Дышетӥсь, кышно, анай, кивалтӥсь, азьветлӥсь (фото)

Дышетӥсь — тодон-валан дуннее сюрес возьматӥсь кизили. Дышетӥсь — котыр ласянь быгатӥсь но ӟеч сюлэмо адями. Кужмо, чидась, визьмо, пиналъёсты валась. Со визьнодась но, юрттӥсь но, матысь эш но. 

Дышетӥсьлэн нуналэз — огез самой тодмо, ӧнерлыко праздник. Сям пыремъя, та нуналэ «зарезь» мында сяськаос, дышетӥсьёслы сюлмысь ӟечкыланъёс, сӥзёнъёс кисьтӥсько. Та нуналэ дышетӥсьёс доразы люкам тетрадьёсын уг берто, соослэсь киоссэс сяськаос но синпель кузьымъёс чеберто. 

Дышетӥсьлэн ужез — со бадӟым кылкутон, малы ке шуоно, нылпиосты гинэ дышетоно ӧвӧл, астэ но выль ужан амалъёсын утчано. Нылпиосты яратӥсь, небыт сюлэмо но со дыре ик курон пуктыны быгатӥсь, чидась но тыршись, яратоно ужезлы оскымон луись, юн мылкыдо но узыр фантазиен — таӵе ӟечлыкъёсыз луыны кулэ адямилэн, кудӥз дышетӥсьлэсь ужзэ быръе. Со сяна, туала улон но аслэсьтыз тупатонъёссэ пыртэ на: пӧртэм информационной технологиосты дышетон процессэ пыртон, нылпиосты ужрадъёсы, конференциосы, олимпиадаосы кыскон, дышетскисьёсты выль амалъёслы дышетон, кун экзаменъёслы дасян, аттестаци, квалификаци ӝутон курсъёс — кытчы гинэ пыриськоно ӧвӧл! 

Ёросамы, кыӵе гинэ дышетӥсез эн басьты, котькудӥз сярысь ӟеч кылын гинэ вераны луымон. Нимысьтыз удмурт школа ӧвӧл ке но, удмурт дышетӥсьёс котькуд удысын асьсэды яркыт но тунсыко возьматыны быгато, удмурт луэмзы сярысь шара верало. 

Одӥгез сыӵе яркыт, таланто, дӥсьтӥсь, шаплы дышетӥсь — Светлана Валентиновна Михайлова — Кугунур шоръёзо школаысь директорлэн визьнодан ужъёсъя воштӥсез но ӟуч кылъя но литературая дышетӥсь.

Светлана Валентиновна вордӥськиз Кургем гуртын 27 куарусёнэ 1970 арын. Светлана Анна но Валентин Петровъёслэн ньылетӥ нылпизы луэ. Со сяна семьяязы вал ини Полина (1960) но Марина (1966) нылъёссы, Сергей (1962) пизы, собере вордске на Вячеслав (1973) пизы.

— Котькуд гуртысь огшоры семья кадь ик улӥмы. Пудо вордӥмы, анаймы — Анна Алексеевна азьло школаын техничка луыса ужаз, берло почтае выжиз. Атаймы — Валентин Аркадьевич вань улон сюрессэ «Активист» возёсын шофёр луыса тыршиз. Со туж шулдыр адями вал. Котькуд ужын юрттэт луыны дыртӥськом вал, керетытэк, ог-огмес кылзыса но валаса. Семьяын озьы ик луыны кулэ: дыраз шуныт мылкыдъёстэ вераса, лек кылъёстэ вератэк но курыт мылкыддэ поттытэк кельтоно. Пичи дыръёсы туж трос праздникъёсты пусйиськом вал, шулдыр, капчи мылкыдэн ортчытӥм шутэтскон дыръёсты но. Нимаз ик Акашка син азе пуксе. Коркасен корка ветлыса, туж шулдыр вал. Туала улонын сыӵе шулдыръяськонъёс ӵем уг ни ортчыто. 

Дышетскон сюрес

1988 арын Светлана Ципья шоръёзо школаез йылпумъя но Кургем гуртысь клубе ужаны пыре. Ар ортчыса, Мензелинскысь педагогикая училищелэн школьной отеделенияз дышетскыны пыре. 1991 арын покчи классъёсын дышетӥсьлэсь ӧнерзэ басьтыса, Кургем гуртысь покчиёзо школаын дышетыны кутске. 1993 арын Казаньысь педагогикая университетэ пыре. Татын ӟуч кылъя но литературая дышетӥсь луон понна тодон-валан люка. 2000 арын ужан сюресэз вуттэ сое Кугунур шоръёзо школае ӟуч кылъя но литературая дышетӥсе. 2001 арын нош ик берытске Кургем покчиёзо школае. Одӥг ар ортчыса, выже Кугунур шоръёзо школае, ӟуч кылъя но литературая дышетӥсь луыса. 2017 арын Светлана Валентиновалы оско на директорлэн воштӥсезлэсь ужзэ. 

Ужан сюресэз пӧртэм сямен берытскиз, пӧртэм интыосы вуттӥз ке но, котькытын егит дышетӥсь ассэ шедьтыны тыршиз. Шуг-секытъёс луизы ке но, соосты дыраз вормыны быгатӥз. Сэзь сямо но дӥсьтӥсь нылаш ассэ бадӟым городын но шедьтыны быгатысал, дано луысал, но сюлмыз котьку вордскем палъёсаз кыскиз. Озьыен, туннэ нуналэ но со Кугунур шоръёзо школаын тырше.

Бигер школаын удмурт выжыысь дышетӥсь

Кугунур гурт поселение пыро 7 гуртъёс: Кугунур, Шуда, Дурга, Кургем, Куремьял, Кускем но Улисьял. Дурга вашкала дырысен удмурт гурт луэм. XVIII даурлэн шоръёсаз гуртэ черке пырем бигеръёс улыны интыяськиллям. Гурт кыклы люкиськем: удмуртъёс но черке пырем бигеръёс (Дурга-1 но Дурга-2). Озьыен, удмурт выжыос татын али но уло на. 

Дышетӥсьлэн нуналэзлы статья дасян сярысь малпаськыку, ӵемысь удмурт гуртъёсысь дышетӥсьёс син азе пуксё. Но, быгатэ меда удмурт адями бигер калык пӧлын улыса, удмуртлыксэ утьыса улыны? Та юанме Светлана Валентиновналы но сётӥ:

— Бигер школаын удмурт выжыысь шуыса палэнэ уг каро-а? 

— Удмурт шуыса уг учко, озьы ик ужрадъёсы пыриськисько, кенешъёс сётӥсько. Инмарлы оскон сярысь юанъёс кылдо ке, котьку шуисько: «Инмын 10 кузя адями уг бызьылы, дыр, котькуд адями понна Инмар одӥг». 3 пиосы но татын ик дышетскизы, ноку но удмурт шуыса ӝоже ӧз уськытэ, удмурт, ӟуч, бигер кылын эркын верасько. Монэ но ӵош ужасьёсы уг люко, гажаса верасько, кусыпъёсмы но туж шунытэсь.

Адями котькыӵе югдурысь потыны сюрес шедьтыны быгатэ. Макем секыт, сокем юнмаськод, зӥбыт луиськод. Адями капчи улыны дышемын бере, йырзэ малпаськытэмез чик уг поты. Соин ик дышетӥсьлэн валтӥсь ужпумез — нылпиез улонлы дасян.

Кыӵе шуген сётӥсько куддыръя выль технологиос, проектъёс, дышетон удысын воштӥськонъёс. Нош кӧня мадетъёс (отчётъёс), справкаос, приказъёс?! Ваньмыныз таин вуысь чорыгъёс кадь йыгмыт но визьбуро кивалто директоръёслэн воштӥсьёссы. Директор валтӥсь ужъёсты быдэстон вакытэ, солэн воштӥсьёсыз школаез вань удысъёсъя «гурлато». Соос — ужысь зэмос ӧнерчиос, дышетскисьёсын но дышетӥсьёсын юн кусып возисьёс. Озьы ик Светлана Валентиновна но, 7 ар ӵоже ини кивалтэт ужын тырше. 

— Тӥ 7 ар директорлэн визьнодан ужъёсъя воштӥсез луыса ужаськоды, эшшо дышетӥсь на, туала дышетон удысын куронъёс но ялан вошъясько... Кызьы кужым шедьтӥськоды котькытчы вутскыны?
— Туала куронъёс зэмзэ ик туж кыдато. Тани туэ аттестация ортчоно. Карта результативности гожъяно, котькытчы пыриськоно, кивоштӥсь ужын но вутсконо, пӧртэм ужрадъёсы пыриськоно, справкаос гожъяно, отчётъёс... Туэ 20,5 час ӟуч кылъя но литературая урокъёсы вань на. 9, 11 классын дышетскисьёсты кун экзаменъёслы дасяно. Жаляса верано, 9 классын 6 дышетскисьмы, 11 классын 1 нылаш гинэ. Нылпиосын огкадь малпанъёсын, азяд пуктэм ужпумъёсты быдэстыса гинэ умой йылпумъянъёсы вутскыны луэ. Озьы ик тыршиськом нылпиослы инъет сётыны, азьланяз шонер сюрес бырйыны юрттӥськом.

Дышетскисьёсыз сярысь

Туала улонлэн куронъёсыз дышетӥсез копак интернет пыр ужанэ кыско. Тросэз нылпиос книгаосын уг тунсыкъясько, соин пӧртэм амалэн тодон-валан сётон технологиосты нуналлы быдэ утчано, чаклано, эскероно.

— 30 ар ӵоже ужаса, нылпиосты ӵошатыны луэ, кызьы дунъясалды огъя туала дышетон сӧзнэтэз но та удысын ужаны кутскон аръёстэс? Пӧртэмлыкез вань-а?

— Одно ик. Туала нылпиос асьсэос ик зӥбыт кутэмез возьмало кадь ини. Мон ачим чурыт куараен вазьыны дышемын ӧвӧл, дышетскисьёслы ӵемысь эш луыны тыршисько. Нылпиосын огкылысь ужад ке, капчигес но, соослэн но дышетсконэн тунсыкъяськонзы бадӟыма. Тани покчи классъёсын дышетӥсьёс куддыр чурыт вазё, 5 классэ лыктэм беразы дышетскисьёс зол куараен верамез возьмало ини. Дышетскон паласен верано ке, озьы ик пӧртэмъёсыз вань, туала нылпиос но, анай-атайёс но мукет сямен малпасько, трослы азьлане кошкемын ни. Ми — азьвыл поколение, кудъёсызлэн йыраз азьвыл дышетон амалъёс кылемын на, соос вылын ужаны тыршиськом, но, улон воштӥське, азьло ужан амалъёс уг ни ужало, вылезлы дышетсконо. Дунне котыр ласянь вошъяське, выльдӥське, озьы ик дышетон удысын но. Туала дышетскисьёслы туала дышетӥсьёс кулэ ини. Али учкиськод ке, 9 но 11 классын дышетскись пиналъёс азьлань сюрессэс но уг тодо: кытчы дышетскыны пыроно, кытын ужано. Та юанъёслы азьло ик анай-атай сюрес возьматыны кулэ, собере ини дышетӥсьлы аслэсьтыз малпанъёссэ верано. 

— Туала дышетскисьлы — туала дышетӥсь кулэ шуиськоды бере, дышетон ужлэсь жадемдэс возьмато-а та кылъёс?

— Зэмзэ вераса, туэ куартолэзе туж жадиськем вал. Школаысь кошкисько шуисько вал ини. Гужемзэ шутэтскыса, гудырикошкон толэзе нош ик выль кужымен ужаны кутски. Ваньмыз ортче, дыраз шутэтскон гинэ медло.

Светлана Валентиновналэн дышетӥсь ужлы сюлэмзэ сётыса ужамез 32 ар тыр люкаськиз ни. Таӵе кузь ужан сюресын туж пӧртэм пумо данъян, пусъён грамотаосыз но дипломъёсыз люкаськизы. Дышетӥсьлэн сюлмысь ужезлы сётӥськемез элькун, ёрос, школа масштабъёсын пусйиськемын.

Улонын зэмос пыкет

Нылкышно — паймымон адями. Уж удысаз но, семьяяз но ассэ шедьтыны, дырзэ висъяны быгатэ. Озьы ке но, котькуд нылкышно нырысь ик яратоно кышно но анай, бератаз — сюлмаськись песянай но ӵужанай. Нылкышно шудо ке, ужаз но капчи мылкыдын гинэ ваньзэ быдэстэ. 

1993 арын Светлана Валентиновна улон сюрессэ Дурга гуртысь Вячеслав Михайловен герӟа. Вашкала удмурт сям-йылолъёсъя лушкала вайиллям. Нош тодматскиллям соос Кургем гуртын. Улоназы пӧртэм вакытъёс луизы ке но, ваньзэ ӵошен ортчиллям. Вордӥзы но будэтӥзы Леонид (1994), Дмитрий (1998) но Никита (2005) пиоссэс. Куинь пиоссы ик атайзылэсь ужан ӧнерзэс бырйизы — тазалыкез утён удысэз. 

Зэмос эмъян удыслы сюлэмзэ сётэм семья! Вячеслав Семёновичлэн анаез но Дурга гуртын ик фельдшер луыса тыршем. Ачиз Вячеслав Семёнович Дурга гуртын ик пинь эмъясь луэ. Леонид пизы Кировысь медициная кун академиез йылпумъяса, Лаиш ёросысь Усады каргуртын педиатр луыса тырше, Дмитрий пизы Уржумысь медициная колледжын дышетскыса, туннэ нуналэ Алёна кузпалэныз вордскем юртаз уло. Дмитрий Балтасьын массажист луыса тырше,

Алёна кензы Улисьял гуртын фельдшер. Никита пизы Ижкарысь медициная кун университетын 1-тӥ курсын дышетске. Атаез кадь ик азьланяз пинь эмъясь луоз.

— Инмарлы тау карисько улонам сыӵе усто адямилы — Вячеслав Семёновичлы — бызи шуыса. Со усто пинь эмъясь, семьязэ яратӥсь адями. Пиосмы но атайзылэсь ужан ӧнерзэ бырйизы. Котькудӥз ужаз ассэ ӟечен гинэ возьматэ, адӟем карымон луо. Соин ик мон шудо! 

— Фильмъёсын, анекдотъёсын, котьку сямен, анайзыос но кенъёс — тушмонъёс. Тӥ но пиеныды-кенэныды одӥг юртын улӥськоды уга, кыӵе та ласянь малпанды?

— Алёна мон понна вордэм нылы кадь матын. Юрт пушкысь но юрт котырысь ужъёсты валче быдэстыны тыршиськом, ӵошен пӧраськиськом. Пилы верай «дышетскондэс йылпумъяды, армие кошкиськод, армие кошкытозяд, тугандэ дорамы вайыса кельты». Службазэ йылпумъяса бертэм бераз сюан шудӥм, туннэ нуналлы туж умой улӥськом. 

Синмаськымон анайзы! (Котькуд кышномурт сыӵе луысал ке, оло, дунне вылын улон но трослы умойгес луысал?)

— Дурга гурт адямиос понна бигер гуртэн лыдъяське. Тӥ семья куспады кыӵе кылын вераськиськоды?

— Чылкыт удмурт кылын гинэ вераськиськом. Алёна кенмы ӟуч ке но, пор гуртын ужаса, удмурт семьяын улыса, пор но удмурт кылъёсын вала ини, кӧня ке кылъёсты но вераны быгатэ. Быдэс семьяенымы Акашкаез пусйиськом, арлы быдэ Ципьяысь черке ветлыны тыршиськом.

Малпаськоды, таин ваньмыз-а? Чик но ӧвӧл! Михайловъёс озьы ик пудо но вордо на. Гуртын вордӥськем но будэм адями ужтэк пукыны дышемын ӧвӧл, котьку маин ке выроно! Корка котыраз пумтэм чебересь сяськаос! Бакчаяз емышъёс! Адӟиське семьялэн огъя тыршемез. 

Светлана Валентиновна зэмос дышетӥсь но улонэ югыт сюрес усьтӥсь, яратӥсь кышно, сюлмаськись анай но валась анайзы. Улон шоры учкемъёсыз но верамъёсыз кемалы йырам кылёзы на: мур малпаськонъёсыз, индылонъёсыз дышетӥсьлэсь ужзэ дунъяны но гажаны дышетозы, улонын кулэ луись арбериосты но палэнэ кельтыны уг лу, соос туж кулэ луись.

Оскисько, нылкышнолэн чебер малпанъёсыз одно ик быдэсмозы но улонэ пыӵалозы. Азьланяз сӥзисько Светлана Валентиновналы но солэн семьяезлы шудбуро улон, вань тодмостэм ужпумъёсты мед быдэсмозы, каньыл мылкыдо улонды ялан шундыё куазь дыръя кадь пиштӥсь но сяськаяськись гинэ медло, нош коркады тыро, жингрес нылпи куараен мед тырмоз!

Гажано дышетӥсьёс! Тӥлесьтыд уждэс оскыны луонтэм секыт дунъяны! Кӧня кужымдэс сётӥськоды ужан удысады, куддыр семьядылы, матысь адямиосыныды вераськыны дырды но уг кыльы. Но уждылэн бервылъёсыз шаермылэн азинсконъёсаз, выльдӥськонъёсаз адӟисько. Дуннеысь чеберлык но узырлык тӥляд юн оскыса ужаменыды герӟаськемын. Вань дышетӥсьёсты ӟечкыласьком ортчем ӧнерлыко праздникенызы!