Берпуметӥ гырлы — бадӟым улонлэн кутсконэз

Аслэсьтым нырысетӥ вамышъёсме мон лэсьтӥ Вуж Кушкет гуртын. Татын ик нырысьсэ школае мынӥ. Дышетӥсе — Светлана Михайловна Карабаева (али но дышетэ гуртысь школаямы ик), ас бордаз ньыль нылпиосты кыскиз — кык пиез но кык нылэз. Котькудмы аспӧртэмлыко характерен, кышкасесь. Соин ик тодон-валан басьтонэ кыстӥськыны дышетыны туж секыт луиз солы. Ӵошен ми дышетским гожъяськыны, лыдӟыны но асьмелэсь малпанъёсмес шара вераны. Куддыр дышетӥсьлы но секыт вал, милемлы но: нырысетӥ «5» понна шумпотон, нырысетӥ синкылиос — ваньмыз пыр ортчоно луиз ӵошен. Нырысь-валысь туж кышкаськом вал шонертэм вераны. Дыр ортчемъя вань ужъёсмес ӵош лэсьтыны дышетским. Ньыль ар туж ӝог ортчиз, валаса ик ӧм вуттэ, кызьы ми, пичи пиналъёс, вамыштӥм бадӟым шуггес улонэ.

Собере вуим артысь гуртэ — Шор Кушкет (Ӟаны) гуртэ. Татын ваньмыз мукет вал: пичи дуннеысен ми вуим бадӟым дуннее. Татын милемды ас бурд улаз басьтӥз Светлана Николаевна Павлова (али ӟуч кылъя но литературая Казаньын дышетэ). Татын ортчизы сизьым дышетскон аръёсмы. Трос но ӧвӧл кадь, ӧжыт но ӧвӧл. Кыӵе гинэ учыръёс ӧй вал, но соос ваньмыз йырам кылизы. Котькуд нунал ми выльзэ тодыны тыршим, котькуд нунал школа «семьяямы» воштӥськонъёс луизы. Дыр ортчемъя вуиз 11 класс, берпуметӥ куартолэзь, экзаменъёс. Тодэ ваёнъёсам асьык суред: азьпал улон сярысь шугъяськонъёс. Юрттӥзы дышетӥсьёслэн но матысь адямиослэн дэмланъёссы.

Ортчиз ни дас одӥг ар… Табере мон ачим дышетӥсь, аслам дышетскем школаям, соин ик 9-тӥ но 11-тӥ классысь выпускникъёс шоры учкыса, тодам вайисько со чебер но шулдыр вакытмес, ӵош дышетскем эшъёсын герӟаськем пӧртэм учыръёсты. Сизьым ар куспын соос трос вал, пӧртэм мылкыдъёс: умой но, ӝожгес палъёсыз но.

Куарусён толэзе шумпотӥськом, выль дышетскон ар кутсконлы юн оскиськом, капчи малпанъёсын бадӟымесь планъёс пуктӥськом, нош куартолэзе — мӧзмиськом, дышетскон арлэн берпуметӥ дыръёсызлы куанӥськом, 9 толэзь куспын дышетэм пиналъёслэсь воштӥськемъёссэс адӟыны тыршиськом. Мон малпасько, ваньмыз ас дыраз луыны кулэ: котькуд нылпилы школаысь ӝутскем мылкыдын кошкыны кулэ, аслаз дышетӥсьёсызлы азьланяз юн пыкет луыса, шонер сюресъёстӥ лёганы. Валтӥсез юан: вань-а берпуметӥ гырлылэн зэмос тодметэз? Кулэ-а та праздниклы сыӵе бадӟым саклык висъяны? Одно ик кулэ! Нылпи 11 ар куспын трос тодон-валан басьтыны кулэ, малы ке шуоно вуоно ужзэ но вуоно улонзэ со кутске школа бордысен. Школаын пиналъёс асьсэды котькуд ужын эскерыны быгато, тунсыкъяськонъёссэс но быгатонлыкъёссэс зэмос бадӟым улонэ выжто. 11 ар куспын котькудӥз лэсьтэ янгышъёс, соостэк улон туж кӧс луоз, соин ик вань дышетскон — янгышъёс вылын ужаса, шонер сюрес шедьтыны но улонын зэмос тыршись адями луыны.

Туэ Ӟаны шоръёзо школаез йылпумъяло 17 нылпиос, соос пӧлысь 4-ез — 11-тӥ классысь пиналъёс, 13-ез — 9-тӥ классысь. Ваньзы соос та аръёсты, малпасько, пайдаё ортчытӥзы, дышетӥсьёсынызы огкылысь вуонозы сярысь вераськыса, улонын асьсэлы тунсыко но шонер сюрес бырйыса, выль эшъёсты шедьтыса. Кин тодэ, оло, кӧня ке ар ортчыса, соос школае бурдъяськем мылкыдын вуозы но, дышетӥсьёссылы бадӟым тау шуозы школаын ортчем аръёссы понна. Соос тодо, котькуд дышетӥсь аслэсьтыз дышетэм нылпизэ юн яратэ, куддыр тышкаське ке но, котьку сюлмаське со понна, бадӟымесь осконъёсын котькудзэ зэмос улонэ лэзе.

Мар верало берпуметӥ гырлылэн куараосыз? Котькудӥз понна со нимаз малпанъёс. Дышетӥсь но анай-атай понна — со быдэ вуэм нылпи понна но солэн вуоноез сярысь сюлмаськон, ӟечезлы юн оскон. Нылпи понна — со экзаменъёс сярысь сюлмаськон, тросгес баллъёс люканы тыршон, вань тодэм-валамзэ, ассэ выль дышетскон интыын умой паласен возьматон. Гырлы куарая котькуд нылпи малпаське азьпал улонэз сярысь: кыӵе юанъёсын, кыӵе шумпотонъёсын но куректонъёсын со пумиськыны быгатэ бадӟым улонын. Школаез йылпумъям нылпи туж юмал на, со котькуд ивортодэтэз йӧн-йӧн лыдэ басьтэ. Соин ик шонер сюрес вылэ султыны солы туж секыт, но, дораз луизы ке зэмос юрттӥсь но яратӥсь адямиосыз, со ваньмыз пыр туж капчиен ортчыны быгатоз.

Мар вераме потэ школаез йылпумъясь нылпиослы? Котькуд адямилэн улоназ сётэмын туж трос быгатонлыкъёс, соосты шара возьматон понна кулэ юн мылкыд но луонлык. Соосты шонер уже кутыны тросэз кышкалоз, уз но дӥсьты, солы ик дышето школаын — аслад малпанъёсыдлэсь танӥськытэк бадӟым ужпумъёсты быдэстыны. Тыршоно астэ котькуд ужын возьматыны, соин ик сётэмын адямилы улон, нуналысь нуналэ умойгес, визьмогес но юнгес луыны. Сюрес кутсконын янгышъёс лэсьтыны кышкыт ӧвӧл, быгатоно со янгышъёсты валаны но йылпумъянъёс лэсьтыны! Берпуметӥ гырлы куара — улонлэн кутсконэз гинэ, со сюрес вылын трос пӧртэм шумпотонъёс но шуг-секытъёс пумиськозы, но улӥз ке пушкад ӟечезлы юн осконэд, нокин но сюрес вылысьтыд палэнтыны уз быгаты.

Азьпал улонды мед луоз шундыё, пальпотӥсь ымныръёсты мед вуттозы чебересь малпанъёстылэн быдэсмоназ. Сӥзисько тӥледлы улонлэн шонер ӧрезъя мыныны, сюлэмдыя кельшись улон бырйыны, ноку но киостэс эн лэзе, тӥляд зэмос кужымды лэйкась океан выллем: зӥбыт но пумтэм-йылтэм. Дышетӥсьёстылэн сюлэмъёсазы шунды сиос выллем буйгатӥсь но ненег тодэ ваёнъёсын гинэ мед кылёды. Ӟеч сюрес тӥледлы, выпускникъёс!

Юлия Щербакова