Дор палаз сое туж ярато, дунъяло но данъяло

«Маэстро вӧзын, сюлэмзэс поныса, ӟигарзэс, мылкыдзэс, куараоссэс, пыдъёссэс жалятэк, кырӟазы-эктӥзы „Айкай“ театрысь артистъёс но. Уно гинэ чебер дуэтъёс но выль номеръёс кылдытэмын вал юри та ӝытлы. Геннадий Кузнецовлэсь творчествозэ котыр ласянь возьматон понна, программае „Айкай“ театрлэн зарни шыкыс кырӟан-эктонъёсыз но пыртэмын вал» — гожтэ та сярысь «Айкай» кун театр аслаз Вконтакте мерлыко вотэсысь огиназ.

Геннадий Васильевичен ӵош та шудо минутъёсты люкизы солэн матысь адямиосыз — семьяез, ӵыжы-выжыосыз, эшъёсыз, ужъюлтошъёсыз, озьы ик ваньзы, кин гажа но яратэ солэсь творчествозэ. Кыдёкысь сюресэз матын карыса но артистлэн вордскем музъемезлэсь саламзэ вуттыса, аспал калыкезлэсь гажамзэ возьматыса, пыриськиз та сӥё-дано ужрадэ Балтась ёросысь исполнительной комитетлэн кивалтӥсезлэн воштӥсез Ильгам Гайнутдинов но. Со Геннадий Васильевичлы сюлме пыӵамон кылъёс вераз но, Балтась ёрослэн кивалтӥсезлэсь дуно кузьымзэ — 100 ар талэсь азьло лэсьтэм самоварез — кузьмаз. Ильгам Фидаелевич пусйиз, вордӥськем палъёсаз Геннадий Кузнецовез туж ярато, дунъяло но данъяло шуыса.

«Та шуныт мылкыдъёсын тырмем ӝытэ трос ӟырдыт ӟечкыланъёс чузъяськизы. Геннадий Васильевичез сюлмысь ӟечкылаз „Айкай“ театрлэн кивалтӥсез Пётр Данилов но ужъюлтошъёсыз. Мур гажаса сӥлы каризы Удмурт Элькунысь лулчеберетъя министр Владимир Соловьёв но Удмуртиысь Кун Кенешлэн лулчеберетъя, туризмъя но йӧскалык политикая ялан ужась комиссилэн тӧроез Андрей Ураськин. Шуныт кылъёс веразы матысьёсыз, тодмо удмурт адямиос но огшоры калык. Сюлме пыӵась кырӟанъёс, задор эктонъёс сценаез чебертӥзы. Огъя вераса, концерт туж умой ортчиз, чебер кылъёс но, сяськаос но, кужмо кичабонъёс но туж трос вал!», — шумпотыса верало Геннадий Васильевичлэн ӵыжы-выжыосыз.

Туспуктэмъёс но видео Елена Фоминалэн