Газетмылэн юбилеезлы сӥзем конкурсъёс

Газетлэн юбилеез — со редакциын ужасьёслэн гинэ ӧвӧл, лыдӟисьёслэн но праздниксы. Соин нимысьтыз тӥ понна кӧня ке тунсыко конкурсъёс ялӥськом но мыло-кыдо пыриськыны ӧтиськом. 

Нырысетӥез конкурсмы — «АЗЬЛАНЕЛЫУКМЫСТОН»
«Азьлане» газет сярысь акростих малпано. Курон: котькуд чурлэн нырысетӥ букваосыз пӧрмытыны кулэ «АЗЬЛАНЕЛЫУКМЫСТОН» веранкылэз. 

Кыкетӥ конкурсмы — «Азьлане» объектив пыр». «Азьлане» газетэн тунсыко туспуктэмъёстэс милемлы келялэ. Туспуктэмъёс газетын, ёрос газетлэн Baltaci.ru сайтаз но ВКонтакте мерлыко вотэсын потозы. Тужгес оригинальной туспуктэмлэн авторез конкурслэн вормисез луоз. 

Куинетӥ конкурс нимаське «Шедьты монэ, яке ватскем вазиськон».
Таиз конкурсмы аспӧртэмлыко йыртӥян луэ. Ужпум таӵе: тӥ, гажано лыдӟисьёс, «Азьлане» газетысь шифровать карыса гожтэм нимысьтыз вазиськонэз шедьтоно луоды.

Нялтас вераса, вазиськон быдэсэн сётэмын ӧвӧл, нош газетлэн кӧня ке номерезлы люкиське. Вераны быгатӥськом, вазиськонлэсь нырысетӥ кылзэ газетмылэн 4-тӥ коньывуонэ потэм номерысьтыз шедьтыны быгатоды шуыса. Озьыен, ватскем вазиськонэз шедьтон понна «Азьлане» газетлэсь котькуд номерзэ пыр-поч лыдӟоно луоз. 

Ньылетӥ конкурс — «Пинал газетчи». Та конкурсамы ми гожъяськыны яратӥсь пиналъёсты пыриськыны ӧтиськом но соослэсь эрико темаен гожтэм статьяоссэс, интервьюоссэс, кыӵе ке ужрадысь репортажъёссэс но мукет ужъёссэс витиськом.

Конкурсын вормисьёсты кузьымъёсын пусъён арлэн пумаз луоз шуыса чакласьком. 

Ужъёсты ваёно луоз ёрос газетлэн редакцияз, кудӥз таӵе адресъя интыяськемын: Балтась каргурт, Ленин урам, 91-тӥ юрт, 2-тӥ этаж, дубляжъя кабинет. Озьы ик ужъёсты луэ келяны BaltasiRed2005@yandex.ru электрон почтае но темаяз «Азьлане» конкурс» шуыса гожтыса. 

Конкурсъёслэн ортчон дырзы: 04.10.2024 ар — 22.12.2024 ар. 
Конкурсъёсты ортчытэ: «Татмедиа» АО-лэн филиалэз — «Хезмэт» газетлэн редакциез».

erid: 2VtzqwwzLqh
Реклама. Филиал АО «Татмедиа» Редакция газеты «Хезмэт»