Бадӟым пумиськон

Кирпич куспе тырем тӧдьы сюй тусо апараез но лы кадь чурыт улэ. Сю арлэсь кема сыло ини таӵе кирпичен лэсьтэм юртъёс. Жаль, али дыре уг лэсьтӥсько ни сыӵе кирпичъёс... Оло, революция дырысен ик, дыр... Вунэмын ни сое лэсьтон амалъёс. Жаль!

Асьме котырысь гуртъёсын одӥг-ог вань на али таӵе вашкала юртъёс. Соос — отын «Достопримечательность» чотын, вашкала историез данъясь Памятник выллем сыло. Сырья гуртын ас вакытаз соос трос ик луиллям — ог даслы матын. Кужмо эшдяро семьяос, ог-огзылэсь адӟем карыса, арбери-ваньбур тыриськон кладовойёс пуктылӥллям. Нэгызъёссы лябен но мар, турлы аръёсы соос сэртӥськылӥзы ни. Туннэ нуналлы кылемын вить таӵе юртъер. Куинез нимаз кузёлыкъёслэн, арбери тыриськон инты чотын уло соос. Кыкез, гурт шорын ик: вуж школалэн улыно-вылыно юртэз но соин артэн али дыре ужась клуб. Таоссэ лэсьтӥз ог сю ар талэсь азьло Ивашов Егор Алексеевич. 1930-тӥ арын сое ассэ куинь пиосыныз, кенъёсыныз валче раскулачить карыса, Сибире келяллям...

...Ципья черкогуртлэн шораз ик, черкен артэ, улыно-вылыно бадӟым юрт сылэ. 1990-тӥ аръёсы, отын аракен вузкарон «Арыш май» кебить усьтон муген, юртъерлы туала тус пыртыны шуыса, сое туала кирпичен шобыртӥзы. Абрамова Елизавета Егоровналэн гожъямезъя (Азьлане  20.08.2014 ар: Гумыр ортче, улон воштӥське») та юртлэн кузёез луэм Сырья гуртысь узыр —Ивашов Егор Алексеевич... Ӧйтод... Оло, озьы но, дыр... Лиза апайлэн гожъямезъя ик, ас дыраз котыр ёрослы тодмо луэм данлы Ципья базарен но со ик, Ивашов — Каляка Лёгор кивалтэм. Таиз сярысь но «озьы вал» шуыса туннэ меӵак вераны уг быгатӥськы...

Куддыр, историез бугыръяку, паймисько бигеръёслэн паймемзылы! Туспуктэмъёсысь вашкала выжыосмылэн улыно-вылыно коркаоссы, балконъёсын тузыяса лэсьтэм улыно-вылыно кенасъёссы шоры учкыса, амалтэм чабкисько ик соос: «Неужто сокем узыр улӥллям удмуртъёс!»

Можга ёросысь Черёмушки посёлокысь Плотников Михаил Александровичлэн тодэ ваёнысьтыз: «Калякаосыз келям беразы, Мирон Педорез (бабаймес) - Плотников Фёдор Мироновичлэсь семьязэ но раскулачить карыса келяны туртто вылэм. Ион Тимофеез ляльчиын ужатыса возе шуыса. Со озьы луымтэ. Ионъёслэн музъемзы пичи луэм, вал вордэмзы луымтэ. Соослы милям бабай вал сётыса, гырыса-кизьыса улbллям. Каньдрать Григорей - Чернов Григорий Матвеевич озьы шуэм: Мирон Педорез раскулачить карытозь, кизэ ӵоге - соку солэн ужамез-узырмемез уз луы ини»...

Бадӟым пумиськон сярысь малпан кылдӥз кылем арын Сырья клуб борды синпелет пул юнматыку, Обнинскысь вуэм Сергей Иванович Фомин вераськыку. Бадӟым пумиськонэ ӧтемын Россилэн пӧртэм улосъёсаз пазьгиськем Каляка Лёгорлэн выжыосыз. Бадӟым пумиськонлэн мугез — гуртлэн историезлэсь тодмотэм бамъёссэ утчаса-люкаса, книга кылдытон. Таӵе ик валтӥсь мугез – вашкала керпичен лэсьтэм Ивашовъёслэсь юртъеръёссэ (али дыре ужась клуб но улыно-вылыно вуж школа но медпункт; вылыназ — улэ Удмуртиысь вуэм семья) «ЮНЕСКО-лэн бурд улаз» — гурт калыклэн, интыысь кивалтӥсьёслэн асваланазы (самосознаниеязы) пыртон но весяклы утиськись исторической объектъёслы пӧрмытон. Та понна улыно-вылыно вуж школа борды но синпелет пул юнматӥськоз. Клуб бордысьсэ кылем арын Балтач ёрос бюджет тӧляз. Туэзэ — 12600 манет тыр усем пуллэсь дунзэ, ас вакытаз отын дышетскем но эмъяськем гурт калык ӝутоз.

Бадӟым пумиськон ортчоз 7-тӥ августэ Сырья клубын, таӵе пуштросэн:

– кыдёкысь вуись куноосты пумитан: 13:00 часозь;

– «Калыкъёслэн Эшъяськонзы» Ципьяысь музеен, Сырья гуртэн тодматскон: 15:00 часэн;

– Ивашовъёслэн улэм корка бордазы синпелет пул усьтон: 19:00 часэн;

– «Ивашов Егорлэн выжыез» нимо стенд усьтон но «Ивашов Егорлэн выжыез - Сырья гуртлэн историезлэн бамъёсыз» конференция: 19:30 часэн;

 Бадӟым пумиськонэ люкаськемъёслэсь мылкыдъёссэс шулдыртозы нылпиос но «Сырья зоутъёс» ансамбльысь апайёс. Татын ик радъяськоз «Кырӟалэ, эшъёс, кырӟалэ!» книгаен вузкарон. Дуныз 500 манет.

Гажано лыдӟисьёс, ӧтиськомы тӥледыз но та Бадӟым пумиськонэ пыриськыны!

Пыронэз  бушын.

Леонид Сапожников, Сырья завклуб

Фото: автор