Балтасьын ортчиз удмурт лулчеберетлы сӥзем яркыт праздник

Котькуд ар Татарстан аспӧртэм ужрадэз — удмурт лулчеберетъя «Мудорвай» нимо элькун вожвылъяськонэз — ортчытон инты луэ. Та конкурс нылпи садэ ветлӥсь пиналъёслы но покчи классъёсын дышетскисьёслы быгатонлыкъёссэс возьматыны, йӧскалык лулчеберетъя паймымон дуннее выйыны но шаеренызы данъяськонэз шӧдыны луонлык сётэ. Но тужгес валтӥсез: котькуд пыриськись таӵе бадӟым ужрадэ пыриськемлэсь вунонтэм мылкыдъёс, шумпотон басьтэ. 

«Мудорвай» конкурс удмурт калыклэсь лулчеберет мерассэ (наследизэ) егит поколение пӧлын утён но вӧлмытон вылысь радъяське. Арлы быдэ ёросамы сюосын нылпиос быръён туръёсы пырисько, паськыт аудитория азьын вераськыны луонлык басьто. Конкурсэ пыриськон нылпиослы творчествоя быгатонлыкъёссэс волятыны юрттэ, астэ ачид дунъяны дышетэ но аслыд оскон ватса. Озьы ик со, патриотизм мылкыд но йӧскалык сям-йылолъёсты гажан мылкыд пыӵатыса, пиналъёсты вордскем шаерлэн лулчеберетэныз тодматыны туж умой амал но луэ.

Концерт ӵоже учкисьёс чебер кырӟанъёсты, эктонъёсты но сцена искусствоез возьматӥсь пиналъёслэн устолыксылы шумпотыны быгатӥзы. Нылпиос удмурт калык гуръёсты, авторской кырӟанъёсты но кылбуръёсты быдэстыны быгатэмзэс возьматӥзы, чебер калык дӥсьёсын но задор эктон номеръёсын синмаськытӥзы. 

— Туэ «Мудорвай» вожвылъяськонэ пыриськон понна Балтась ёросысен ваньзэ 66 заявка вуиз но, куинь зонаын ортчем быръён этапъёсын 235 нылпи аслэсьтыз быгатонлыкъёссэ возьматӥз. 39-эз тужгес усто номеръёс ёрос этаплэн гала-концертаз ортчизы. Озьы та нуналэ Балтась лулчеберетъя юртлэн сцена вылаз 175 пинал выступить кариз. Соос ваньзы дипломъёсын но кузьымъёсын пусйиськизы. Пусйыны кулэ: арысен аре та конкурс кужмоя, паськыта, чебергес луэ. Мон оскисько, азьпалан но со аслэсьтыз пуштроссэ, чеберлыксэ но кулэлыксэ уз ышты шуыса, — вера Балтась ёросысь удмуртъёслэн «Кенеш» НКА-зылэн тӧроез Ольга Пчельникова.

Шумпотымон, «Мудорвай» вожвылъяськонэ мукет калыкысь нылпиос но мыло-кыдо пырисько. Та ас черодаз эшлыко кусыпъёслы, конкурслы паськыт вӧлмыны луонлык сётэ. Калыкъёс куспын эшлыко кусыпъёс, соослэн кулэлыксы сярысь ужрадын Балтась ёросысь исполнительной комитетлэн кивалтӥсезлэн воштӥсез Ильгам Гайнутдинов но вераз.

Конкурслы йылпумъянъёсъя жюри пӧртэм номинациосын (кырӟан, эктон но кылбур лыдӟон) вормисьёсты шараяз, ваньзылы пичи артистъёслы дано данъетъёс сётӥз. Со сяна, «Дуслык» обществолэн кивалтӥсез Николай Григорьевич Колоколов пиналъёсты ческыт саламъёсын, нош Татарстанысь удмуртъёслэн НКА-зы кузьымъёсын шумпоттӥз. Ужрадлэн куноосыз конкурсэ пыриськем пиналъёслы, соослэн кивалтӥсьёссылы, анай-атайёслы тау каремзэс веразы, дасяськемзылэсь вылӥ уровеньзэ пусйизы. Соос оско, та арлы быдэ ортчись конкурс удмурт калык сям-йылолъёсты утён но нылпиос пӧлын йӧскалык лулчеберетэн тунсыкъяськон мылкыдэз ӝутон понна бадӟым ужрад луэ шуыса.

Конкурслэн нимыз ӟуч сямен «Росточек» шуыса чузъяське. Зэм но, нылпиос ненег пушйись вайёс выллем, кудъёсыз асьсэлэн энергиенызы но творчествоенызы котырысь улосэ шуныт мылкыд кузьмало, чеберлыкез вӧлмыто. Соин но ум вунэтэ: макем ӟеч асьмеос, бадӟымъёс, утялтомы со «вайёсты», сокем ӟеч соос пушъёзы.

Тодады вайытӥськом: туэ «Мудорвай» конкурс укмысэтӥзэ радъяськиз. Пиналъёс удмурт кылын кылбур лыдӟон, кырӟан но эктон номинациосъя вожвылъяськизы. Матысь дыре ёросысь тужгес устоосыз пиналъёс Казаньын выступить карозы. Оскиськом, соос республикаын но асьсэды дано возьматозы шуыса.

Ужрадысь туспуктэмъёс татын: https://baltaci.ru/photo/mudorvai-2025

Балтасьын ортчем гала-концертэз учкемды луоз татысь: https://vk.com/wall-65275507_152170

Фото: Алсу Надршина