Чебер Сырья (фото)

17-тӥ даурын ик инъет басьтэм гурт али но улэ, азьлань мынэ. Коркаослэн чеберзы, социальной объектъёслэн луэмзы калыклэсь эшъяськыса, тыршыса улэмзэ возьмато. Вань покчиёзо школа-нылпи сад комплекссы, фельдшер - акушер пунктсы, культура юртсы, магазинзы. Нош тужгес кулэез луэ вылӥ показательёсын ужась парсь фермазы, со калыклы ужан инты сётэ.
Сырьяын вылесь, чеберез валаса пуктэм коркаос трос. Пуктэмъёссы кемагес мед сылозы шуыса, адямиос кирпичен лэсьтӥськыны тыршо. Туннэ гуртын 62 улоно корка лыдъяське, 274 адями улэ.

Сырьяын тужгес но пересез улӥсь - Прокопьева Анастасия, 1924 арын вордскемын, нош пиналэз - Арсен Галяутдинов, 2016 аре 13 июле вордскемын.

Гуртлэсь улонзэ умоятон понна самообложениен люкам уксё кутӥське. Сырьяын котькуд тыкырыкын векчи из вӧлдэмын. Туэ 300 манетэн люкаллям, государствоен сётэм уксёен валчеяса, 282 сюрс луэм. Сое урамъёсты тупатыны кутӥллям.

Гуртын чылкыт, чебер социальной объектъёс вань бере, проблемаос но ӧвӧл, дыр, ини шуыса, юай гурт старосталэсь Леонид Сапожниковлэсь. Со таӵе валэктон сётӥз: «Проблемаос вань ке но, соосыз быдэсъяны тыршиськом». Тани али дыре гуртын кулэ луэ нылпиослы шудыны спортивной площадка. Сырьяын уло 25 нылпи садэ ветлоно пичиос но 17 начальной школаын дышетскисьёс. Тамында нылпи вань бере, гуртлэн азьланезлы но спортивной площадкалэн луэмезлы сырьяос юн оско.

Сырьяын Ивашевъёслэн мерассы утиське
Сырья гуртлэн урамъёстӥз ветлыку, горд кирпичлэсь лэсьтэм кык юрт синме йӧтӥз. Утёд ке, та даур но ӝыны талэсь азьло ӝутэм юртъёс данлы Ивашевъёслэн семьязылэсь кылем мерас вылэм.
XX-тӥ даурлэн кутсконаз, мукет улосъёсын кадь ик, Ципья палан но вузкарон но ужбергатон удысъёс азинлыко вӧлмыны кутско. Со вакытэ Сырья гуртын улэм Ивашевъёслэн семьязы но та удысын тодмо луэ. Хозяйстволэн ужъёсызъя тэльбуго Егор Ивашев киын луэм. 16 муртлэсь сылӥсь семья бадӟым хозяйство кутыса улэм. Бадӟым кык этажо корказы, паськыт амбаръёссы, итымзы, дуриськон куалазы, ву вукозы, емышо бадӟым садзы, шӧдскымон бадӟым музъем ваньбурзы, бакалея лавказы луэм. Озьыен, Егор Ивашев но солэн семьяез нокыӵе ужлэсь кышкаллямтэ, трос пӧртэм ужен выриллям. Данлы Ципья базарын но соослэн 6 вузкарон интызы луэм, шуо. Али дыре Ципья гуртысь «Арыш мае» магазинлэн юртэз но Ивашевъёслэн шуыса верало. Озьы ик, калык верамъя, соослэн шӧдскымон бадӟым зарниен запассы но, пе, луэм. Но октябрь революция бере кутскем огыр-бугыр, выро-гопо улон та семьяез но палэнтӥ ортчымтэ: ваньбурзэс талаллям, асьсэсыз мурт шаере келяллям. Енисей улосвылысь Соврудник (Советский рудник - ред.) посёлокын 1948-тӥ арозь поселениын луиллям, кема аръёс ӵоже отын улӥллям. Жаляса верано, бадӟым семья таркаськем. Егор Ивашевлы, трос шуг-секытъёс адӟыса ке но, вордскем музъемаз берытскыны шуд усем ик. Но, жаляса верано, вордскем шаераз бертыкуз - оло, ссылкаын адӟемъёсыныз сэрен тазалыкез лябӟемысь-а, оло, тодэ ваёнъёсын сэрен мылкыдэз бугырскемысь-а - сюлмыз кутэм но вордскем гуртэз дорын ик кулэм со. Ссылкаын адӟем шуг-секытъёсты чидаса улэп кылем семья членъёсыз 1990-тӥ аръёсы, Сырья гуртын луэм юртъёссылы компенсация курыса, судэ вазиськиллям. Судлэн решениезъя соослы компенсация (калык верамъя 9 сюрс манет мында) тыриськем.

Туннэ нуналэ Ивашевъёслэн выжы нюжазы азьвыл СССР-лэн пӧртэм сэрегъёсаз вуттэ, озьы ик бускель Марий Эл Республикаысь Бадӟым Карлыган гуртын но та выжыысь семьяос вань, пе.
Сырья культура юртлэн кивалтӥсез Леонид Сапожников рос-прос, дыртытэк гинэ ас гуртэныз, историеныз тодматӥз. Али дыре Ивашевъёслэсь нимзэс пыраклы вунонтэм карон вылысь ӟеч югдурын утиськыса кылем юртъёсы мемориал пул юнматон сярысь малпанэн улэ вылэм со. Трос пӧртэм организациосы вазиськем ке но, та ужпум али быдэстэмын ӧвӧл, ялан со «финанс» шуэм югдур могӟет луэ. Но Леонид Дмитриевич осконзэ уг ышты, малпам уж быдэстӥськоз, шуэ со.

Шуг-секытъёсты каньыллык воштэ
Лымы трос люкаськемысь, 2010-тӥ арын тулыс Сырья гуртысь культура юртлэн липетэз ёмыра. Вылӥысен, липетысь лымыез куяно шуэм косон луэм ке но, кузётэк кылем юртэз нокин но кулэ карымтэ. Али яра та кышкыт учыр дискотека дыръя луымтэ шуыса, асьсэсыз буйгато сырьяос. Районысь культура очагъёсысен, школаосысен лыктыса юрттэмъёслэн тыршеменызы ёмырам липет сэрттӥське, утялтӥське. Вылез но лэсьтӥське. Ӵапак соку ини Леонид Сапожниковлы клубен кивалтонэз оско. Леонид Дмитриевич Сырья гуртлэн, огъя вераса, районысь удмуртъёслэн «зарни» адямизы. Солэн общественной ужъёсты быгатыса радъямез синмаськытэ но паймытэ. Со, районысь удмурт калыкез огазеяса, «Кенеш» организацилы нэгыз понэ, солэсь ужзэ радъя, со дыре ик районысь удмурт калыклэн историез, сям-йылолъёсыз сярысь трос материалъёс люкаса, книга поттон малпанэн ветлыны кутске. Кема аръёс ӵоже Сырья покчиёзо школа-нылпи сад комплексэн кивалтыса, удмурт пиналъёсты бигер кылъя но дышетэ. Фермерской движение кутскем бере, со та удыс борды но басьтӥськыса оскалтэ. 6 ар ортчыса, та ужезлэсь палэнске, малы ке шуоно солэсь вань дырзэ общественной ужъёс басьто. Туннэ нуналэ гуртлэн старостаез луыса, калыклэн улон-вылонэз капчи, мылкыдыз шулдыр мед луоз шуыса тырше со.

Верано кылме культура юртысен кутскиськем вал. Вуж, куштӥськем югдуре вуэм зданилы ремонт лэсьтон ужпумын со дырысь главаен Марат Зариповен, собере ини Рамиль Нутфуллинэн огкыл шедьтыны быгатэ Леонид Дмитриевич.

- Районысь исполкомлэн кивалтӥсез Рамиль Шакиров, финанс-бюджет палаталэн кивалтӥсез Рафис Ильясов, со дыре культура удыс понна кылкутӥсь карыса юнматэм Радик Михайлов - ваньзы ик юрттэт кизэс сётӥзы. «Труд» хозяйство финанс ласянь ӧй ке юрттысал, Ципья поселение кичӧлтон ке ӧй сётысал, та уж ӧй пӧрмысал. Мон кивалтӥсьёслэсь: Рашит Хадиевлэсь, Азат Нотфуллинлэсь юрттэтсэс нунал потэм шӧдӥсько, - шуэ Леонид Сапожников.

Леонид Дмитриевич сярысь кинлэсь гинэ эн юа, ваньзы ик солэсь удмуртлыко, удмурт калык понна тыршись азьветлӥсь луэмзэ пусъё.

Вакиф ЗАКИЕВ