Ӟаны шоръёзо школаын пуштросо ужрад ортчиз

13-тӥ южтолэзе Ӟаны шоръёзо школаын туж яркыт но пуштросо ужрад ортчиз — Балтась но Кукмор ёросъёсысь этнокультурной компонентэн школаосысь бадӟым классъёсын дышетскисьёслэн «Вордскем кыл огазея» ним улсын эшлыко пумиськонзы. «Нунал туж пайдаё, тунсыко но шулдыр ортчиз», — шуо ужрадэз радъясьёс.

— Куноос лыктэмын вал асьме но Кукмор ёросъёсысь удмурт школаосысь: нылпиос, удмурт кылъя дышетӥсьёс но директоръёс. Программа дасямын вал нимаз дышетӥсьёслы но нылпиослы, — ивортэ Ӟаны шоръёзо школаысь директорлэн дышетонъя воштӥсез Олеся Яковлева. 

Пумиськонлэн программаяз мылкыдэз ӝутон но дырез пайдаё ортчытон понна ваньмыз вал: творческой выступлениос, дышетӥсьёс понна тунсыко мастер-классъёс, пиналъёс понна шудон программа, этнодискотека, чебер вераськыны быгатонъя конкурс. 

— Нырысь ваньзы актовой залэ люкаськизы, пумиськонэз усьтӥмы, нылпиос чебересь номеръёссэс возьматӥзы. Творческой номеръёссэс вайиллям вал куноос но. Собере удмурт кылын чебер вераськыны быгатонъя конкурс ортчиз. Татын вормисе потӥз Лельвиж школаысь дышетскись, Алексеева Ангелина, кыкетӥ инты басьтӥз Ӟаны шоръёзо школаысь Матвеева Лиана, куинетӥ луизы Ципья шоръёзо школаысь Тукаева Юлия но Покчи Лӧзя школаысь Антонова Елена, — вера Олеся Васильевна.

Со сяна, номинациосын вормисьёсты но пусйиллям. «Мыло-кыдо лыдӟись» луэм Шор Кумор школаысь Бекчентеева Дарина, «Туж вольыт лыдӟись» — Ныръя школаысь Афанасьев Иван, «Сюлмысь лыдӟись» — Нижняя Русь гуртысь П. Е. Воробьёв нимо школаысь Соловьёва Алина.

— Дышетӥсьёслы ӧнер быгатонлыкъёсын вошъяськон понна куинь пӧртэм мастер-класс — «Покчи классъёсын дышетскись пиналъёслэсь йырсазьзэс будэтон», «Инкуазь суредъёс» но «Чай Победы» — радъямын вал. Озьы ик котырес ӝӧк сьӧрын «Удмурт кыл улонын» темая вераськимы, ужпумъёс пуктӥмы.

Нылпиослэсь дырзэс пайдаё но тунсыко ортчытон понна «Движение первых» тыршиз. Дышетскисьёс шумпотыса пӧртэм шудонъёсын шудӥзы, выль эшъёс шедьтӥзы, чебер удмурт гуръёс улсын эктӥзы, — ужрадлэсь пайдаё луэмзэ пусйыса шуэ директорлэн воштӥсез.

Туспуктэмъёс: Ӟаны школалэн архивез