Геройлэн анаез

Котькуд адямилэн улонэз анай бордысен кутске. Нуны вордскемезлы пумтэм шумпотэ анай. Кӧкые поныса ветта, уйëссэ изьытэк потэ со. 

Вераме потэ туннэ Вылын Ушма гуртысь лякыт но востэм кышномурт сярысь. Со Петрова Надежда Александровна. 

Пичи но пинал дырыз ортче Надялэн Улын Ушма гуртын. Огшоры крестьян семьяын вордске. Улын Ушма покчиëзо школаын куинь классэз йылпумъяса, ньылетӥ классэ Покчи Лӧзя школае мынэ. Тямыс класс бере Балтась шоръëзо школаын дышетсконзэ азьланьтэ. Надя туж умой дышетске. Ӵош дышетскем эшъëссы тазьы верало: «Физкультура урокын футбол шудыкумы, Надяез одӥг пи но уг суты вал. Сыӵе чырткем бызьылэ вал со». 

Школаын яратоно предметэз математика луэм. Дас классэ йылпумъяса, со вузкарисьлэсь ӧнерзэ басьтэ. Та удысын трос ужаса уг вутты. Улон сюрессэ герӟа Вылын Ушмаысь егит пияшен — Петров Анатолий Семëновичен. Надя бадӟым семьяе выль кен луыса лыктэ. Толялэн анай-атаез, песяйзы, вын-сузэръëссы но луо. Озьы ке но Надя туж каньыл ужась кен луэ та семьяын. Котькудзэс гажаса, ӵошен тупаса улыны быгатэ Надя. Анатолий колхозын тракторен ужа, нош Надя фермаын кунянъëсты сюдэ. Соослэн нырысетӥ луыса Алëна нылзы вордӥське, собере — Коля пизы. Бератаз Сергей пизы но вордске. Валэктонэз но ӧвӧл, макем секыт анайлы пичи нылпиоссэ будэтон вакытэ. Секытлы сëтскытэк, Надяен Толя туж умой нылпиос будэтӥзы но улон сюрессэз шедьтыны юрттӥзы. 

Алëна нылзы дышетӥсь луиз. Солэн кык нылпиосыз — Станислав пиез но Дарина нылыз. Трос аръëс ӵоже Алëна Анатольевна туж тыршыса ужаз Ципья шоръëзо школаын, покчи классъëсты дышетӥз. Али Ижкарын покчи классъëсын тодон-валан сётэ. Коля пизы «Сурнай»-ын тракторист луыса ужаз. Наталья кышноеныз кык нылъëс будэтӥзы — Иринаез но Полинаез. Жаляса верано, Коляез туэ 4 толшоре ватӥмы (со сярысь газетын статьяос потӥзы вал ини). Со батыр пияшмы 2022-тӥ арын СВО-е кошкиз. 2024 арын 21-тӥ гудырикошконэ Коля бырыны шедиз. Надя 2003-тӥ арын кузпалзэ ватам вал ини. Тани солэн гумыраз нош одӥг кайгу вуиз. Ми сое Рита бускеленым быгатэмъя диватыны тыршим. Но анай сюлэмез нокин но таӵе дыръя буйгатыны уг быгаты! Ачиз гинэ тодэ со, кызьы сюлэм висёнъëссэ, кайгыронзэ чидаз! Ми Надялы чиданлык куримы. Туж данъяськисько мон таӵе батырлыко кышномуртэн! Инмар солы азьланяз но тазалык, кужым, сабырлык мед сëтоз!

Али дораз Сергей пиез Кристина кышноеныз Надялы пыкет луо. Солэн куинь внучкаосыз вань вӧзаз — Вилиана, Кира но Иллария. Ваньзы сярысь сюлмаськыса ортчо Надялэн нуналъёсыз. Дышетскись нылъëслы урок дасяны но котьку юрттэ со. Дан тыныд, батыр пи вордэм анай! Азьланяз улонэд каньылэн, тазалыко но шудо мед луоз! Шугадӟон кайгу палэнтӥ мед ортчоз!

Екатерина Иванова, Вылын Ушма гурт