Асьмелэнъёсты тоды!

24-25 тулыспалэ Казаньын Татарстан Республикаысь агропромышленной комплекслэн 2021 арын ужамезлы йылпумъянъёс лэсьтон но 2022 арлы ужпумъёс пуктон коллегия но гурт возёс азинсконъёсъя специализированной адӟытон ортчиз. Ужрадлэн нырысетӥ нуналаз асьме аспалмес, «Борнак» обществоын тыршись бадӟым опытэн механизаторез Владимир Якимовез «Татарстан Республикаысь гурт возёсысь сӥё-дано механизатор» ним сётӥзы но гадьпусэн пусйизы. Нялтас вераса, ужрад тодмо луись «Казань Экспо» трос функциё адӟытон комплексын ортчиз. Отчы ёросмылэн главаез Рамиль Нутфуллин но, ёросысь куд-ог обществоослэн кивалтӥсьёссы но ветлӥзы.

Владимир Александрович ёросмы понна тодмо воргорон. Со «Борнакын» гинэ ӧвӧл, ёросъя но самой усто, ужез валась, азьмынӥсь механизаторъёслэн одӥгез луэ. Арысь аре солэсь тыршемзэ ёросамы Азьмынӥсьёслэн слётазы пусъё, 2017-тӥ арын республикаысь 200 самой азьмынӥсь комбайнёръёс пӧлын но луиз Владимир Александрович. Соин таӵе вылӥ данъетэн пусйиськемез паймымон но ӧвӧл, со дыре ик туж шумпотымон но.

Владимир Александрович 7-тӥ классысен бусыын комбайнёрлэн юрттӥсез луыса ужам, школа йылпумъямез бере 5 ар Ципьяысь «Сельхозтехникаын» слесарь-инструментальщик луыса тыршем. Собере ини колхозэ ужаны интыяськем.

— 1991-тӥ арысен «Борнакын» ужасько. Карек-Серма гуртысь фермаын тырши, сварщик но луи, электрик но, оператор но. Нош 1997-тӥ арысен механизатор луыса ужаны кутски — гуртысь комбайнёръёсмы пенсие потӥзы но монэ руль сьӧры пуксьыны куризы, со дырысен ужме ӧй вошты. Туннэ нуналэ но гурт удыс понна тыршисько. Выль «Нова» комбайнэн куинь сезон ужай ини, — шуэ воргорон.

Владимир Александровичез сюлмысен ӟечкыласькомы но азьпалан эшшо но бадӟымгес вормонъёсы вутскыны мылкыд кариськомы.