Гуртысь лулчеберетъя ужась: йылолъёсты утись но интыысь калыкез валтӥсь

Ӟаны гурт клубын 2023-тӥ арын тупатъян ужъёс быдэстэмын вал. Озьы туннэ нуналэ со ёросысь одӥгез тужгес чебер лулчеберетъя юрт луэ. Клуб куинь гуртъёслэсь — Ӟаны, Пор Кутеш но Сала-Кушкет — лулчеберетъя кулэяськонъёссэ быдэстэ, огъя вераса, 500-лэсь трос адямилэсь лулчеберет улонзэ пуштросогес карыны тырше.

Шумпотымон, 2025-тӥ арлы йылпумъянъёсъя Ӟаны клуб Татарстанысь устоез муниципал лулчеберет ужъюрт луыса вормисе потӥз но 186 363, 64 сюрс манетэн пусйиськиз. Культурно досуговой учреждениослэсь территоризэс умоятонъя ёросысь смотр-конкурслы йылпумъянъёсъя но кылем арын та лулчеберетъя ужъюрт 2-тӥ инты басьтӥз. Туннэ вераськиськом Ӟаны гуртысь клубен кивалтӥсен Иванова Алефтина Васильевнаен.

— Берло дыре вутскем кыӵе азинсконъёсты сярысь эшшо вераны луысал? — юасько Алефтина Васильевналэсь.

— Трос тунсыко, шудон но тодон-валан сётон ужрадъёс, профилактической вераськонъёс, концертъёс но пумиськонъёс ортчо клубамы. Гуртоос котьку туж шуныт пумитало 8-тӥ Мартлы, Анайлэн нуналэзлы дасям концертъёсмес, Выль ар праздникъёсты, гурт клубын ортчылӥсь шудон программаосты. 
Берло одӥг ар сярысь верано ке, пыриськимы ёросысь ужрадъёсы, Татарстан Республикаысь но Россиысь мукет улосъёсысь конкурсъёсы но фестивальёсы, призо интыос но басьтылӥмы. Ар ӵоже ортчись ёросысь ярмаркаосы, концертъёсы, сабантуйёсы пыриськон — со дышем уж ини. Набережной Челныын луись «Мы ветви древа одного» финн-угор калыкъёслэн элькун форумзы, ёрос но элькун «Гырон быдтон», йӧскалык лулчеберетъя «Наш дом — Татарстан» элькун фестиваль но сяме пырем ужрадъёс луо. Озьы ик арлы быдэ ми пыриськиськом традиционной культурая но калык творчествоя «Этномириада» калыккуспо конкурс-фестивале. Кукмор ёросын ортчись калык эктонъя «Эктон дыр» улоскуспо конкурсэ но вуылыны тыршиськом, жаль туэ ӧз пӧрмы отчы пыриськыны. Ветеранъёсмылэн «Лулгур» вокальной ансамбльзы котькуд аре «Балкыш» фестивале пыриське. Нимысьтыз ӧтёнъя но луыло мынонъёс. Кылем арын августэ «Древо жизни» проектэз радъясьёслэн ӧтемзыя Казань городэ вуылӥмы, армие келян йылолэз возьматӥмы. Августэ ик картофкалы сӥзем празднике Атня ёросысь Ислейтар гуртэ ӧтизы вал. Озьы ик завятской удмуртъёслэн «Зарни бугор» шуыса нимам нырысетӥ улоскуспо фестивалязы пыриськимы но лауреатлэсь дипломзэ басьтӥмы. Огъя верано ке, кытчы мыныны быгатӥськомы, отысь кыльыны ум тыршиське.

2025-тӥ ар Россиын Быдӟым Атыкай ожын Вормонлы 80 ар тырмонэн герӟаськемын но Атыкай музъемез утисьлэн ареныз ялэмын вал бере, милям ужамы но та тематика бадӟым инты басьтӥз. Тросэз ужрадъёс та темалы сӥземын вал.

Ар ӵоже клубын нылпиос но егитъёс понна патриотизм мылкыд пыӵатонъя ужрадъёс — интеллектуальной шудонъёс, викторинаос, вераськонъёс но познавательной программаос — ортчизы. Одӥгез сыӵе ужрад вал «Живи Россия!» концерт, кудзэ ми Ӟаны шоръёзо школаен валче радъямы но ортчытӥмы. Ӧтемын вал Афганистанын, Чечняын ожмаськонэ пыриськемъёс но СВО-е пыриськисьёслэн ӵыжы-выжыоссы. Концерт одӥг шокчемен ортчиз.

— СВО сярысь вераськон потэмысь. Туннэ нуналэ тросаз лулчеберетъя ужъюртъёс маскировочной сеть пунонэз радъянэ мыло-кыдо пырисько, тӥ но сыӵеослэн радазы луиськоды-а? 

— Бен, ми палась калык но быгатэмезъя СВО зонае маскировочной сетьёс пунэ. Мыло-кыдо адямиос пырисько ожгарчиосмылы юрттонъя та ӟеч уже. 

– Кыӵе аудитория тросгес культураен тунсыкъяське: нылпиос, бадӟымъёс яке пенсионеръёс?

— Милям клубамы котькудӥз ветлэ, шуысал мон. Пичиос но вань, егитъёс но, арлыдоос но. Котькудӥныз но ужаны тыршиськомы. Культурно-досуговой ужез радъяку, лыдэ басьтӥськом калыклэсь арлыдъя аспӧртэмлыкъёссэ. Пӧртэм ужрадъёс ортчытыны, калыклэсь ваньмон дырзэ радъяны, егитъёсын, семьяосын, арлыдоосын, нылпиосын но инвалидъёсын ужаны тыршиськом. Кылсярысь, ар ӵоже арлыдоос вуж выль ар, арлыдоослэн нуналзы выллем ужрадъёсамы пырисько. Озьы ик 2025-тӥ арын ноябрьысен ми физической активностен но тазалыкез утёнэн герӟаськем «Линейные танцы» акцие пыриськыны кутскимы. Сыӵе ужрадъёс адямиослы пумиськыны, вераськыны луонлык сёто, активной каро. Тазалыксыя сюбегатэм луонлыкъёсын адямиосын но уж нуиське. Сяме пыремъя арлы быдэ Ӟаны гуртын улӥсь пичи дырысь инвалидэз Ольга Николаевна Николаеваез мини-концертэн но выль ар ӟечкыланэн шумпоттӥськом.

— Котьку сямен гурт интыын лулчеберетъя юрт матысь кусып возе дышетон ужъюртъёсын но интыысь кивалтон ёзэтъёсын. Тӥляд та ласянь кыӵе югдур?

— Озьы, ми но ёрос администрациен, школаен, библиотекаен но нылпи садэн мыло-кыдо ужаськом, ог-огмылы юрттыса. Школаен ӵошен концертъёс радъяськомы, ужрадъёс, пумиськонъёс. Библиотекаен но котьку тыршиськомы ӵошен ужаны, ужрадъёсты валче ортчытӥськомы. Ӵемысь со удмурт лулчеберетэн, Поволжьеын улӥсь калыкъёсын тодматон но пӧртэм познавательной тематикаен ужрадъёс луо. Нылпи садэ вуылӥськом, покчи пиналъёсын ужрадъёс ортчытӥськом. Бадӟым юрттэт сётэ милемлы «Дуслык» общество. Ужрадъёсты ортчытонын спонсор юрттэт сётэмез понна туж бадӟым тау Николай Григорьевич Колоколовлы.

— Берло дыре выездной ужрадъёсты ортчытон сяме пыриз. Тӥ но сыӵе практикаез уже кутӥськоды-а?

— Выездной ужрадъёс пӧлы пыртыны луоз, дыр, «НАЗ» центре вуылэммес. Одно ик арлы огпол ке но отын концерт программамес возьматӥськомы, кылем арын Покчи Лӧзя но Ципья лулчеберетъя юртъёсын перекрёстной концертъёс ортчытӥмы. Туэ Балтасьысь лулчеберетъя центрлэн автоклубеныз Ярак-Чурмаын концерт возьматӥмы. Кылем арын Сизнерын луиз вал сыӵе ик концерт.

— Кыӵе уж нуиське егитъёслы удмурт калык сям-йылолъёсты пыӵатонъя?

— Зэм, нылпиослэн но егитъёслэн калык творчествоен но искусствоен юн тунсыкъяськонзы мед луоз шуыса, усточиослэсь ужзэс но талантсэс, лулчеберетэз но калык мерасэз гажан мед кылдоз шуыса, соосты калыкмылэн сям-йылолъёсыныз но лулчеберетэныз тодматыны кулэ. Соин ужрадъёсты тыршиськомы калык сям-йылолъёсын герӟаса ортчытыны. Клуб бордын пичи музей ужа, пиналъёсты соин тодматӥськомы, удмурт шудонъёсын шудытӥськомы. Ар ӵоже пӧртэм йӧскалык праздникъёслы сӥзем ужрадъёс ортчо. Озьы ик удмуртъёслэн улон-вылонэнызы адӟытонъёс радъясько, калык сям-йылолъёсты, шудонъёсты но фольклорез улӟытонъя но утёнъя ужрадъёс ортчо. Ансамбле ветлӥсь егитъёс тодматско сям-йылолъёсын, частушкаосты дышето, эктыны дышетско. Мукет ёросъёсы, регионъёсы вуылӥськомы ке, егитъёс понна со выль тодматсконъёсын тунсыко луэ. Сцена вылын асьсэлэсь задорлыксэс, быгатэмзэс возьматэмзы потэ соослэн. Вылӥ дунъет басьтӥмы ке, мылкыдзы бурдъяське.

— Шуг-секытъёсын пумиськиськоды-а ужады?

— Шуг-секытъёс луыло, но соосыз вормыны тыршиськом. Адямиен ужаны ноку но капчи ӧй вал, нош туала дыре тужгес но. Озьы ке но ми туж шумпотӥськомы, ансамбле ветлӥсьёсмы вань но соос мылысь-кыдысь ужрадъёсы пырисько шуыса.

– Вераськемды понна тау!

Туспуктэм: личный архив