Гуртлэн нуналыз (+фоторепортаж)

Вуж Кушкет гуртысь шулдыръяськонэ пыриськыны аслым но шуд усиз. Туж шулдыр луоз шуэм кыллы оскыса лыктӥськем вал, чик янгышаськымтэе. Зэмзэ но, кемалась таӵе мылкыдэз бурдъясь ужрадын луэме ӧй вал ини. Рос-прос дасяськиллям кушкетъёс. Чебер инкуазь сэрегын ӝук пӧзьтыса, сӥль пыжыса, кырӟаса-эктыса, пӧртэм шудонъёсы, конкурсъёсы пыриськыса шулдыръяськизы гурт калык но лыктэм куноос.

Та ужрадлэсь вылӥ уровеньын ортчемзэ сӥё-дано куноослэн пыриськемзы но юнматэ. Аслэсьтыз гажамзэ возьматыса ужрадэ пыриськиз «Яна тормыш» обществолэн директорез Магсумзян Равилович Сайфутдинов. Со сюлмысен гурт калыкез но лыктэм куноосты та праздникен ӟечкылаз, капчи, шулдыр мылкыд сӥзиз. Вераны кулэ, колхоз та ужрадлы нимысьтыз кык парсьпи висъям шуыса. Праздникез ортчытонлы бадӟым юрттэт сётэм гуртозы, огъя вераса, асьмелэн аспалмы Пётр Павлович Данилов но шуныт кылъёсыныз шумпоттӥз. Шулдыр ӝытэз эшшо но шулдыр каризы Удмурт Элькунысь «Шулдыр ӝыт» эстрадая ансамбльысь кырӟасьёс Геннадий Ганьков, Павел Васильев но Руслан Серебренников.

Гуртлэсь нуналзэ Вуж Кушкетын кыкетӥ арзэ пусйизы. Оскем потэ, та чебер сям азинлыко луоз шуыса. Оло, мукет удмурт гуртъёслы но шыкысын возем син мальдымон чебер удмурт дэремъёссэс, жин-жин вазись камалиоссэс поттыны дыр вуиз ини?..