«Эктыны ке мон потӥсько...»

13-тӥ южтолэзе Кукмор карын удмурт эктонъя IX-тӥез «Эктон дыр» шуыса нимаськем улоскуспо фестиваль-конкурс ортчиз. Отчы котьку сямен Балтась ёросысь творческой коллективъёс но пыриськизы. 

Тодады вайытӥськом, «Эктон дыр» фестиваль 2017-тӥ арысен радъяське. Солэн валтӥсь ужпумез — гуртысь лулчеберетэз азинтон, эктон искусствоез валэктон-вӧлмытон но эктон ласянь самобытной быгатонлыкъёсын адямиосты шараян.

Эктон устолыкъя та конкурсын Ципья лулчеберетъя юртысь кык хореографической коллективъёс — «Азвесь гырлы» но «Грация» нылпи колективъёс — асьсэлэсь быгатонлыкъёссэс возьматӥзы. Шумпотымон, кыкез ик коллективъёс учкисьёслы чебер выступлениос кузьмазы но 1-тӥ степенё лауреатъёс луизы. 

Покчи Лӧзя лулчеберетъя юрт котькыӵе ужрадэ мыло-кыдо пыриськеменыз висъяське. «Эктон дыр» фестиваль-конкурсэ но та юртысь самодеятельной артистъёс арлы быдэ вуыло, вормисьёс пӧлын луо. Туэез ар но та ласянь йӧспӧртэм ӧз луы: лӧзяос шумпотыса ужрадэ пыриськизы, «Вуюись» но «Тыпыртон» хореографической коллективъёс 2-тӥ степенё лауреатъёс луизы. 

Балтась ёросысь вуэм эктӥсьёс пӧлын вал Вукогурт клубысь «Меленка» нылпи коллективысь нылашъёс но. Соос та конкурсэ нырысьсэ пыриськизы. Озьы ке но, сцена вылын чик ӟудытэк, соос туж быгатыса шошма удмуртъёслэсь апай эктонзэс быдэстӥзы но 2-тӥ степенё лауреат луизы. 

Туспуктэмъёс: Балтаси РДК -Центр культуры, Алина Григорьева.