«Дуслык» возёсысь бадӟым опытэн скал кыскись

Туала дыре но, азинлыко технологиослэн дауразы, скал кыскисьлэн ужез тужгес секыт ужъёслэн одӥгез луыса кыле. Скал кыскисьлэн тыршемез бордын луэ возёслэн тыр улонэз.

Тае котькин умой вала. Соин арлы быдэ ёросамы ортчись Азьмынӥсьёслэн слётазы гурт возёсын тыршись аспалъёсмес — скал кыскисьёсты, пудо утисьёсты, механизаторъёсты, ӧнерчиосты — тужгес вылӥ данъяло. Одӥгез сыӵе данъямон адями — кема аръёс ӵоже «Дуслык» обществоын скал кыскись луыса ужась Светлана Александровна Михайлова. 2021-тӥ арын вылӥ показательёсты возьматэмез но гурт возёсын азинлыко ужамез понна сое туэ Балтась ёрослэн главаез Рамиль Нутфуллин Таукарон гожтэтэн пусйиз.   

Гондыргуртын вордскем Светлана (ныл фамилиез Петрова) Гондыргурт, Покчи Лӧзя, Балтась школаосын дышетскыса 10-тӥ классэз йылпумъямез бере Йошкар-Олаысь медициная колледже дышетскыны пыре. 1988-1991-тӥ аръёсы дышетскыса, фельдшерлэсь ӧнерзэ басьтэ но Мари-Турек ёросысь Сизнер гуртэ ӧнерезъя ужаны интыяське.

— Дышетсконме йылпумъян арын ик Сала Кушкет гуртэ картлы кошки, соин Сизнерын кема ужаны ӧй вутскы — ог ӝыны ар мында гинэ. Сала Кушкетын улыны кутскеме бере, аслам ӧнерея ик уж шедьтыса интыяськыны малпанъёсы вал. Но со уж ласянь секыт аръёс вал, соин ӧнерея уж ӧй шедьты. Та муген ик 1993-тӥ арын Сала Кушкет гуртысьтымы фермае ужаны интыяськи. Нырысь секыт вал, собере дыши.

Кӧня ке ар ӵоже ошъёсты сюдэмез бере, Светлана Александровна фермаязы скал кыскись луыса ужаны кутске. Со дырысен кышномурт та ужын ини. Ужзэ капчиен уг лыдъя ке но, скал кыскись ӝожтӥськыса номыр ӧз вера. Вазь ӵукна ужан интыязы лыктыса, соос пудоослэсь сиён тусьёссэс, пыдулъёссэс сузяло, скалъёсты утялто. Берлогес скалъёсты кыскыны кутско. Собере куро пыртоно, сое вӧлдоно… Али ужъёс таин но уг йылпумъясько. 

Пудоосты яратӥсь кышномуртэз скалъёс но ярато вылэм. Светлана Александровна но солэн ӵош ужась эшез Нина Николаевна Семёнова вылын 65 йыр скал лыдъяське. Скалъёс пӧлын пӧртэмъёсыз вань ке но — асьсэды умой но урод возисьёсыз — котькудӥзлы нимысьтыз дыр висъяно, котькудӥзлы нимыныз вазёно.

— Туж тупаса ужаськомы Нина Семёноваен, ог-огмылы юрттыса, кенеш сётыса. Туала дыре уж капчиёмиз ини. Али бидонъёсты кыскаса ум ветлытӥське, йӧл трубатӥ кошке… Уждунэз дыраз сёто.

 Мынам, учырен пайдаяськыса, матысь адямиосылы но валче ужась эшъёсылы газет пыр бадӟым салам вераме потэ. Туж шумпотӥсько, йӧно но валась адямиосын ужасько шуыса. Коллективамы ваньзы мыло-кыдоесь, ноку даллашеммы но ӧвӧл. Ваньзылы сӧл-таза луыны сӥзисько, ужамы но улонамы каньыллык мед луоз, — шуиз Светлана Александровна.

Туннэ нуналэ кышномурт кузпалэныз ӵош Сала Кушкет гуртын улэ. Кузпалыз Николай Кузьмич но гумыраз фермаын тыршем адями, со «Дуслык» обществоын нырысь «Т-150» тракторен тыршиз, табере возьмась (охранник) луыса ужа. Нылъёссы Ольга но Алина Казаньын интыяськыса уло.

— Кыкнамы гинэ улӥськомы шуыса, мӧзмыны дырмы ӧвӧл, — азьланьтэ веранзэ Светлана Александровна. — Пудо вордӥськомы, мукет чыры-пыры ужъёс но трос. Мон, кылсярысь, керттӥськыны яратӥсько. Соин улонмы мӧзмыт шуыны шонер уз луы. Нылъёсмы куное бертылыса уло. Азьпалан но тазьы улӥмы ке, туж умой луысал.