«Чакара» фестивале балтась удмуртъёс но пыриськизы

Фестивале Россилэн 13 улосвылъёсысьтыз ог 80 пала удмурт коллективъёс вуизы: Башкортостанысь, Удмурт Элькунысь, Пермь Шаерысь, Москваысь, Санкт-Петербургысь, Тюмень, Свердловск улосвылъёсысь, асьме элькунлэн ёросъёсысьтыз. Та сярысь иворто Кукмор ёросысь ужъюлтошъёсмы, «Вамыш» газетын ужасьёс. 

Шумпотымон, Татарстанысь пыриськемъёс пӧлын Балтась ёросысь коллективъёс но вань: Турья гуртысь «Марӟан» но Покчи Лӧзя черкогуртысь «Вуюись» ансамбльёс. 

— Та фестивале пыриськон милям сямамы пыӵаз ини, шуыны кулэ. Тыршиськом арлы быдэ отчы вуылыны. Эшъяськон кусыпъёсты юнматыса, кыдёкысь сюрес вылэ потыны но ум кышкаське, луонлык шедьтыны тыршиськом. Кылем арын, кылсярысь, «Чакара» Камьсӧр удмуртъёслэн музъемазы, Башкортостанын, ортчиз вал. Отчы но вуылӥмы. Нош гужем, кысык уж вакытэ, дыр шедьтыса сюрес вылэ — матысь-а со, кыдёкысь-а — потыны котькин соглаш уз луы. Соин но, учырен пайдаяськыса, коллективелы, Кушкетысь мызганчилы Алексей Павловлы, солэн кузпалэзлы Генриетталы, та выллем ужрадъёсы мыло-кыдо пыриськемзы понна, туж бадӟым таукылме верасько, азьланяз но ог-огмес валаса уломы шуыса оскисько. Нош праздник сярысь верано ке, со, котьку сямен, шулдыр ортчиз. Тау Кукморысь бускельёсмылы, туж умой пумитазы, куно каризы. Фестивальлэсь программазэ «Ми кизим» шуыса нимаськем чебер удмурт композициен Башкириысь Янаул ёросысь коллектив усьтӥз. Праздник ӝытозь яркыт йӧскалык дӥськутэн самодеятельной артистъёслэн но нылпи коллективъёслэн шудэмъёсынызы кыстӥськиз, — фестивальлэсь кылем мылкыдъёсыз сярысь вера Турья гурт клубен кивалтӥсь Ирина Исьмекова.

Бен, турьяос «Чакара» фестивальын ӵем куно луо. Нош тани Покчи Лӧзя лулчеберетъя юртысь самодеятельной артистъёс туэ нырысьсэ та ужрадэ пыриськизы.

— Бен, ми нырысьсэ ветлӥмы та фестивале. Туж кельшиз, туж умой милемыз пумитазы. Ужрадлэн атмосфераез но лякыт, сюлмо вал. Сомында коллективъёс лыктӥллям: Башкириысь кӧня коллектив, Свердловск палъёсысь, Москваысь, Санкт-Петербургысь, Удмуртиысь коллективъёс вал. Монэ туж паймытӥзы но синмаськытӥзы коллективъёслэн дӥсьёссы. Макем чебер, яркыт но йӧспӧртэм ик удмурт калыклэн дӥськутэз! Котькуд коллективлэн аслаз, нокыӵе мукетэзлы тупасьтэм! Туж узыр программа дасяллям кукморъёс, ог 60 мында творческой номер люкаськиз. Огъя вераса, милемлы ваньмыз кельшиз, туж шумпотыса мынӥмы, туж шумпотыса бертӥмы. Бадӟым тау «Чакара» фестивалез радъясьёслы но ортчытӥсьёслы, пыриськыны луонлык кылдытӥсьёслы. Пумтэм тау коллективысьтым чебер апайёсылы, соос туж мыло-кыдоесь, ярато та выллем ужрадъёсы пыриськыны, — шуэ Покчи Лӧзя лулчеберетъя юртысь устолыкъя кивалтӥсь, «Вуюись» ансамбльлэн кивалтӥсез Галина Петрова.

Фестиваль туэ 17-тӥзэ радъяськиз, нош Кукмор музъем вылын — 2-тӥзэ (нырысетӥзэ Кукмор карын 2017-тӥ арын ортчиз вал). 

Туэ ужрадэз сӥё-дано усьтӥзы но люкаськемъёслы шуныт кылъёс веразы Кукмор ёрослэн главаезлэн воштӥсез Резеда Гаянова, Удмурт Элькунысь Эшъяськон юртлэн кивалтӥсез Юлия Шахтина, Башкортостанысь удмуртъёслэн национально-культурной центрзылэн кивалтӥсез Людвиг Зидымаков, Ижкарысь Камсьӧр удмуртъёслэн йӧскалык центрзылэн тӧроез Флюра Чибышева.

Фестивальлэн ужамез улсын школаын дышетскисьёслы форум но удмурт школаослэн директоръёссылы но поселениослэн главаоссылы котырес ӝӧк ортчиз шуыса ивортэ на «Вамыш» газет.