысен улӥсько мон Вукогуртын. Сергей кузпалэным будэтӥськомы 2 нылпиосмес: Кристинаез но Эрикез. Кристиналы 12 арес, со дышетске 6 классын. Эриклы 2 арес, со нылпи садэ ветлэ. Ужасько мон школаын англи кылъя дышетӥсь луыса. 6 ар ӵоже Нуринер шоръёзо школаын ужай. 2025 арысен ужасько Ципья школаын.

Ужан удыс

– Дышетӥсьлэн ужез — со котьку но мар ке выльзэ утчан. Урокъёс пайдалыко мед ортчозы шуыса, нылпиосты маин ке паймытыны котьку тыршоно. Урокъёслы дасяськон, корка котырын уж уно дырез басьтэ ке но, мон котьку тыршисько нылпиосылы но уногес дырме висъяны. Ветлыны соосын пӧртэм тунсыко но чебер интыостӥ, шудыны, ӵош урокъёсты дасяны.

«Искусство быть мамой» вожвылъяськон сярысь

– «Искусство быть мамой» конкурс сярысь мыным ивортӥз клубмылэн заведующиез — Перемечева Антонина Михайловна. Мон соку ик соглаш луи, малы ке шуоно мыным кельше пӧртэм конкурсъёсы пыриськыны. Котькыӵе конкурс — со дышетскон, выльзэ тодон. Со аслыд курон пуктон, астэ эскерон! Учырен пайдаяськыса, мынам потэ на бадӟым тау шуэме творческой группаелы, кудӥз пӧртэм тунсыко идеяос мыным сетӥз, творческой номер дасяны юрттӥз. Со Залкеева М. В., Григорьева А. И., Перемечева А. М., Петрова О. Ю., Кузнецова Р. П., Никитина Е. П., Григорьева К., Григорьева М., Семёнова У., Наздекова Н., Садакова Е. 

Анайлык но анай шуд

– Анайлык сярысь ке верано, со нырысь ик, мон понна, нылпиостэ утялтон но соосты улыны дышетон. Огдыре ик со сюлмаськон но, шумпотон но. Анай нылпиосыз сярысь уй но, нунал но малпаське. Уроксы каремын-а? Ураме пото ке — шуныт дӥсяськемын-а? Анай котьку сюлмаське.

Нош анай яратон — со дунне вылысь самой кужмоез яратон. Анай котьку нылпиосыз понна ваньзэ лэсьтыны дась. Ужез уно ке но, ужзэ кельтыса нылпиосызлы юрттоз.

Мынам анае…

– Аслэсьтым анайме мон дунъясал «доброта» кылын. Со туж лякыт сюлмо но вазиськись адями. Котькинлы котьку но юрттыны дась. Со ӵем дырья вера вал милемлы пичи дыръямы, адямилы котьку но ӟеч ужъёс карыны тыршоно, ужез яратоно шуыса. «Ужаса начар уд луы», — шуэ со али но.

Анайлэсь нуналзэ пусъён

– Анайлэн нуналаз ми котьку но тыршиськомы анайёсмылы таукылъёс вераны, нырысь ик, улон кузьмамзы понна, будэтэмзы, дышетэмзы понна. Басьтыны кыӵе ке но пичи кузьым. Вераны соослы кыӵе соос ми понна дуно. Анай — со котькудмы понна дунне вылысь валтӥсез адями. Со котькинлэсь зол шумпотэ асьмелэн вормонъёсмы понна, сюлмаське секыт вакытъёсамы, юрттэт кулэ луыку, нырысь ик кизэ сётэ.

Анайёсты ӟечкыласа

 – Гажано анайёс! Ӟечкыласько тӥледыз вуись чебер праздникен — Анайлэн нуналэныз! Тау тӥледлы небыт сюлэмды, визьлыкты, чиданды понна. Котькуд нуналды шумпотон гинэ мед кузьмалоз, нылпиосты данъяськон мед ваёзы. Сӥзисько тӥледлы юн тазалык, байлык, йыр вадьсады чылкыт инбам но ваньзэ умойзэ гинэ!