Гуртэ ужаны кылем егит ӧнерчиосты тодыны кулэ!

12 куартолэзе асьсэлэсь ӧнер праздниксэс пусйизы эмсузэръёс (медсестраос). Тазалыкез утён удысын соос одӥгзэ тужгес кулэ луись люкетсэ кылдыто. Эмсузэръёс котькытын — больницаосын, стационаръёсын — врачъёслэн валтӥсь юрттӥсьёссы луо. Мазэ веранэз: тросэз медициная услугаос возьматӥсько сестринской персоналэн. Соин эмсузэръёслэн тыршемзы калыкын котьку вылӥ дунъяськиз. Ӧнер праздникеныз валче Вуж Кушкет гуртысь ФАП-ын эмсузэр луыса ужась Алина Филипова «Азьлане» газетлы интервью сётӥз. Алина Александровнаен эмсузэрлэн ужезлэн плюсъёсыз но минусъёсыз, аспӧртэмлыкъёсыз сярысь, озьы ик гурт калыкен ужамез но мукетыз сярысь вераськимы.  

— Алина, ку но кызьы тӥ эмсузэр луыны малпады? Малы та ӧнерез бырйиды? Тазалыкез утён удысэ сюресты кыӵегес вал?

— 2006-тӥ арын Ципья шоръёзо школаез йылпумъяме бере, анай но атай монэ Уржумысь медициная колледже дышетскыны лэзизы. Кужмысь отчы лэзизы шуэм кыл ӧвӧл та — школа бере мон ачим пырак ӧй тоды, кытчы дышетскыны мынэме потэ. Нош Уржумын со дыре дышетске вал двоюродной апае. Соин анайлэн но атайлэн монэ отчы лэземзы потӥз, дыр — дышетскон интыын матысь адямие дорам луоз шуыса. Вылаз ик кытын ке но дышетсконэз азьланьтоно вал ук, ӧнер басьтоно. Озьы кутскиз мынам дышетсконэ. Ачим кулэ карыса, тунсыкъяськыса тодон-валан люкай. Оскиськоды-а, сокем мыным со кельшиз, сокем дышетсконэ кыстӥськи. Тӥни озьы куинь ар ӵоже дышетскеме бере (2006-2009-тӥ аръёс), «сестринское дело» специальностья колледжез горд дипломен йылпумъяй.

— Озьыен, огшоры гинэ дышетскыны пырем интыяды тӥ асьтэды шедьтӥды?

— Озьы. Туннэ нуналэ мон малпаськытэк ик вераны быгатӥсько: медицина — со мынам удысэ. Кызьы анай но атай тодӥллям, дыр, монэ та удысэ лэзьыны кулэ шуыса. Та понна соослы пумтэм тау карисько. Дышетсконме йылпумъяме бере но, сӥзьыл 2009-тӥ арын, басьтэм ӧнеръя ужаны кутски — Казаньысь стоматологияя клиникаын медсестра луи. Отын арен ӝыны ужам бере, 2011-тӥ арын, Республикаысь специализированной нылпи юртэ (дом ребёнка) ужаны интыяськи, палатаысь медсестра луыса. Отын 2013-тӥ арозь тырши. Собере ини декретэ потӥ, нош 2014-тӥ арын Ксюша нылы вордскиз. 2015-тӥ арын Мирослав пиме вайи, соин но декретын 2018-тӥ арозь пуки. †апак декретэ потэм дырысен гуртын улӥсько. Кузпалы но, Андрей, гуртын ик, «Яна тормыш» обществоын агроном луыса ужа, пудо сиён дасян понна кыл кутэ. Гуртын, мар шуид ке но, улон каньылгес но умойгес. Городэн ӵошатыса, ужаны но капчигес.

— Веранэз ӧвӧл, улон бордысен трослы капчигес гуртын. Ваньмыз аслад, юрттӥсьёсыд, ӵыжы-выжыосыд вань. Нош уж ласянь мар вералоды? Ку тӥ Кушкетын ужаны кутскиды? Гуртын медсестра луыса ужанлэн кыӵе аспӧртэмлыкъёсыз вань? Оло, кыӵе ке йылпумъянъёс лэсьтон понна ужам опытты ӧжытгес на-а?

— Гуртэ улыны бертэм бере, мон нырысь Балтасьысь 4-тӥ садикын кӧня ке толэзь ӵоже ужай. Собере ини татчы, Кушкетэ, интыяськи. Со вал 2018-тӥ арын ноябрь толэзе. Гурт бадӟым ӧвӧл ке но, пӧртэмез луэ. Кин ке малпалоз, гуртын калык трос ӧвӧл, вазиськонъёс но ӧжыт луо, дыр, шуыса. Соиз, оло, озьы но, дыр. Нош куддыръя телефон уйин но куаӵак жингыртыны быгатэ. Нышыр дыръя но, ӝыт дорысь ужъёсты ужаку но ӧтьыны быгато. Гурт калыклэсь куронзэ быдэстытэк кельтыны уг луы — уждэ ужано. Но мон уг ӝожтӥськиськы, кӧня ке дыр гинэ ужасько ке но али, та дыр куспын но номаин воштонтэм опыт люканы быгатӥ. Татын, ФАП-ын медсестра луыса ужаны кутскеме бере, асме зэмос медикен шӧдыны кутски. Куке адямилы юрттэт сётӥськод, ужедлэсь, ӧнередлэсь кулэлыксэ туж умой валаны кутскиськод.

— Опыт сярысь вераськон потэм бере, юатэк кельтыны уг быгатӥськы. Макем бадӟым опытэд луиз ке но, котькыӵе ӧрын ужасьлы ялан выль тодон-валан басьтоно, дышетскон юртын басьтэм тодон-валанэн гинэ ужаны уг луы. Тужгес но тазалыкез утён удысын тыршисьёслы.

— Веранэз ӧвӧл. Медицина — со секыт но туж кылкутымон ӧр. Дышетскыны но секыт — студентъёсты трос лекциос, практика вите. Ужаны кутскем бере эшшо но секытгес луэ. Но ми ялан дышетскиськомы, тодон-валанъёсмес муромытӥськомы, котькуд вить арлы быдэ дышетскиськомы. Туннэ нуналэ педиатрияя, озьы ик гурт интыысь калыклы эмъюрттэт сётонъя сертификатъёсы вань. Колледжын дышетскыкум но «Киров улосвылысь эмсузэръёслэн ассоциациязы» пыртӥзы. Пӧртэм медициная литература но лыдӟисько. Азьпалан но али, малпасько, троссэ дышетсконо но тодоно луоз.

— Медициная литература лыдӟыны дыр шедьтӥськоды вылэм. Ужан графикты но нормировать карымтэ ук...

— Дыр шедьтоно луэ ни. Тазьы арняяз куать нунал ужасько, субботае — ӝыны нунал. Но кызьы верай ни, пӧртэмез луэ — котьку жингыртыны, вызове ӧтьыны быгато. Соку «мынам ужан часэ ортчиз ни» шуыны уг луы.

— Ужаны кутскытозяды тодыса мынӥды, дыр, ужды секыт луоз шуыса. Но озьы ке но, котькуд нунал висись адямиосын пумиськон тӥляд малпанъёсады сюлэмез вырӟытӥсь (эмоциональной) пытьыоссэ кельтэ, луоз. Вылаз ик гуртын ог-огзэс ваньзы тодо, ас малпанъёсынызы, сюлмаськонъёсынызы ӝожтӥськыса вераськыны лыктӥсьёс но луо, дыр. Озьы ке но, ма юрттэ тӥледлы та ӧрын ужаны?

— Нырысетӥез, мон та гуртын улӥсько, мынам семьяе татын. Олокытчы ветлыны машина утчано ӧвӧл, ужед дорад гинэ. Сюрес вылэ но дыр трос уг кошкы. Та одӥгез гинэ муг. Кыкетӥез, ужын котькыӵе ситуациос луизы ке но (умой-а со, урод-а со), соос ваньмыз монэ малы ке но дышето. Таин опыт люкаське, аслыд ачид юн оскыны кутскиськод. Котькыӵе ужын аслаз плюсъёсыз но минусъёсыз вань.

— Нош кызьы тӥ шоры гурт калык учке? Егит уг каро-а?

— Егит, тодон-валанэд ӧвӧл шуисьёс ӧз луэ. Наоборот, гурт калык юрттӥз, мылкыд сётӥз. Ушъясьёс луизы, егит луэме шоры учкытэк, гуртэ улыны но ужаны кыли шуыса. Зэмзэ ке верано, гурт калыклы тау кареме потэ. Соос но куара кылзо, ачим но котьку куремзэс быдэстыны тыршисько, отказ кареме ӧвӧл. Туж шер гинэ вызовъёсы мынытэк кылисько, кыӵе ке мугъёсын сэрен гинэ. Озьы ик, учырен пайдаяськыса, таукарон кылъёсме вуттэме потэ Уськеева Любовь Александровналы. Ужаны кутскыкум, со мыным туж юрттӥз. Анай-атаелы, песяй-бабайлы бадӟым тау, мыным медицинае сюрес усьтӥзы шуыса.

— Алина Александровна, тодон-валанъёстэс котьку паськытатыны тыршиськоды шуыса верады. Нош дышетскыны мылкыдды вань бере, врачлэсь ӧнерзэ басьтон сярысь малпаськемды ӧвӧл-а?

— Та сярысь мон трос пол малпаськи ни, колледжез йылпумъяме бере ик. Но анай-атайлэн сузэрме но дышетонзы вань али шуыса, дышетсконме азьланьтоно ӧй кары. Но мон уг вераськы, та малпанэлэсь (врач луонлэсь — ред.) куштӥськи шуыса. Малпасько: тодон-валан ноку но кулэтэм но, мултэс но уг луы. Котьку азинскыны тыршоно, астэ вылезлы дышетоно. Дышетскем но трос тодэм ачид понна бадӟым плюс луэ. Заочно ке врачлы дышетскыны луысал, та дырозь кемалась дышетскыны пырысал ини...

— Алина Александровна! Сюлмысен тӥледыз ӧнер праздникеныды ӟечкыласьком. Сӥзиськомы самой ӟеч мылкыд каронъёсмес: котьку юн мылкыдо но сӧл-таза луэ, улонды шудо мед луоз, матысь адямиосты шумпоттыса мед улозы. Вераськемды понна бадӟым тау!