«Анай муртлы аслэсьтыз нылпиоссэ ыштыны туж секыт…»

Сала Кушкет гуртысь Мария Демьяноваез гажамон адямиез, адӟем карымон песянаез, куать нылпиослы улон кузьмам анаез кадь тодӥсько вал. Асэныз матысенгес тодматскеме бере шумпотӥ: вылаз ик со туж каньыл, пальпотыса вераськись песянай но луэ вылэм.

Демьянова (Матвеева) Мария Алексеевна 1932-тӥ арын 1-тӥ феврале огшоры крестьян семьяын Ярак-Чурма гуртын вордскемын. Соин пичи дырыз но, егит дырыз но тросэзлэн огъёзоосызлэн кадь ортчем: сютэм улон, секыт ужъёс, вазь быдэ вуон…

— Ми — пичи дырысен ужаса будыны дышем поколениысь нылпиос. Жугиськон дырозь но, жугиськон дыръя но, жугиськон бере но капчи ӧз йӧты. Ож дыръя луэм секытэз сярысь веранэз ик ӧвӧл, вань секыт уж нылпиос но нылкышноос вылэ кылиз. Кӧня нылкышноос, кузпалъёссэс жугиськонын ыштыса, ас кужыменызы нылпиоссэс пыд йылазы султытӥзы... Пӧртэм секыт ужъёсты адӟыны тупаз, валэн но трос ужай. Пичи дырысен ик сюрлоен кӧжы арамы. Поттурынэз пызь карыса, нянь пыжимы. Мынам одӥг сузэры но одӥг выны вань вал, ми куинь нылпиос луимы. Гур эстыны кулэ луэмысь, сузэреным пашпулы нюлэскы ветлӥмы… Песяе вань вал, анае. Ми ӵош улӥмы, жугиськонозь но, собере но. Анай-атае колхозын ужазы. Анаелэн нимыз Анна Васильевна вал. Солы туж секыт йӧтӥз ини. Атай, гуртысь тросэз воргоронъёс кадь, оже кошкиз. Но солы, сӧсырмыса ке но, кунулбодыен (костылен) ке но, бертыны шуд усиз. Нялтас вераса, песяйлэн ньыль пиосыз но жугиськонысь улэпен бертыны быгатӥзы. Миколагай сӧл-таза бертӥз, Васягай (песяйлэн нырысетӥ пиез), атай кадь, кунулбодыен бертӥз, сӧсырмемез вань вал. Атай, Алексей, жугиськонын санитар луыса ветлэм. Мыным военной сумка вайиз, мон сизьыметӥ классын соин дышетски. Пельпуме гинэ пононо вал сое, — тодаз вае нылпи дыръёссэ Мария Алексеевна.

Собере со тодаз вайиз школаын дышетскем аръёссэ. Дышетскем Мария апай Гондыргуртын, черк коркаын (азьвыл со юртын черк луэмысь со юртэз озьы нималлям). Нылпиос ӟуч кылэз тодымтэзы бере, дышетсконзы удмурт кылын ортчытӥськем. «Табере нылпиос удмуртсэ уг тодо ни садикысен ик… Грамотной луыса будо туала дырысь пичиос», — оло паймыса, оло ӝожомыса вера песянай. Гондыргуртын покчиёзо школа гинэ вал бере, ньылетӥ классэ йылпумъяса, Мария апай Покчи Лӧзя школае дышетскыны выже. Отын сизьым классэз йылпумъя. Дышетсконзэ уг ни азьланьты.

— Кызьы верай ини, секыт дыръёс вал со. Соин дышетскон сярысь малпанъёс но ӧй вал. Анай-атайлэн уксёзы но ӧй вал монэ дышетон понна. Ужамы но ужамы… Котьку колхозын вал. Жугиськон бере улон эшшо но секытгес вал, собере каллен-каллен ваньмыз радызъя луиз. Но соку дышетскон сярысь малпаны бер вал ини. Соин гумырам колхозын ужай. Отын ужаса утьымтэ уже ӧз кыльы, дыр, — малпанъёссэ вера Мария Алексеевна.

Озьыен, сизьыметӥ классэ йылпумъямез дырысен Мария Алексеевна, нокытчы дышетскыны пырытэк, колхозын ужаны кутске. Пӧртэм ужъёсын ассэ уте: фермаын но тырше, валэн но ужа. 23 аресэн, 1956-тӥ арын, Сала Кушкет гуртэ Демьянов Николай Ивановичлы картлы кошке.

— Николаен ми тодмо вал, соос эшъёсынызы гуртамы ветлӥзы. Азьло кӧня нылъёсты тодмотэм пиос лушкаса вайизы ведь, нош ми огмес-огмы тодӥмы, яратӥмы. Яратыса картлы кошки мон. Огпол гуртазы куное вуи, со вал Семык дыръя. Озьы со монэ, шулдыръяськыкумы, малпамтэ шорысь, дораз вайиз но пыртӥз… Мон гинэ ӧвӧл, аслаз эшъёсыз но тодымтэзы (серекъя). Озьыен, куное лыктыса, Сала Кушкет гуртэ улыны кыли, — пальпотыса тодаз вае егит дыръёссэ песянай.

Мария Алексеевналэн верамезъя, солэн кузпалэз йӧно пиосмурт луэм. Жаляса верано, со 1991-тӥ арын висьыса кулэм. Куспазы соос ӟеч улӥллям, ог-огзэс яратыса но гажаса. Анайзыеныз но со тупаса, огъя кыл шедьтыса улэм. 1963-тӥ арын Демьяновъёс асьсэлэн кужыменызы лэсьтэм юртазы улыны выжо. Туннэ нуналэ Мария Алексеевна со юртын огназ улэ.

— Али но мед улысал но… Ӧвӧл ини, кошкиз. Ужась вал картэ. Со но пӧртэм интыужъёсын ассэ утиз. Сельсоветысь бухгалтериын но ужаз, шофёр но луиз. Пенсие потэмез бере висьыны кутскиз ини…, — кузпалзэ тодаз вае Мария апай.

Демьяновъёслэн куать нылпиоссы вордско. Галина нылзы ас семьяеныз Сарапулын улэ, дышетӥсь луыса ужа. Вениамин пизы но ас семьяеныз Рыбно-Слободской ёросын улэ, тракторист луыса ужам, табере пенсиын ини. Куинетӥез Людмила (медсестра луыса ужам, 2013-тӥ арын кулэм), ньылетӥез, Нина, Сарапулын семьяеныз улэ, медсестра луыса ужа со но. Витетӥез Светлана Сала Кушкетын картлы кошкыса улэ, школазэ йылпумъям дырысеныз фермаын тырше. Куатетӥ пизы Леонид кулэм ини.

— Куать нылпиослэсь ньылез гинэ улэп ини. Анай муртлы аслэсьтыз нылпиоссэ ыштыны туж секыт… Нылпиоссэ ыштэм адями гинэ со вӧсь луонэз валаны быгатоз, — куректонзэ вера песянай.

Мария Алексеевна 1987-тӥ арысен пенсиын ини. Огназ улэ ке но, Светлана нылыз котьку вӧзаз луэ вылэм.

— Нылы монэ туж учке, котьку татын со. Сиён но пӧзьтэ, утялтэ но. Мон понна сюлмаське. Мукет нылпиосы но куное бертыса уло. Али бадӟым нылы та нуналъёсы гинэ кошкиз. Туннэ нуналэ мынам 8 внуке но 10 правнуке вань ини. Соос но куное бертыло. Соин мон асме ачим шудо шуисько. Нылпиосы вань, монэ утё бере, асме шудтэм шуыны кылы уз берытскы, — маде Мария Демьянова.

Кузпалзэ но кык нылпиоссэ вазь ыштэмез шоры учкытэк, кужмо кышномурт улонлы сётскымтэ. Нылпиосыз но матысьёсыз понна, ачиз аслыз кыл сётыса, улонзэ азьланьтэм. Туннэ нуналэ Мария апайлэн эшъёсыз но улэп ӧвӧл ини. Кылем арын, пе, одӥг парта сьӧрын ӵош пукем эшез но, Зоя Никитина, кулэм.

Вераськонамы Мария Алексеевналэн Светлана нылыз итӥське:

— Анайлэн бускелез сярысь вераме потэ, Давыдова Евгения Михайловна сярысь. Мон ужын яке дорам луыку, со анай доры пырыса потэ, сое учке. Туж умой бускель со, котьку юрттыны дась. Со понна солы бадӟым тау. Анайлэн али синмыз но ляб адӟе ини, нош азьло со яратыса лыдӟиське вал, «Азьлане» газетэз но лыдӟиз. Табере Евгения Михайловна «Азьланеез» кутыса, анай доры пыре но солы маде, мар сярысь отын гожъяллям. Сыӵе тӥни соолэн умой бускель кусыпъёссы. Озьы ик пусъеме потэ анайлэсь мукет бускельзэ но — Галина Пашкееваез. Со но ӵем анай доры пырылэ, быгатэмезъя солы юрттэ.

Мария апаен но Света апаен вераськеме бере, туж шуныт мылкыдъёс кылизы. Кыкназы ик кышномуртъёс каньылэсь, пальпотыса но серекъяса вераськисесь. Света апай анайзэ туж умой учке, шӧдске: со арлыдо анайзэ туж яратэ. Юнме гинэ ассэ шудо песянай но шудо анай шуыса верамтэ вылэм Мария апай.