Атайлэн нуналэз — сюлме йӧтӥсь праздник

Зэмзэ верало, зэмос атай — со адями, кудӥз тонэ вордӥз но будэтӥз. Быдэс улон кузя атайлэн оскымон пельпумез тыныд пыкет луэ пӧртэм шуг-секытъёсты ортчыны. Нылъёс понна атай — со азьпалан кузпаллэсь образзэ кылдытӥсь адями, нош пи понна атай — со улонысь зэмос воргоронлэн примерез. Ваньмыз потэ атай бордысь. Соин котькуд пиосмуртлы нылпиез азьын ӟеч сямъёсын тырмыса улоно.

Вить юанлы валэктон сётӥз Тагашур гуртын вордскем Александра Раимова. Жаляса верано, атаезлэн сопал дуннее кошкемезлы одӥг ар луиз ини (интыез узьмагын медло), но Саша али но атаезлэсь шунытсэ шӧдэ, атаезлэн уй малпанъёсаз лыктэмезлы тау каре. Солэн ВКонтакте бамаз шуныт но небыт гожтэмъёсыз малпаськонэ уськыто но матысьёсты гажаны ӧтё.

— Мынам атае Раимов Валентин Павлович. Вордӥськиз 7-тӥ толсуре 1958-тӥ арын Тагашур гуртын. Семьяязы соос куать кузя нылпиос вал. Нырысетӥ тодон-валан басьтӥз Тагашурысь покчиёзо школаын, 10 классэ Ципья черкогуртысь школаын йылпумъяз. Ужан сюрессэ вордӥськем гуртаз ик клубазы киномеханик луыса кутскиз. Арми службазэ Венгриын ортчиз, отын со кык ар ӵоже луиз. Вордскем гуртаз бертыса, колхозын ужаны кутскиз.

— «Умой атай — со...» веранкылэз азинты.

— Умой атай — со улонысь вань удысъёсын тыршись адями. Со луыны быгатэ шофёр яке лётчик; тодосчи яке кылбурчи; больницаысь врач яке школаысь дышетӥсь/нылпи садысь визьнодась; артист яке политик. Кыӵе гинэ ужын со медаз луы, котькытын сое гажало, соин кенешо, сӥлы каро. Со умой эш, умой ужъюлтош. Со котьку дась ёрмисьёслы юрттыны, адями понна сюлворыны но, шумпотыны но. Нокинлы уз сёты ассэ но муртъёсты ултӥяны, начарзэ вераны.

Зэмос атай котьку шумпотыса, киоссэ вӧлъяса пумита дораз пальпотыса бызись нылпиоссэ. Со котьку но кузпалзэ мусояса, гажаса улэ, анай-атайзэ, анайзы-атайзызэ яратэ но сӥлы каре, доразы шумпотон гинэ вае. Котьку но тырше семьязэ шудо карыны.

— Атаедлэн кыӵе сямъёсыз тыныд тужгес но кельшо вал?

— Кӧня атайме тодӥсько, огпол но адямиос сярысь начарен ӧз вералля. Котьку адямиослэсь куаразэс кылзӥз, нокинлы «уг» шуэмез ӧй вал, весь юрттыны тырше вал, со сямы аслам но вань, адямиослы «уг» шуыны уг быгатӥськы. 

Зэмзэ но, Саша ачиз но небыт сюлмо, каньыл мылкыдо нылаш, кудӥз котькуд вазиськонлы одно ик лыктоз, юрттоз. Чурыт кылзэ но солэсь уд кылы, лек учкемзэ но вылад уд шӧды.

— Атаеныд герӟаськем тужгес но тунсыко ситуацидэ тодад вайыны быгатод-а?

— Быгато. Тунсыко шуыны уз луы, дыр, сое, но озьы ке но верало.
Кылем арын гужем кыкнамы ведраос басьтыса мынӥмы губи бичаны. Шонерен вераса, губиез сокем кулэ но ӧй вал, дыр, ни мыным, тужгес папа вöзын луон кулэ вал, вераськон, инкуазьын ветлон. Кöйгубиос трос потӥллям вал, сое бичаны мынӥмы, «соку ик ӧд бича ке, номыр норе» шуэ вал папа. Ми дыръя но тросэз номырӟемын вал ини. Гид сьӧрын гинэ вань милям кызьпу арама, отчы мыноно каримы. Мон тапал гурезьын кыли пужымъёс улысь губи учкыса, папа сопал гурезе потыса вуэм ни вал. Нюк ултӥ сопала потоно, нокин ветлымтэ вылысь, отын мон ӝужда пушнер будэм. Нош мынам пыдъёсы гольык. Папалэсь кылёнтэм, мон шонерен гольык пыдъёсыным пушнертӥ потӥ, со дыре пушнераськеме но ӧз шӧдӥськы кадь. Папалэсь ӧй кыльы, сьӧраз ик вуи. Каллен-каллен вераськыса, губи учкыса нюлэс доре но вуим, гурезьтӥ васькыса, нюк ултӥ улмопубакча доры тубимы, отын ярдураз ик пужымъёс будо. Отӥ но ветлӥмы губи учкыса. Сюлэмлы со дыре туж шуныт вал, папаен дораз луэмысь, инкуазьын ветлэмысь. Ӧй ик малпа, соку берпуметӥзэ губи бичаны папаен мыномы шуыса.

— Аслад нылпиосыдлы сыӵе атай сӥзьысалыд-а?

— Жаляса верано, нылпиосылы сыӵе атай ӧй сӥзьысал...
Улонын пӧртэм дыръёсмы вань вал. Секыт но, синкылио нуналъёс но луизы. Шумпотонэз но вань вал, кызьы сотэк. Атай ачиз бадӟым семьяын будэмын бере, котькуд нылпилы анай-атайёссылэн дырзы но, яратонзы но тырмымтэ, дыр. Мон уг тодӥськы, кыӵе солы шуг-секытъёс пыр ортчоно луэм. Атай со — атай, котькыӵе гинэ медаз луы, котькуд дыре асьмелы кулэ атай. 
Та веранэн мон но соглаш луисько. Кыӵе гинэ медаз луы атай, со нырысь ик нылпи понна матысь адями, кудӥзлэн вирез бызе вирсэръёстӥ, кудӥзлэн тусбуез адӟиське нылпилэн сямъёсаз но ымныраз.

— Кыӵе кылъёсын вазиськысалыд атаедлы но мар сӥзьысалыд вань атайёслы?

— Нырысь ик аслам атаелы бадӟым тау шуысал улон сётэмез но монэ будэтэмез понна. Улонысь кошкемез бере гинэ валаны кутскиськод: кыӵе секыт атайтэк улыны. Кыӵе гинэ секытъёс ӧз кылдэ ке но, котьку атай сое лэсьтыны тырше вал. Вӧзам уг тырмы атайлэн оскымон пельпумез. 

Дуно атайёсмы, мон вань сюлмысен ӟечкыласько тӥледыз Атайлэн праздникеныз. Тӥляд дорады котьку шуныт но чылкыт мед луоз, кузпалды котьку мед пумиталоз ческыт пӧраськемъёсын но ненег кылъёсын. Нош нылпиосты ноку но медаз вунэтэ тӥледыз, мед гажалозы, ӵемгес мед бертылозы. Вӧзысь адямиосты ӟеч мылкыдъёсын гинэ мед шумпоттозы. 

Юн тазалык тӥледлы, атайёс! Тӥ ми вӧзын ке, милемлы номыр кышкыт ӧвӧл. Тӥ вӧзын ми котьку шудоесь.

Вераськиз Юлия Щербакова