«Анай кадь со, мусо но ӵыдонтэм...»

Вордскем кыллэсь калыккуспо нуналзэ Ципья школаын но пусйизы. Анай кылъёсъя дышетӥсьёс Чернова Ираида Анатольевна (удмурт кылъя дышетӥсь), Иванова Алина Александровна (пор кылъя дышетӥсь), Мингазова Гульназ Тагировна (бигер кылъя дышетӥсь) нылпиослы тунсыко мастер-классъёсты ортчытӥллям, озьы ик дышетӥсьёс «Как славно ты звенишь, родной язык» шуыса нимаськись ужрад но радъяллям.

Котькуд аре кадь ик, ужрад нылпиос понна но, дышетӥсьёс понна но пайдаё луэм. Та нуналэ Ципья школаын вордскем кылъёсын чебер кырӟанъёс, кылбуръёс чузъяськиллям, озьы ик калык эктонъёс но луиллям.

Дышетӥсьёс, нылпиосты вордскем кылзы борды кыскон понна, праздник нуналъёсы гинэ таӵе чебер ужрадъёс уг ортчытъяло: соос асьсэлэн урокъёсазы пӧртэм тунсыко амалъёсты кутыны тыршо, мае ке выльзэ утчало, мукет школаосысь ужъюлтошъёсынызы (коллегаосынызы) кенешыса уло. Соос валало, вордскем кылъёсты утьыса кельтонын дышетӥсьёслэн рользы туж бадӟым шуыса.